ވިއްސަރާއާ ގުޅިގެން ދަރުމަވަންތަ، އައިޖީއެމްއެޗް، އަދި ވިލިމާލެ ހޮސްޕިޓަލުގެ އޯޕީޑީތައް ބަންދުކޮށްފި
2 މާރިޗު 2025 | އާދީއްތަ 07:38ހޮސްޕިޓަލް ސަރަހައްދުގައި ފެންބޮޑުވެ، ބަލި މީހުންނަށް ހޮސްޕިޓަލަށް އައުމާއި، ދިއުން ވަނީ ތަކުލީފަކަށްވެފައި
ދަރުމަވަންތަ ހޮސްޕިޓަލް
ރާއްޖެއަށް ކުރަމުންދާ ވިއްސަރާއާ ގުޅިގެން ދަރުމަވަންތަ، އައިޖީއެމްއެޗް، އަދި ވިލިމާލެ ހޮސްޕިޓަލުގެ އޯޕީޑީތައް ބަންދުކޮށްފިއެވެ.
އައިޖީއެމްއެޗުން ބުނީ މާލެއަށް މެދުނުކެނޑި ބޯކޮށް ވާރޭވެހި އަދި ބައެއް ސަރަހައްދުތަކުގައި ފެންބޮޑުވެ އެކަމުގެ ސަބަބުން ވަރަށް ގިނަ ރައްޔިތުންނަށް ދަތިވެ، ތަކުލީފުތަކެއް ލިބިފައިވާތީ 2 މާރޗް 2025 ވަނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ހަމަޖެއްސެވުމާއި އަދި ހޮސްޕިޓަލް ސަރަހައްދުގައި ފެންބޮޑުވެ، ބަލި މީހުންނަށް ހޮސްޕިޓަލަށް އައުމާއި، އަދި އެނބުރި ދިއުމަކީ ތަކުލީފަކަށް ވެފައިވާ ކަމަށެވެ.
އެހެންކަމުން ދަރުމަވަންތަ ހޮސްޕިޓަލް، އައިޖީއެމްއެޗް، އަދި ވިލިމާލެ ހޮސްޕިޓަލުގެ އޯޕީޑީތައް އާދިއްތަ ދުވަހު ބަންދުވާނެ ކަމަށް އައިޖީއެމްއެޗުން ބުނެއެވެ. ނަމަވެސް އައިޕީޑީ އަދި އިމަޖެންސީގެ ޚިދުމަތްތައް މެދުނުކެނޑި ކުރިއަށްދާނެ ކަމަށެވެ.
މުޅި ރާއްޖޭގެ މޫސުން ގޯސްވެ، ވޭތުވެދިޔަ 24 ގަޑިއިރު މުޅި މާލެސިޓީއަށް ބޯކޮށް ވަނީ ވާރޭވެހިފައެވެ. އަދި އައިޖީއެމްއެޗް ހިމެނޭ ސަރަހައްދު ވަރަށް ބޮޑަށް ފެންބޮޑުވެ، ގެތަކަށް ގެއްލުން ލިބިފައިވެއެވެ. ފެން ހިންދުމުގެ މަސައްކަތް އެމްއެންޑީއެފުން ވަނީ ކުރިއަށް ގެންގޮސްފައެވެ. އާދިއްދަ ދުވަހުގެ ހެނދުނު އާއްމު ހާލަތަށް ގެނެސްފައިވާ ކަމަށާއި، މި އޮޕަރޭޝަންގައި މާލެއިން 16911 ޓަނުގެ ފެންވަނީ ހިންދާފައިވާ ކަމަށް އެމްއެންޑީއެފުން ބުނެއެވެ.
