އެމެރިކާ އިން ޔުކްރެއިން އަށް ދެމުންދާ އަސްކަރީ އެހީ މެދުކަނޑާލައިފި
މިނިންމުން ނިންމާފައިވަނީ ޔުކްރެއިންގެ ރައީސް ވުލޮޑިމިއަރ ޒެލެންސްކީއާއި ޓްރަމްޕް އޯވަލް އޮފީހުގައި ބޭއްވި ހޫނު ބައްދަލުވުމަށް ފަހު، ޓްރަމްޕްގެ އިސް ސަލާމަތީ ލަފާދޭ ބޭފުޅުންނާއެކު ބޭއްވި ބައްދަލުވުމެއްގައި
އެމެރިކާގެ ރައީސް ޑޮނަލްޑް ޓްރަމްޕާއި ޔުކްރެއިންގެ ރައީސް ވުލޮޑިމިއާ ޒެލެންސްކީ ވައިޓް ހައުސްގެ އޯވަލް އޮފީހުގައި ފެބްރުއަރީ 28، 2025 ގައި ބައްދަލު ކުރައްވަނީ
ޔުކްރެއިން އަށް ދެމުންއައި އެމެރިކާގެ ހަނގުރާމައިގެ އެހީ ވަގުތީގޮތުން މެދުކަނޑާލައިފިއެވެ.
ޓްރަމްޕް ގެ ސަރުކާރުން ޔުކްރެއިން އަށް ފޮނުވަމުންދިޔަ އަސްކަރީ އެހީތައް ވަގުތީގޮތުން ހުއްޓާލުމަށް ނިންމައިފި ކަމަށް ހޯމަ ދުވަހު ވައިޓް ހައުސްގެ އިސް އޮފިޝަލެއް އަލް އަރަބިއްޔާ ވަނީ ހާމަކުރައްވާފައެވެ.
"އަޅުގަނޑުމެން ފޮނުވާ އެހީތަކުން މައްސަލައިގެ ހައްލަށް މަގުފަހިވޭތޯ ބެލުމަށްޓަކައި، އެހީތައް ވަގުތީގޮތުން މެދުކަނޑާލައި މުރާޖައާކުރަމުން މިދަނީ،" ވައިޓް ހައުސްގެ އޮފިޝަލް ވިދާޅުވިއެވެ.
މިނިންމުން ނިންމާފައިވަނީ ޔުކްރެއިންގެ ރައީސް ވުލޮޑިމިއަރ ޒެލެންސްކީ އާއި ޓްރަމްޕް އޯވަލް އޮފީހުގައި ބޭއްވި ހޫނު ބައްދަލުވުމަށް ފަހު، ޓްރަމްޕްގެ އިސް ސަލާމަތީ ލަފާދޭ ބޭފުޅުންނާ އެކު ބޭއްވި ބައްދަލުވުމެއްގައެވެ.
ބްލޫމްބަރގްގެ ރިޕޯޓުގައި ބުނެފައިވާ ގޮތުން، ޕޮލެންޑްގައި ޓްރާންސިޓް ކޮށްފައި ހުރި ހަތިޔާރާއި މިހާރު މަގުމަތީގައި ހުރި ހުރިހާ އަސްކަރީ އެހީތަކެއް ހިފެހެއްޓުމަށް ޑިފެންސް ސެކްރެޓަރީ ޕީޓް ހެގްސެތް އަށް ޓްރަމްޕް އަމުރު ކުރައްވާފައި ވެއެވެ.
ތިން އަހަރާ ގާތްކުރާ މި ހަނގުރާމައިގައި އެމެރިކާ އިން ވަނީ ޔުކްރެއިން އަށް އެތައް ބިލިއަން ޑޮލަރެއްގެ އެހީ ދީފައެވެ. މި ނިންމުން އިއުލާން ކުރުމުގެ ކުރިން ޓްރަމްޕް ރިޕޯޓަރުންނަށް ވިދާޅުވެފައި ވަނީ، ޔުކްރެއިން އަށް ދޭ އެހީ ހުއްޓާލުމާ ބެހޭގޮތުން މަޝްވަރާކޮށްފައި ނުވާ ކަމަށާއި، އެހެންނަމަވެސް ވޮޝިންގްޓަނުން ދޭ އެހީތަކާ މެދު ޒެލެންސްކީ "އިތުރަށް ޝުކުރުވެރިވާން" ޖެހޭ ކަމަށެވެ.
