ޣައްޒާ އާރާސްތު ކުރުމުގެ ޕްލޭނާ ބެހޭ ގޮތުން އަރަބި ގައުމުތަކުގެ ޚާރިޖީ ވަޒީރުން ބައްދަލު ކުރައްވައިފި
މިސްރުން އިސްނަގައިގެން އެކުލަވާލި ޕްލޭން އަންގާރަ ދުވަހު އޮންނަ އަރަބި ގައުމުތަކުގެ އެންމެ އިސްވެރިންގެ ސަމިޓަށް ހުށަހަޅާ ފާސް ކުރުމަށް ވަނީ ހަމަޖެހިފައި
އަރަބި ގައުމުތަކުގެ ޚާރިޖީ ވަޒީރުންގެ ބައްދަލުވުން - 3 މާޗް 2025
ހޯމަ ދުވަހު ގާހިރާ ގައި އަރަބި ޤައުމުތަކުގެ ޚާރިޖީ ވަޒީރުން ސިއްރު ބައްދަލުވުމެއް ބާއްވައި، ޣައްޒާގެ 2.4 މިލިއަން ރައްޔިތުން އެތަނުން ނުބާލައި، ހަނގުރާމައިން ވީރާނާވެފައިވާ ސަރަހައްދު އަލުން ބިނާކުރުމުގެ ޕްލޭނެއްގެ މަޝްވަރާކޮށްފި ކަމަށް އަރަބި ލީގުގެ މަސްދަރެއް އޭއެފްޕީ އަށް ޔަޤީންކޮށްދީފިއެވެ.މި ބައްދަލުވުމުގެ ކުރިން، މިސްރުގެ ޚާރިޖީ ވަޒީރު ބަދުރު އަބްދުއްލަތީ، ޖޯޑަން، ބަހްރެއިން، ޓިއުނީޝިއާ، އިރާޤު، ޔަމަން އަދި ފަލަސްޠީނުގެ ޚާރިޖީ ވަޒީރުންނާ ވަކިވަކިން ބައްދަލުކުރެއްވިއެވެ.އަރަބި ގައުމުތަކުގެ ޕްލޭން އެކުލަވާލީ އެމެރިކާއިން ޣައްޒާ ހިފައި، އެތަން "މެޑިޓެރޭނިއަންގެ ރިވިއެރާ" އަކަށް ބަދަލުކޮށް، ފަލަސްޠީނު ރައްޔިތުން މިސްރަށާއި ޖޯޑަނަށް ބަދަލުކުރުމުގެ ވާހަކަ އެމެރިކާގެ ރައީސް ޑޮނަލްޑް ޓްރަމްޕް ދެއްކެވުމާ ގުޅިގެން އެކަމަށް ދެކޮޅު ހެދުމުގެ ގޮތުންނެވެ. ޓްރަމްޕްގެ ޕްލޭނަށް ދުނިޔޭގެ ގިނަ ފަރާތްތަކުން ދެކޮޅުހަދައިފައިވެއެވެ.މިސްރުން އިސްނަގައިގެން އެކުލަވާލި ޕްލޭން އަންގާރަ ދުވަހު އޮންނަ އަރަބި ގައުމުތަކުގެ އެންމެ އިސްވެރިންގެ ސަމިޓަށް ހުށަހަޅާ ފާސް ކުރުމަށް ވަނީ ހަމަޖެހިފައެވެ.
