މާދަމާގެ ޖަލްސާއަށް ފާރިސް މަޖިލީހަށް ގެނެސްދޭން އެދިއްޖެ

މާދަމާ ބާއްވާ ރައްޔިތުންގެ މަޖިލީހުގެ ޖަލްސާގައި މިވަގުތު ބަންދު ކޮށްފައިވާ ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫނަށް ބައިވެރިވެވަޑައިގެންނެވޭނޭ ގޮތް ހައްދަވައި ދެއްވުމަށް އޭނާގެ ޤާނޫނީ ވަކީލް މައުމޫން ހަމީދު އެދިވަޑައިގެންފިއެވެ.

މައުމޫން ހަމީދު މިގޮތަށް އެދިވަޑައިގެންނެވީ ފާރިސްގެ ފަރާތުން ކޮމިޝަނަރ އޮފް ޕްރިޒަންސް އަހުމަދު ޝިހާނަށް މިއަދު ފޮޏުއްވި ސިޓީއެއްގައެވެ.

އެސިޓީގައި މައުމޫން ހަމީދު ވިދާޅުވެފައި ވަނީ ކްރިމިނަލް ކޯޓުގެ އަމުރެއްގެ ދަށުން އެސަރވިސްއިން ބަލަހައްޓަމުން ގެންދާ ރިމާންޑް ޖަލެއްގައި ބަންދުކުރެވިފައިވާ ރައްޔިތުންގެ މަޖިލީހުގެ ދިއްގަރު ދާއިރާގެ އިއްޒަތްތެރި މެންބަރު އަހުމަދު ފާރިސް މައުމޫނުގެ ޤާނޫނީ ވަކީލުގެ ހައިސިއްޔަތުން ކަމަށެވެ.

އެގޮތުން މައުމޫން ހަމީދުގެ މުވައްކިލް އަހުމަދު ފާރިސް މާފުށީ ޖަލުގައި ބަންދުކޮށްފައިވާއިރު ރައްޔިތުންގެ މަޖިލީހުގެ 2017 ވަނަ އަހަރުގެ ދެވަނަ ދައުރުގެ 9 ވަނަ ޖަލްސާ 22 އޯގަސްޓް 2017 ވާ އަންގާރަ ދުވަހު ހެނދުނު 9:00 ގައި ބޭއްވުމަށް ތާވަލް ކުރެވިފައިވާ ކަމަށް ސިޓީގައި ވިދާޅުވެފައިވެއެވެ. އަދި އެޖަލްސާގެ އެޖެންޑާ ރައްޔިތުންގެ މަޖިލީހުގެ ވެބްސައިޓުގައި ވެސް ޝާއިިޢު ކޮށްފައިވާ ކަމަށް ވެސް ވިދާޅުވިއެވެ.

މައުމޫން ހަމީދު އެދިވަޑައިގެންފައިވަނީ އެޖަލްސާއަށް ހާޒިރުވުމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެްނަބރު އަހުމަދު ފާރިސް މައުމޫން ބޭނުންފުޅުވާތީ އެޖަލްސާގައި އެމެންބަރަށް ބައިވެރިވެވަޑައިގެންނެވޭނޭ އެންމެހާ އިންތިޒާމްތައް ހަމަޖެއްސެވުމަށެވެ.

ޝަރީއަތް ނިމެންދެން ފާރިސް ބަންދުކޮށްފައިވާއިރު މީގެ ކުރިން ބޭއްވި ޖަލްސާއެއްގެ ކޮމެޓީއެއްގައި ވެސް ބައިވެރިވުމަށް ފާރިސް ޖަލްސާއަށް ހާޒިރު ކޮށްދިނުމަށް ކްރިމިނަލް ކޯޓުން ވަނީ އަމުރު ކޮށްފައެވެ. ނަމަވެސް އެފަހަރު ކަރެކްޝަނުން އެކަން ކޮށްފައެއް ނުވެއެވެ.