ޤާނޫނުއަސާސީ އިސްލާހުކުރެވޭނީ 3/4ބައިން ފާސްކުރާ ޤާނޫނަކުންނެ ލިޔުނީ އަކުރު ގިނަކުރާކަށް ނޫން - މަހްފޫޒް
ޤާނޫނުއަސާސީ އަށް އިސްލާހެއް ގެނެވޭނީ މަޖިލީހުގެ ޖުމްލަ މެމްބަރުންގެ ހަތަރު ބައިކުޅަ ތިން ބައިގެ އަޢުލަބިއްޔަތުން ފާސްކުރާ ޤާނޫނަކުން
ސުޕްރީމްކޯޓުގެ އަޑުއެހުމުގެ ތެރެއިން
ޤާނޫނުއަސާސީ އަށް އިސްލާހު ގެނެވޭނީ މަޖިލީހުގެ ހަތަރު ބައި ކުޅަ ތިންބައިން ފާސްކުރާ ޤާނޫނަކުން ކަމަށް ލިޔެފައި ވަނީ ހަމައެކަނި ލިޔުމުން އެކަން ބަޔާންކޮށްފައި ބޭއްވުމަށް ނޫންކަމަށާއި، ޤާނޫނުއަސާސީ އަށް ގެންނަ ބަދަލު ގެނެވޭނީ އެކަމަށް ބޭނުންވާ އަޢުލަބިއްޔަތާއި އެކު އެކުލަވާލާ ޤާނޫނެއް މެދުވެރިކޮށް ކަމަށް ނޫނީ ޤާނޫނުއަސާސީ އަށް ބަދަލު ނުގެނެވޭނެ ކަމަށް ޤާނޫނީ ވަކީލް މަހްފޫޒް ސައީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ސިޔާސީ ޕާޓީއަކުން މަޖިލީހުގެ މެމްބަރަކު ވަކިކޮށްފި ނަމަ ނުވަތަ ވަކިވެއްޖެ ނަމަ ރައްޔިތުންގެ މަޖިލީހުގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނެސްފައިވާ އިސްލާހާއި ގުޅިގެން ސުޕްރީމްކޯޓަށް ހުށަހަޅާފައިވާ މައްސަލައިގައި ވަކާލާތުކުރައްވަމުންނެވެ. ދައުލަތުން ވަކާލާތުކުރައްވާފައި ވަނީ މި މައްސަލަ ސުޕްރީމްކޯޓަށް ނުބެލޭނެ ކަމަށެވެ.
ޤާނޫނުއަސާސީގަ އިސްލާހެއް ހިމެނުމަށް ފާސްކުރުމުން އެއީ ޤާނޫނުއަސާސީގެ ބަޔަކަށް ވާ ކަމަށް ދައުލަތުން އައީ ތަކުރާރުކޮށް ބުނަމުންނެވެ. އެހެންވީމަ ޤާނޫނުއަސާސީ އޮތީ ރަނގަޅަށްތޯ ނުވަތަ ނޫންތޯ ބެލުމަކީ އެއްވެސް ބަޔަކަށް ކުރެވޭނެ ކަމެއް ނޫންކަމަށް ދައުލަތުން ވަނީ ބުނެފައެވެ.
އެކަމާއި ގުޅޭ ގޮތުން މަހްފޫޒް ވިދާޅުވީ ޤާނޫނުއަސާސީ އަށް ގެންނަ ބަދަލުތައް ސުޕްރީމްކޯޓަށް ނުބެލޭނެ ކަމަށް ދައުލަތުން ބުނަމުންދާ އިރު ޤާނޫނުއަސާސީގ 274 ވަނަ މާއްދާ އާއި 261 ވަނަ މާއްދާއިން އެކަން އޮތް ގޮތް އެނގޭ ކަމަށެވެ. އެގޮތުން ޤާނޫނު މާނަކޮށްދީފައިވާ ގޮތަށް އޭނާ ވަނީ އަލިއަޅުވާލައްވާފައެވެ.
ޤާނޫނު ހެދުމުގެ ބާރު މަޖިލީހަށް ލިބިދީފައިވާއިރު ޤާނޫނުއަސާސީ އިސްލާހުކުރެވޭނީ ޤާނޫނުއަސާސީ ބަޔާންކުރާ ގޮތުގެ މަތިންކަމަށް ބަޔާންކޮށްފައިވާކަން މަހްފޫޒް ވަނީ ފާހަގަކުރައްވާފައެވެ. ޤާނޫނުއަސާސީ އިސްލާހު ކުރެވޭނީ މަޖިލީހުގެ ޖުމްލަ މެމްބަރުންގެ ހަތަރުބައިކުޅަ ތިން ބައިގެ އަޢުލަބިއްޔަތުން ފާސްކުރާ ޤާނޫނަކުން ކަމަށް ބަޔާންކޮށްފައިވާކަން އޭނާ ވަނީ ފާހަގަކުރައްވާފައެވެ.
ކީއްވެގެންތޯ ޤާނޫނުއަސާށީ އެކަށައެޅި މަޖިލީހުން އެ މާއްދާގައި ނުބުނީ ޤާނޫނުއަސާސީ އިސްލާހުކުރެވޭނީ ރައްޔިތުންގެ މަޖިލީހުގެ ހަތަރުބައިކުޅަ ތިން ބައިގެ އަޢުލަބިއްޔަތުންނޭ ނުބުނީ ސުވާލުކޮށްލަން އެބަޖެހޭ. އެހެން ބުނެފަ ނިންމާލެވުނީސް ނޫންތޯ؟ ޤާނޫނުއަސާސީގައި ލަފުޒުތައް ގިނަ ކުރުމުގެ ބޭނުމުގަތޯ ޤާނޫނަކުންނޭ އެ ވާހަކަ ލިޔުއްވާފައި އޮތީ. އެކަން އެހެން ވެދާނެހެން އެއްގޮތަކަށް ވެސް ހިއެއް ނުވޭޤާނޫނީ ވަކީލް މަހްފޫޒް ސައީދު
ޤާނޫނުއަސާސީގެ އެއްވެސް ހިސާބެއްގައި ޤާނޫނުއަސާސީ އިސްލާހުކުރަން ހުށަހަޅާ ޤާނޫނުތަކާއި އެހެނިހެން ޤާނޫނުތަކާއި މެދު ފަރަގެއް ގެނެސްފައި ނުވާކަމަށް ވެސް އޭނާ ވަނީ ވިދާޅުވެފައެވެ. ޤާނޫނަކަށް ވުމުގެ ކުރިން ކަނޑަތުކުރަން ޖެހޭ މަރުހަލާ އާއި ބައެއް އިޖުރާއަތުތައް ފިޔަވާ ފާސްކުރާ އެހެން ޤާނޫނުތަކާއި ޤާނޫނުއަސާސީ އަށް އިސްލާހު ގެނައުމަށް ފާސްކުރާ ޤާނޫނާއި ތަފާތެއް ނެތް ކަމަށް ވެސް އޭނާ ވަނީ ވިދާޅުވެފައެވެ.
ޤާނޫނުއަސާސީ ހެދި މަޖިލީހަށް އޮތް ބާރާއި ޤާނޫނުއަސާސީން އުފަންވި މަޖިލީހަށް އޮތް ބާރުތަކާއި ތަފާތުވާނެކަން އޭނާ ވަނީ ފާހަގަކުރައްވާފައެވެ. ޤާނޫނުއަސާސީ ހެދި މަޖިލީހަށް އޮތީ ޤާނޫނުއަސާސީ އުފަންކުރުވާ އެކަށައެޅުމުގެ ބާރުކަމަށް އޭނާ ވިދާޅުވިއެވެ. އެއީ ޤާނޫނުއަސާސީ ކަމަށާއި މިހާރު ހުރި މުއައްސަސާތަކާއި އިދާރާތައް އުފަންކުރުވީ އެ ޤާނޫނުއަސާސީގެ ތެރެއިންކަމަށް މަހްފޫޒް ވިދާޅުވިއެވެ.
ޤާނޫނުއަސާސީ އިސްލާހުކުރުމުގެ ބާރު މިހާރުގެ މަޖިލީހަށް ލިބިދީފައިވާއިރު ޤާނޫނުއަސާސީ އެކުލަވާލި ބާރަށް ގޮންނުޖެހޭނެ ކަމަށް މަހްފޫޒް ފާހަގަކުރެއްވިއެވެ. ޤާނޫނުއަސާސީ އެކުލަވާލި ބާރާއި އިސްލާހުކުރާ ބާރަކީ ދެ ބާރެއް ކަމަށް ވިސްނުމުން މުޅި މައްސަލަ އަށް ހައްލު ލިބޭ ކަމަށް އޭނާ ވަނީ ވިދާޅުވެފައެވެ.
