ޑީއެންއާރުން ޒާތީ މައުލޫމާތު ވަގަށް ނެގި މައްސަލަވެސް ބަލަން އެންގެން އޮއްވާ ޕީޖީ އަމުރުކުރެއްވީ ސަރުކާރުން ބޭނުންވާ ކަންކަން އަވަސްކުރުމަށް
ގާނޫނުއަސާސީގެ 223 ވަނަ މައްދާގެ ދަށުން ޑީއެންއާރުގެ މައްސަލަ ބެލުމަށް ޕީޖީއަށް އަމުރުކުރެވޭނެ
ޕްރޮސެކިއުޓަރ ޖެނެރަލް އައްބާސް ޝަރީފް
ޑީއެންއާރުގެ ތެރޭގައި ހިނގި ޒާތީ މައުލޫމާތުން ވައްކަން ކުރުމުގެ މައްސަލައިގައި އާންމު ރައްޔިތުންނާއި ސިޔާސީ ޕާޓީތަކުގެ ބޮޑެތި ކަންބޮޑުވުންތަކެއް ހުއްޓާ ސަރުކާރުން ބޭނުންވާ ކަންކަން އަވަސް ކުރުމަށް އޭސީސީއަށް ޕްރޮސެކިއުޓަރ ޖެނެރަލްގެ ފަރާތުން އަމުރުކުރައްވައިފިއެވެ.
އެންޓި-ކޮރަޕްޝަން ކޮމިޝަނުން ހިންގާ ޖިނާއީ ތަޙުޤީޤުތައް އެކަށީގެންވާ އަވަސްމިނެއްގައި ހިނގަމުން ނުދާކަމުގެ ޝަކުވާ ޕްރޮސިކިއުޓަރ ޖެނެރަލްގެ ސަމާލުކަމަށް އައިސްފައިވާ ކަމަށް ބުނެ ޕީޖީން އޭސީސީއަށް އަމުރުކުރައްވާ އަންގާފައިވަނީ ދިވެހި ދައުލަތާއި ޢާންމު ރައްޔިތުންގެ މަޞްލަޙަތު މަތީ މިންވަރަކަށް ހިމެނޭ މައްސަލަތަކުގެ ތަޙުޤީޤު ހިމެނޭގޮތުން، އެންޓި-ކޮރަޕްޝަން ކޮމިޝަނުން ހިންގާ ޖިނާއީ ތަޙުޤީޤުތައް ލަސްވެ، ކޮރަޕްޝަނާއި ޚިޔާނާތުގެ މައްސަލަތަކުގައި ދައުލަތަށް ގެއްލޭ ފައިސާ އަނބުރާ ހޯދުމުގައާއި، އެފަދަ މައްސަލަތަކުގައި ދައުލަތާއި ޢާންމު ރައްޔިތުންގެ މަސްލަޙަތުތަކަށް އުނިކަން އަންނަމުންދާކަން ސަމާލުކަމަށް އައިސްފައިވާ ކަމަށެވެ.
މި ސަބަބަށްޓަކައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 223 ވަނަ މާއްދާގެ (ޅ) އާއި، އެ މާއްދާގެ (ފ) ގެ ދަށުން ޕްރޮސިކިއުޓަރ ޖެނެރަލްއަށް ލިބިދޭ ބާރުގެ ދަށުން، އެންޓި-ކޮރަޕްޝަން ކޮމިޝަނުން ތަޙުޤީޤުކުރަމުންދާ އެންމެހައި ޖިނާއީ މައްސަލަތައް ޕްރޮސިކިއުޓަރ ޖެނެރަލްގެ އޮފީހަށް ހުށަހެޅުމުގައި ޢަމަލުކުރާނެ ގޮތުގެ އިރުޝާދެއް އެކުލަވާލައްވައި، އެ އިރުޝާދަށް އާދީއްތަ އިން ފެށިގެން ޢަމަލުކުރުމަށް، އެންޓި-ކޮރަޕްޝަން ކޮމިޝަންގެ މައްޗަށް ޕްރޮސިކިއުޓަރ ޖެނެރަލް ވަނީ އަމުރުކުރައްވާފައެވެ.
ޕްރޮސިކިއުޓަރ ޖެނެރަލްގެ އަމުރުގައި، އެންޓި-ކޮރަޕްޝަން ކޮމިޝަނުން ތަޙުޤީޤުކުރަމުންދާ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) މައްސަލައާއި، ކޮވިޑް-19 އާ ގުޅިގެން ދައުލަތުގެ މުދަލާއި ފައިސާ ނަހަމަގޮތުގައި ބޭނުންކުރުމުގެ މައްސަލައާއި، ސަރުކާރު ޙިއްޞާވާ ކުންފުނިތަކާއި، ބިންވެރިޔާ އަދި ގެދޮރުވެރިޔާ ސްކީމްއާ ގުޅުންހުރި މައްސަލަތައް ފަދަ ދައުލަތުގެ މާލިއްޔަތާއި ޢާންމު ފަރުދުންގެ މަޞްލަޙަތާ ގުޅުންހުރި ޚިޔާނާތުގެ ބޮޑެތި މައްސަލަތަކުގެ ތަޙުޤީޤު، ޚާއްޞަ ސަމާލުކަމެއްދީގެން އަވަހަށް ހިންގައި، ޕްރޮސިކިއުޓަރ ޖެނެރަލް ދެއްވާފައިވާ އިރުޝާދާ އެއްގޮތަށް މި އޮފީހަށް ހުށަހެޅުމަށް އަމުރުކުރައްވާފައިވެއެވެ.
ނަމަވެސް ދާދިފަހުން ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އިސްވެ ހުންނަވައިގެން ޑީއެންއާރުން އާންމުންގެ ޒާތީ މައުލޫމާތު ވަގަށް ނަގައި ވެރިކަން ކުރާ ޕީއެންސީއަށް މީހުން ވެއްދުމަށް ހިންގި ޒާތީ މައުލޫމާތުން ވައްކަން ކުރުމުގެ މައްސަލަ ބަލަން މިހާތަނަށް ވެސް ޕީޖީ އޮފީހުން އެއްވެސް އިދާރާއަކަށް އަންގާފައި ނުވެއެވެ.
ދިވެހިރާއްޖޭގެ ގާނޫނުއަސާސީގެ 223 ވަނަ މައްދާ (ޕްރޮސިކިއުޓަރ ޖެނެރަލްގެ މަސްއޫލިއްޔަތުތަކާއި ބާރުތައް) ގެ (ޅ) ގައި ބުނެފައިވަނީ ޖިނާއީ ކުށެއް ކަމަށް ތުހުމަތުކުރެވޭ ޢަމަލެއް އެއްވެސް ފަރާތަކުން ހިންގައިފިކަމުގެ ޝަކުވާއެއް ހުށަހަޅައިފިނަމަ ނުވަތަ މިނޫންގޮތަކުންވެސް މިފަދަ ކަމެއްގެ މަޢުލޫމާތު ލިބިއްޖެ ހިނދެއްގައި، އެ ކަމެއް ތަޙުޤީޤުކުރުމުގެ އަމުރު ނެރުން ރަނގަޅުކަމަށް އޭނާއަށް ފެންނަ ކަންކަމުގައި އެ އަމުރު ނެރެވޭނެ ކަމަށެވެ.
ނަމަވެސް މިހާތަނަށް ވެސް ޕީޖީ އޮފީހުން މި މައްސަލައިގައި އެއްވެސް ފިޔަވަޅެއް އަޅާފައި އަދި އެއްވެސް އިދާރާއަކަށް މި މައްސަލަ ބަލަން އަންގާފައި ނުވެއެވެ.
ޕީއެންސީއަށް މީހުން ވެއްދުމަށް ޑީއެންއާރު އޮފީހުގައި ފޯމު ފުރިކަމަށް އެ އޮފީހުގެ ސިޔާސީ އިސްވެރިން ވަނީ އެއްބަސްވެފައެވެ. އަދި މި މައްސަލަ ބެލުމަށް ސިޔާސީ ޕާޓީތަކުންނާއި އާންމުން އަންނަނީ ގޮވާލަމުންނެވެ.
