ޕީ.ކޭ.ކޭ އިން ތުރުކީއާއެކު ދެކޮޅަށް ކުރަމުން ދިޔަ ހަނގުރާމަ ހުއްޓާލުމަށް ނިންމާ އިއުލާނު ކޮށްފިއެވެ.ކުރުދީ ހަތިޔާރު އެޅި ގްރޫޕެއް ކަމުގައިވާ ޕީ.ކޭ.ކޭ އިން ތުރުކީއާ ދެކޮޅަށް ކުރަމުން އައި ހަނގުރާމަ ހުއްޓާލަން ނިންމި ކަން ހުކުރު ދުވަހު އިއުލާނު ކުރި އިރު، އެ ނިންމުން ނިންމާފައިވަނީ ޕީ.ކޭ.ކޭ ގެ ޖަލުގައި ހުރި ލީޑަރު އަބްދުﷲ އޮޖަލާން ހަމަލާތައް ހުއްޓާލައި، އެ ޖަމާއަތް އުވާލުމަށް ގޮވާލެއްވުމާ ގުޅިގެންނެވެ.

ޕީ.ކޭ.ކޭ ގެ އެގްޒެކެޓިވް ކޮމިޓީން ނެރުނު ބަޔާނެއްގައި ބުނެފައިވަނީ ސުލްހަވެރި ޑިމޮކްރަޓިކް މުޖްތަމައަކަށް މަގު ފަހި ކުރުމަށް "އަޕޯ (އޮޖަލާން) ގޮވާލެއްވި ގޮވާލެއްވުމަށް އިޖާބަ ދިނުމުގެ ގޮތުން މިއަދުން ފެށިގެން ހަނގުރާމަ ހުއްޓާލުމަށް ނިންމައިފީމެވެ." މިފަދައިންނެވެ.

ޕީ.ކޭ.ކޭ އަކީ ތުރުކީ، ޔޫރަޕިއަން ޔޫނިއަން އަދި އެމެރިކާއިން ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވާ ޖަމާއަތެކެވެ. 1984 އިން ފެށިގެން މި ޖަމާއަތުން ވަނީ ކުރްދީންނަށް ވަކި ދައުލަތެއް ހޯދުމަށް މަސައްކަތްކޮށްފައެވެ. ކުރުދުންނަކީ ތުރުކީގެ 85 މިލިއަން މީހުންގެ އާބާދީގެ 20 އިންސައްތައެވެ.

1999 ގައި އޮޖަލާން ހައްޔަރުކުރުމަށްފަހު، މި ހަނގުރާމަ ނިމުމަކަށް ގެނައުމަށް އެކި ފަހަރު މަތިން މަސައްކަތްކުރެވުނެވެ. 2015 ގައި އެންމެ ފަހުން ބޭއްވުނު ސުލްހަ މަޝްވަރާތައް ނާކާމިޔާބުވުމަށްފަހު، އޮކްޓޯބަރު މަހާ ހަމައަށް އިތުރު މުއާމަލާތެއް ނުކުރެވެއެވެ. އެހެން މިކަން އޮއްވާ ތުރުކީގެ ރައީސް އުރުދުޣާން ވަނީ ސުލްހަ ގަބޫލު ކުރެތޯ އޮޖަލާން އަށް ސަޕްރައިޒް ހުށަހެޅުއްވުމެއް ހުށަހަޅުއްވާފައެވެ.

މި ހަނގުރާމައިގެ ސަބަބުން މިހާތަނަށް 40،000 އަށްވުރެ ގިނަ މީހުން މަރުވެފައިވެއެވެ.

ބަންދުގައި ހުންނެވި އޮޖަލާންއާ އެތައް ފަހަރަކު ތުރުކީންނަށް މަދަދުވެރިވާ ޑީއީއެމް ޕާޓީ އިން ބައްދަލުކުރުމަށްފަހު، ހަތިޔާރު ބަހައްޓާ ޕާޓީ އުވާލުމަށް އޮޖަލާން ދެއްވި މެސެޖް ޕީކޭކޭ އަށް ފޯރުކޮށްދިނީ ބުރާސްފަތި ދުވަހުއެވެ.