ޣައްޒާ ހަނގުރާމަ ހުއްޓާލުމަށް ވެފައިވާ އެއްބަސްވުމަށް އާދީއްތަ ދުވަހުގެ ހެނދުނު އަމަލީ ސިފަ އަންނާނެ: ގަތަރު

ޣައްޒާ ގައި އިސްރާއީލާއި ހަމާސްގެ މެދުގައި ހިނގަމުންދާ ހަނގުރާމަ ހުއްޓާލުމަށް ވީ އެއްބަސްވުމަށް އާދީއްތަ ދުވަހުގެ ހެނދުނު 8:30 (ގްރީންވިޗް މީން ޓައިމް 6:30) ގައި އަމަލީ ސިފަ އަންނާނެ ކަމަށް ގަތަރުގެ ފޮރިން މިނިސްޓްރީގެ ތަރުޖަމާނު އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި ހާމަކުރައްވައިފިއެވެ. 

"އަޅުގަނޑުމެން ދޭނެ ލަފަޔަކީ ރައްކާތެރިކަމުގެ ފިޔަވަޅުތައް އަޅައި، އެންމެ މަތީ ދަރަޖައިގެ ފަރުވާތެރިކަން ބަހައްޓައި، އަދި ރަސްމީ ފަރާތްތަކުން ދޭ އިރުޝާދުތަކަށް އިންތިޒާރުކުރުމަށެވެ،" މިނިސްޓްރީން ހޮނިހިރު ދުވަހު ބުނެފައިވެއެވެ. 

ހުކުރު ދުވަހުގެ ރޭގެ ފަހު ވަގުތެއްގައި، 460 ދުވަހަށް ވުރެ ގިނަ ދުވަހަށް ދެމިގެން ދިޔަ ހަނގުރާމައިގައި އިސްރާއީލުގެ ބާރުތަކުން 46,788 އަށް ވުރެ ގިނަ ފަލަސްތީނު މީހުން ޝަހީދުކޮށް، އަދި 110,453 މީހުން ޒަޚަމް ވެފައިވަނިކޮށް، ބެންޖަމިން ނެތަންޔާހޫގެ ކެބިނެޓުން ހަނގުރާމަ ހުއްޓާލުމުގެ އެއްބަސްވުމަށް ވަނީ ހުއްދަ ދީފައެވެ. 

ހަ ގަޑިއިރަށް ވުރެ ގިނަ ވަގުތު ހޭދަވި ބައްދަލުވުމަކަށްފަހު ހަނގުރާމަ ހުއްޓާލުމުގެ އެއްބަސްވުން އިސްރާއީލުގެ ސަރުކާރުން ތަސްދީގުކޮށްފައިވާކަމަށް ނަތަންޔާހޫގެ އޮފީހުން ހޮނިހިރު ދުވަހުގެ ފަތިހު ނެރުނު ކުރު ބަޔާނެއްގައި ބުނެފައިވެއެވެ.