އެއްބަސްވުމުގެ ދަށުން ހަމާސް އިން ފުރަތަމަ ތިން ރަހީނުން ދޫކޮށްލައިފި

ޣައްޒާ ހަނގުރާމަ ހުއްޓާލުމުގެ އެއްބަސްވުމާ އެއްގޮތައް ހަމާސް އިން ފުރަތަމަ ތިން ރަހީނުން ރެޑް ކްރޮސްއާ އާދިއްތަ ދުވަހު ހަވާލުކޮށްފިއެވެ.

ޓީވީން ވަގުތުން ދައްކަމުން ދިޔަ މަންޒަރުތަކުން ފެންނަނީ ތިން އަންހެން ރަހީނުން، ހަމާސްގެ ހަނގުރާމަވެރިން ގާޑު ކޮށްފައިވާ ވެހިކަލަކުން ނުކުމެ އިންޓަނޭޝަނަލް ކޮމިޓީ އޮފް ދަ ރެޑް ކްރޮސްގެ ވެހިކަލްތަކަށް އެރި މަންޒަރެވެ.

އިސްރާއީލުގެ ސިފައިންގެ ބަޔާނެއްގައި ބުނެފައިވަނީ ރެޑް ކްރޮސް އިން މި ތިން ރަހީނުން ހަވާލުކުރިކަން ޔަގީންކޮށްދީފައިވާ ކަމަށެވެ.

އިސްރާއީލުގެ އިސް ފަރާތަކުން ރޮއިޓަރސް އަށް ބުނެފައިވަނީ ރެޑް ކްރޮސްއިން ބުނެފައިވާ ގޮތުގައި މި ތިން އަންހެނުންގެ ސިއްހީ ހާލަތުވެސް ރަނގަޅު ކަމުގައެވެ.

އަނެއްކޮޅުން އިސްރާއީލުން ހިފާފައިވާ ހުޅަނގު އައްސޭރީ ގައި، އިސްރާއީލުގެ ބަންދުން ދޫކުރެވޭ ފަލަސްޠީނު މީހުން އުފުލުމަށް އުޅަނދުތައް ވަނީ ތައްޔާރުވެފައެވެ. ހަމާސް އިން ބުނެފައިވާ ގޮތުގައި ރަހީނުން މިނިވަން ކުރުމުން އޭގެ ބަދަލުގައި ދޫކުރެވޭ ފަލަސްތީނުު މީހުންގެ ފުރަތަމަ ގްރޫޕުގައި ހިމެނެނީ 69 އަންހެނުންނާއި 21 ޒުވާން ފިރިހެނުންނެވެ.

އިސްރާއީލާއި ހަމާސްއާ ދެމެދު 15 މަސްދުވަސް ވަންދެން ހިނގަމުންދިޔަ ހަނގުރާމައިގެ ފުރަތަމަ ފިޔަވެއްސަށް އަމަލީ ސިފަ ގެނެވުނީ ކުރިން އެއްބަސްވެފައިވާ ސުންގަނޑިއަށް ވުރެ ތިން ގަޑިއިރުގެ ލަސްވުމަކަށްފަހުގައެވެ. އެ ވަގުތުކޮޅުގެ ތެރޭގައި އިސްރާއީލުގެ ބާރުތަކުން ޣައްޒާއަށް ހަމަލާ ދިނުމުގެ ސަބަބުން 13 މީހުން ޝަހީދުވެފައިވާ ކަމަށް ފަލަސްޠީނުގެ ޞިއްޙީ އިދާރާތަކުން ބުނެފައިވެއެވެ.

މި އެއްބަސްވުމުގައި ހިމެނެނީ ހަނގުރާމަ ހުއްޓާލުމާއި، ޣައްޒާއަށް އެހީ ފޯރުކޮށް ދިނުމާއި، އަދި ފުރަތަމަ 6 ހަފްތާގެ ތެރޭގައި އަދިވެސް ޣައްޒާގައި ހިފަހައްޓާފައިވާ 98 ރަހީނުންގެ ތެރެއިން 33 މީހުން ދޫކޮށްލުމެވެ. މީގެ ބަދަލުގައި އިސްރާއީލުގެ ޖަލުތަކުގައި ތިބި އެތައް ސަތޭކަ ފަލަސްޠީނު މީހުން މިނިވަންވާނެއެވެ.