މިމަހުގެ 31 ވާ ހުކުރު ދުވަހު، އިދިކޮޅު އެންމެ ބޮޑު ޕާޓީ އެމްޑީޕީން ރައީސް ޑރ. މުޙައްމަދު މުއިއްޒުގެ މި ސަރުކާރު ޖަވާބުދާރީ ކުރުމަށް މަގުމައްޗަށް މި ނުކުންނަނީ ގިނަ ރައްޔިތުންގެ ހައްޤުތައް ގެއްލިފައިވާތީ އެ ރައްޔިތުންގެ އެދުމުގެ މަތިން ކަމަަށާއި ދެން އެމްޑީޕީއެއް ނުހުއްޓުވޭނެ ކަަމަށް އެމްޑީޕީގެ ބާރަށު ދާއިރާގެ ރައީސް ނައުޝާދު އިބްރާހީމް ވިދާޅުވެއްޖެއެވެ.
ރާއްޖެޓީވީން ގެނެސްދޭ "ފުދިއްޖެ ފުނޑިއްޖެ" ޚާއްސަ ކަވަރޭޖްގައި ވާހަކަދައްކަވަމުން ނައުޝާދު ވިދާޅުވީ މި ސަރުކާރަށް އަހަރެން ވެގެން ދިޔައިރުވެސް ރައްޔިތުންގެ އެދުމުގެމަތިން އެމްޑީޕީން ތިބީ މަގުމައްޗަށް ނުކުމެ އަޑު ނުއުފުލައި މި ސަރުކާރުން ކުރާ ކަންކަން ވަރަށް ގާތުން ބަލަން ކަމަށެވެ. އެހެން ނަމަވެސް މިއަދު މި ސަރުކާރުން ކަންކަން ކުރަމުން ގެންދާ ގޮތުން ގައުމުގެ ހާލަތު ވަރަށް ބޮޑަށް ގޯސްވާތަން ފެންނަމުން ދާތީ ދެން އިތުރަށް ބަލަން ނުތިބެވޭނޭ ކަމަށް ނައުޝާދު ވިދާޅުވިއެވެ.
ނައުޝާދު ވިދާޅުވީ މި ގައުމުގައި ވައްކަންތައް އިންތިހާއަށް މައްޗަށް ގޮސް، އެސްއޯއީތައް ފުނޑި، ރައްޔިތުން ނިކަމެތިވެ، ބިކަހާލުގައި ޖައްސައިފިކަމަށެވެ. އަދި މިނިވަން މުއައްސަސާތައް ރައީސް މުއިއްޒުގެ މުށުތެރެއަށް ލާތަން މިއަދު ފެންނަމުން ދާ ކަމަށާއި އެތައް ނަޔަކު އެތަކެއް ޤުރުބާނީއެއް ވެގެން ގެނައި ފެހި ޤާނޫނު އަސާސީވެސް މިއަދު ފުނޑާލާފައިވާ ކަމަށް އޭނާ ވިދާޅުވިއެވެ.
ނައުޝާދު ވިދާޅުވީ ގައުމުގެ ހާލަތު ގޯހުންގޯހަށް ގޮސްފައިވާއިރު، އެމްޑީޕީން ދެން ބަލަން ނުތިބޭނޭ ކަމަށާއި އެމްޑީޕީ އަކީ އަބަދުވެސް ގައުމުގެ ރައްޔިތުންގެ އަޑު އަހައި ރައްޔިތުންނާއި އެކުގައި އޮންނަ ޕާޓީއެއް ކަމަށެވެ.
ނައުޝާދު ވިދާޅުވީ ގައުމުގެ މިހާލަތާއި ގުޅިގެން ރައްޔިތުންނާއި ދިމާވެފައިވާ ކަންބޮޑުވުންތައް އޮޅުން ފިލުވުމަށް އެމްޑީޕީން ގޭގެއަށް ގޮސް ރައްޔިތުންނާއި ބައްދަލުކޮށް ގިނަ މަޝްވަރާތަކެއް ކޮށްފައިވާ ކަމަށާއި ހަމަ ހުރިހާ ރައްޔިތުންވެސް ބޭނުންވަނީ ރައީސް މުއިއްޒުގެ މި ސަރުކާރު، ހަމަގަށް އަޅުވައި، ނިމުމަކަށް ގެނައުމަށް ކަމަށެވެ.
ވޭތުވެ ދިޔަ އެއް އަހަރު ދުވަހު އެމްޑީޕީން ތިބީ މި ސަރުކާރަށް އެއްބާރުލުން ދީގެން ކަންކަން ދާގޮތް ބަލާލަން ވެގެން. އެހެން ނަމަވެސް އަބަދު އެމްޑީޕީ އަކަށް އެހެން ބަލާކަށް ނުތިބެވޭނެ. ރައްޔިތުން އެވަގުތު ދެންނެވީތީ އަޅުގަނޑުމެން މަޑުކޮށްލައިގެން ތިބީ. އެހެން ނަމަވެސް މިއަދު މި ގައުމު މިހާލަތަށް ވެއްޓި، ގައުމަށް ވަމުން ދާގޮތް ފެނިފަ އަޅުގަނޑުމެންނަށް މަޑުން ތިބެވޭކަށެއް ނެތް. އަޅުގަނޑުމެންނަށް މިއަދު މި ފެންނަމުން ދަނީ އެސްއޯއީތައް ފުނޑިގެން ދާތަން. ވައްކަން އިންތިހާއަށް، ރައްޔިތުން ނިކަމެތިކޮށްފި. މިނިވަން މުއައްސަސާތަކުގެ ބާރު ސީދާ ރައީސްގެ މުށުތެރެއަށް ލާތަން މި ފެންނަނީ.އެމްޑީޕީގެ ބާރަށު ދާއިރާގެ ރައީސް ނައުޝާދު އިބްރާހީމް
ނައުޝާދު އިތުރަށް ވިދާޅުވީ މި ސަރުކާރު ހަމަމަގަށް އެޅުވުމަށް މިއަދު އެމްޑީޕީގެ ކިބައިން ރައްޔިތުން އެބަ އެދޭ ކަމަށާއި އަދި މި ސަރުކާރުން ރައްޔިތުންނަށް މި ކުރިމަތި ކުރުވާ ތަކުލީފުތަކުން މިންޖުކޮށްދިނުމަށް މަގުތަކަށް ނިކުމެގެން އަޑު އުފުލަދިނުމަށް ވެސް ރައްޔިތުން ކެނޑިނޭޅި އެދެމުންދާކަމަށް އޭނާ ވިދާޅުވިއެވެ.
ނައުޝާދު ވިދާޅުވީ ބާކީ މިއޮތީ މަދު ދުވަސްކޮޅެއް ކަމަށާއި މި ސަރުކާރު ހަމަމަގަށް އެޅުވުމަށް ރައްޔިތުންގެ އެދުމުގެ މަތިން މަގުމައްޗަށް ނުކުމެ އަޑުއުފުމަށް ތައްޔާރަށް ތިބި ކަމަށާއި ދެން ރައީސް މުއިއްޒަށް ވެސް އެމްޑީޕީ ނުހުއްޓުވޭނޭ ކަމަށް ނައުޝާދު ވިދާޅުވިއެވެ.
އަދި މިމަހުގެ 31 ވަނަ ދުވަހު މި ސަރުކާރުން ކުރަމުން ގެންދާ ނޭންގާނީ ކަންކަމުގެ އަޑު އިއްވުމަށް ހަމަ ހުރިހާ ރައްޔިތުންވެސް މަގުމައްޗަށް ނުކުމެ އަޑުއުލުމަށް އޭނާ ވަނީ ގޯވާލާފައެވެ.
