ޔުނައިޓެޑު އޮތީ ކޮންމެހެން މޮޅެއް ބޭނުންވެފައި: އަމޯރިމް

މެންޗެސްޓަރ ޔުނައިޓެޑު އޮތީ ކޮންމެހެން ވެސް މޮޅެއް ބޭނުންވެފައި ކަމަށް، އެ ޓީމަށް އިރުޝާދު ދެމުން އަންނަ ޕޯޗުގަލްގެ ރުބެމް އަމޯރިމް ބުނެފި އެވެ.

އޭނާ މިހެން ބުނީ ޔުއެފާ ޔޫރޮޕާ ލީގުގައި ރޭންޖާސްއާ ދެކޮޅަށް ކުޅެ، ޔުނައިޓެޑު މޮޅުވި މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުން މޮޅުވެ ޔުނައިޓެޑުން ވަނީ މުބާރާތުގެ ގަދަ 16 ވަނަ ބުރަށް ދިޔުމުގެ އުންމީދު ހޯދައިފަ އެވެ.

އެ މެޗަށްފަހު ވާހަކަ ދައްކަމުން އަމޯރިމް ބުނީ، ޔުނައިޓެޑުން މެޗު ފެށީ ވަރަށް ރަނގަޅަށް ކަމަށެވެ. ނަމަވެސް މެޗުގެ ވަކި ހިސާބަނުން ހެދުނު ގޯސްތަކެއްގެ ސަބަބުން، ޔުނައިޓެޑަށް މެޗުގެ ކޮންޓްރޯލް ގެއްލުނު ކަމަށް ވެސް އަމޯރިމް ބުންޏެވެ. އެހެން ނަަމަވެސް، ފަހުން އަނެއްކާ ވެސް އެކަން ރަނގަޅުކޮށް، ބޭނުންވި ގޮތުގައި މެޗު ނިންމާލެވުނު ކަމަށް ވެސް އަމޯރިމް ވަނީ ބުނެފަ އެވެ.

މީގެ އިތުރުން އަމޯރިމް ބުނީ، ޔުނައިޓެޑު ކުޅެމުން ދަނީ އެ ޓީމުގެ އެންމެ މޮޅު ކުޅުމުގައި ނޫން ކަމަށެވެ. އެހެން ނަމަވެސް، ރޭންޖާސް މެޗަށް ޓީމު ރަނގަޅަށް އެކުލަވާލެވުނު ކަމަށާއި، ކުޅުންތެރިންގެ ފަރާތުން ރަނގަޅު ރޫޙެއް ވެސް ފެނުނު ކަމަށް އޭނާ ދެކެ އެވެ. މެޗުގައި ބައެއް ކަންކަން ޔުނައިޓެޑުގެ އަތުން ދޫވެގެންދިޔަކަން ފާހަގަކޮށް އަމޯރިމް ބުނީ، އެފަދަ ދަނޑިވަޅުތަކަށް ސަމާލުކަަން ދެވިއްޖެ ނަަމަ، ރަނގަޅު ކަންތައްތަކެއް ކުރެވޭނެ ކަމަށެވެ.

އަމޯރިމް ބުނީ މެޗުގެ ނަތީޖާ އެއްވަރުވާން ދިޔަ ނަމަވެސް، ޔުނައިޓެޑަށް އެކަން ޙައްޤު ނޫން ކަމަށެވެ. އެ މެޗުން މޮޅުވުން ޔުނައިޓެޑަށް ޙައްޤުކަން ފާހަގަ ކުރަމުން އަމޯރިމް ބުނީ، އެ ޓީމު އޮތީ ވެސް މޮޅަކަށް ވަރަށް ބޮޑަށް ބޭނުންވެފައި ކަމަށެވެ. މޮޅާއެކު މިވަގުތަށް އޮތް ހަމަޖެހުމާއެކު، ކުރިއަށް ހުރި މެޗުތަަކަށް ތައްޔާރުވާނީ ފުރިހަމަ އަށް ކަމަށް ވެސް އަމޯރިމް ބުންޏެވެ.

ޔުނައިޓެޑުގެ ކޯޗުކަމާ އަމޯރިމް ހަވާލުވީ ފަހުން ވެސް އެ ޓީމުގެ ނަތީޖާތައް ދަށްވާތީ، އޭނާ އަށް އަންނަނީ ފާޑު ކިޔުންތައް އަމާޒުވަމުންނެވެ. އަދި އަމޯރިމް އަށް ޕްރެޝަރު ބޮޑުވަމުން އަންނަ ކަމަށް ވެސް މީޑިއާ ތަކުގައި ރިޕޯޓުކޮށްފައިވެ އެވެ.