އެމެރިކާގެ ރައީސް ޑޮނަލްޑް ޓްރަމްޕް ބައިނަލްއަޤްވާމީ ޖިނާއީ ކޯޓަށް އެޅި ފިޔަވަޅުތައް ކުށްވެރިކޮށް، ދުނިޔޭގެ ކަންކޮޅުތަކުގައި "އިންސާފާއި އުއްމީދު" ހޯދައިދިނުމަށް އެކޯޓުން ކުރާ މަސައްކަތްތައް ހުއްޓުމެއް ނެތި ކުރިއަށް ގެންދާނެކަމަށް އެ ކޯޓުން ބުނެފިއެވެ.
"އެމެރިކާއިން އެ ޤައުމުގެ އެގްޒެކެޓިވް އޯޑަރެއް މެދުވެރިކޮށް އައިސީސީގެ އޮފިޝަލުންގެ މައްޗަށް ދަޢުވާކުރުމަށާއި އެ ކޯޓުގެ މިނިވަން އަދި ވަކިފަރާތަކަށް ނުޖެހޭ ޝަރުޢީ މަސައްކަތަށް ގެއްލުން ދިނުމަށް މަސައްކަތްކުރާތީ އައިސީސީން އެކަން ކުށްވެރިކުރަމެވެ،" އެ ކޯޓުން ހުކުރު ދުވަހު ނެރުނު ބަޔާނެއްގައި ބުނެފައިވެއެވެ.
"ކޯޓުން، ކޯޓުގެ މުވައްޒަފުންނާއެކު ސާބިތުކަމާ އެކު ތިބެ، ދުނިޔޭގެ އެކި ކަންކޮޅުތަކުގައިވާ މިލިއަނުން ގުނާލެވޭ މަޢުސޫމު އަނިޔާ ލިބިފައިވާ މީހުންނަށް އިންސާފާއި އުއްމީދު ފޯރުކޮށްދިނުން ކުރިއަށް ގެންދިއުމަށް ވަޢުދުވަމެވެ،" ދަ ހޭގްގައި ހުންނަ އެ ކޯޓުން އިތުރުކޮށްފައިވެއެވެ.
އެމެރިކާ އާއި އެ ގައުމުގެ އެކުވެރި އިސްރާއީލްގެ މައްޗަށް "ޣައިރު ޤާނޫނީ އަދި އަސާސެއްނެތް" ތަޙުޤީޤުތަކެއް ކުރިއަށް ގެންދާ ކަމަށް ބުނެ އައިސީސީ އަށް ފާޑުކިޔަމުން، ޓްރަމްޕް ބުރާސްފަތި ދުވަހު އެ ކޯޓަށް ދަތި ކުރުމުގެ އެގްޒެކެޓިވް އޯޑަރެއްގައި ވަނީ ސޮއިކުރައްވާފައެވެ.
ޓްރަމްޕްގެ އަމުރުގައިވާ ގޮތުން އައިސީސީގެ އޮފިޝަލުންނާއި، މުވައްޒަފުންނާއި، އެމީހުންގެ ޢާއިލާގެ މެންބަރުންނާއި، އަދި ކޯޓުގެ ތަޙުޤީޤުތަކަށް އެހީތެރިވެދިން ކަމަށް ބެލެވޭ ކޮންމެ މީހެއްގެ މުދާ ހިފެހެއްޓުމާއި ދަތުރުފަތުރު ކުރުން މަނާކުރެވޭނެއެވެ.
ފިޔަވަޅު އަޅާ ފަރާތްތަކުގެ ނަންތައް އާންމުކޮށްފައި ނުވިނަމަވެސް، ޓްރަމްޕްގެ ފުރަތަމަ ވެރިކަމުގައި އެމެރިކާއިން އެ ކޯޓަށް ފިޔަވަޅު އެޅި އިރު ކޯޓުގެ ޕްރޮސެކިއުޓަރުންނަށް އަމާޒު ކުރިކަން ފާހަގަ ކުރެވެއެވެ.
"ކޯޓުގެ 125 މެންބަރު ޤައުމުތަކަށާއި، މަދަނީ ޖަމާއަތްތަކަށާއި، އަދި ދުނިޔޭގެ ހުރިހާ ޤައުމުތަކަށް ގޮވާލަނީ އިންސާފާއި އަސާސީ އިންސާނީ ޙައްޤުތައް ރައްކައުތެރި ކުރުމަށް އެއްބައިވަންތަކަމާއެކު ތެދުވުމަށެވެ،" އައިސީސީ ގެ ބަޔާން ނިންމާލަމުން ބުނެފައިވެއެވެ.
