ހުޅަނގު އައްސޭރި އަށް އިސްރާއީލުން ދެމުންދާ ނުރައްކާތެރި ހަމަލާތައް އަރަބި ލީގުން ކުށްވެރި ކޮށްފި
އިސްރާއީލުގެ ސިފައިން އަންގާރަ ދުވަހުން ފެށިގެން ޖެނީން އަށް ދެމުންދާ ހަމަލާތަކުގައި މިހާތަނަށް މަދުވެގެން 14 މީހުން ޝަހީދު ކޮށްލައި، އެތައް ބަޔަކު ވަނީ ޒަޚަމްކޮށްލާފައެވެ.
އިސްރާއީލުން ހުޅަނގު އައްސޭރީގެ އިމާރާތްތައް ސުންނާފަތި ކުރަނީ
އަރަބި ލީގުގެ ޤާނޫނު ހަދާ މަޖިލީހުން އިސްރާއީލުން ފަލަސްތީނުގެ ހުޅަނގު އައްސޭރި އަށް ދެމުންދާ ހަމަލާތައް ކުށްވެރިކޮށްފިއެވެ.
އަރަބި އަރަބި ލީގުގެ ގާނޫނު ހަދާ މަޖިލިހުން ނެރުނު ބަޔާނެއްގައި އިސްރާއީލުގެ ސިފައިންނާއި އެތަނުގައި ގަވައިދާ ޚިލާފަށް ވަޒަންވެރިގެން އުޅޭ އިސްރާއީލީން ހިންގާ "ނުރައްކާތެރި އަނިޔާވެރިކަން އިތުރުވަމުންދާ ކަމަށް" ބުނެ އެ އަމަލުތައް "އެންމެ ހަރުކަށި" އިބާރާތުން ކުށްވެރި ކޮށްފައިވެއެވެ.
އިސްރާއީލުގެ ސިފައިން އަންގާރަ ދުވަހުން ފެށިގެން ޖެނީން އަށް ދެމުންދާ ހަމަލާތަކުގައި މިހާތަނަށް މަދުވެގެން 14 މީހުން ޝަހީދު ކޮށްލައި، އެތައް ބަޔަކު ވަނީ ޒަޚަމްކޮށްލާފައެވެ. އިސްރާއީލުން ގަދަކަމުން ހިފާފައިވާ ހުޅަނގު އައްސޭރީގެ ޖެނީން ރެފިއުޖީ ކޭމްޕުގައި ފަލަސްތީނުގެ ގެތައް އަންދައި، އިސްރާއީލު ސިފައިން ގެންދަނީ ގެތައް ސުންނާފަތި ކުރަމުންނެވެ.
ނޫސްވެރިންނާ ވާހަކަދައްކަމުން، އދ. ގެ އިންސާނީ ޙައްޤުތަކުގެ އޮފީހުގެ ތަރުޖަމާނު ތަމީން އަލް-ޚީތާން ވިދާޅުވެފައިވަނީ, ހިފާފައިވާ ހުޅަނގު އައްސޭރީގައި "އިސްރާއީލުގެ ބައެއް އިސް ފަރާތްތަކުން ހުޅަނގު އައްސޭރީގައި ޔަހޫދީ އާބާދީތައް އިތުރަށް ފުޅާކުރުމުގެ ރޭވުންތަކާ ބެހޭ ގޮތުން ތަކުރާރުކޮށް ދައްކަވާ ވާހަކަތަކާމެދު އެ ޖަމްޢިއްޔާއިން ކަންބޮޑުވާ" ކަމަށެވެ.
"އިސްރާއީލުން އެ ގައުމުގެ ރައްޔިތުން ހިފާފައިވާ ސަރަހައްދުގައި ވަޒަންވެރި ކުރަމުން ގެންދިއުމަކީ ވެސް ހަނގުރާމައިގެ ކުށެއް ކަމަށް އަޅުގަނޑުމެން އަނެއްކާވެސް ހަނދާން ކޮށްދެން" އޭނާ ވިދާޅުވިއެވެ.
އިސްރާއީލުގެ ހައްދުފަހަނަ އެޅި ފިކުރުގެ މާލީ ވަޒީރު ބެޒަލެލް ސްމޮޓްރިޗް ދިރިއުޅުއްވަނީ ވެސް ހިފާފައިވާ ސަރަހައްދުގައި އިމާރާތް ކޮށްފައިވާ ގެއެއްގައެވެ. ހިފާފައިވާ ހުޅަނގު އައްސޭރީގައި ގަވައިދާ ޚިލާފަށް ޔަހޫދީން ވަޒަންވެރި ކުރުވުމުގެ ކަންކަން ގެންދަނީ ސީދާ އޭނާގެ ބެއްލެވުމުގެ ދަށުންނެވެ. އޭނާ ތަކުރާރުކޮށް ވަނީ ހުޅަނގު އައްސޭރި އަކީ އިސްރާއީލުގެ ބައެއްގެ ގޮތުގައި ކަނޑައެޅުމަށް ގޮވާލައްވާފައެވެ.
