މާލޭގެ މަގުތަކުން 235 އުޅަނދު ޓޯކޮށްފި
201 ސައިކަލާއި 31 ހަތަރުފުރޮޅުލީ އުޅަނދު އާއި 3 ބައިސްކަލް ޓޯވކުރެވުނު
ބާރުބޮޑު ސަރަހައްދުތަކުން ވެހިކަލް ޓޯވ ކުރަނީ
މާލޭގެ މަގުތަކުން 235 އުޅަނދު ޓޯކޮށްފިއެވެ.
ފުލުހުން ބުނީ މާލޭގެ މަގުތަކުގައި ދިގު މުއްދަތަކަށް ބޭނުންނުކޮށް ދޫކޮށްލާފައި ހުރި އުޅަނދުތައް ނެގުމުގެ މަސައްކަތް ކޮށްފައިވާ ކަމަށެވެ. މި މަސައްކަތުގެ ދަށުން ޖުމްލަ 235 އުޅަނދެއް ވަނީ ޓޯވ ކޮށްފައެވެ. މީގެ ތެރޭގައި ހިމެނެނީ 201 ސައިކަލު، ހަތަރު ފުރޮޅުލީ 31 އުޅަނދު އަދި 3 ބައިސްކަލެވެ.
ރާއްޖެއެމްވީއަށް މައުލޫމާތުދެމުން ފުލުހުން މީޑިއާ އޮފިޝަލް ވިދާޅުވީ މި މަސައްކަތަކީ ރޯދައަށް ތައްޔާރުވުމުގެ ގޮތުން ފެށި މަސައްކަތެއް ކަމަށެވެ. އަދި އުޅަނދުތައް ނަގާފައިވަނީ މާލޭގެ ބާރުބޮޑު ސަރަހައްދުތައް ބެލުމަށްފަހު އެ ސަރަހައްދުތަކުން ކަމަށެވެ. އަދި މި މަސައްކަތަކީ މާލެ އަދި ހުޅުމާލޭގެ މަގުތަކަކީ އަމާން ރައްކާތެރިތަނަކަށް ހަދައި މަގުތައް ތަރުތީބުކުރުމަށް ކުރަމުންދާ މަސައްކަތުގެ ތެރެއިން ކުރަމުންދާ ކަމެއް ކަމަށެވެ.
މީގެ އިތުރުން އާންމު ރައްޔިތުންނަށް ފަސޭހަކަމާއެކު އެއްގަމު ދަތުރުފަތުރު ކުރެވޭނެ އެކަށީގެންވާ މާހައުލެއް ގާއިމުކުރުމަށާއި ޕާކް ކުރާނެ ޖާގަ ހެދުމަށް ކުރެވޭ މަސައްކަތެއް ކަމަށްވެސް ފުލުހުން ބުނެފައިވއެވެ.
މާލޭގެ މަގުތަކުގައި ޤަވައިދާ ޚިލާފަށް ޕާކުކޮށްފައި ހުރި އުޅަނދުތައް ނެގުމުގެ މަސައްކަތް ފުލުހުން ކުރަމުން އަންނައިރު ދާދިފަހުން ފުލުހުންނާއި އެޗްޑީސީ ގުޅިގެން ވަނީ ހުޅުމާލޭ މަގުތަކުގައި ހުރި ބާ އުޅަނދުތައް ވެސް ނަގާފައެވެ.
ހަތަރު ފުރޮޅުލީ އުޅަނދުތަކަށް ޕާކްކުރުމަށް ވަގުތީ ބިމެއް ސަރުކާރުން ހަމަޖައްސާފަވާއިރު ދާދިފަހުން ވަނީ ގަވާއިދުތަކާއި އުސޫލުތަކާއި ޚިލާފަށް ބޭނުންކުރަމުންދާ އުޅަނދުތަކުގެ ރަޖިސްޓްރީއާ އެހެނިހެން ކަންކަން އިސްލާހުކުރަންދެން، ވަގުތީގޮތުން އެ އުޅަނދުތައް ބޭއްވުމަށްވެސް ބިމެއް ހަމަޖައްސާފައެވެ.
ހަތަރުފުރޮޅުލީ އުޅަނދު ޕާކުކުރުމަށް ހުޅުމާލެއިން ހަމަޖައްސާފައިވަނީ ހުޅުމާލެ ސަހަރާ މިސްކިތް ކުރިމައްޗަށް އޮތް ބިމެވެ. 90،000 އަކަފޫޓުގެ މި ބިމުގެ 50،000 އަކަފޫޓް ޚާއްސަކޮށްފައިވަނީ ޓެކްސީތައް ފަދަ ހަތަރުފުރޮޅުލީ ވެހިކަލްތަކަށެވެ. އަދި 40،000 އަކަފޫޓްގެ ސަރަޙައްދު ޚާއްސަކޮށްފައިވަނީ ހުޅުމާލެ މަގުތަކުގައި ޤަވައިދާ ޚިލާފަށް ޕާކްކޮށްފައި ހުންނަ ވެހިކަލްތައް ޓޯވ ކުރުމަށްފަހު ގެނެސް ބެހެއްޓުމަށެވެ.
