ހަނގުރާމަ ހުއްޓާލާ އެއްބަސްވުމުގެ އިއުލާނު ކުރި ފަހުން 101 މީހުން ޝަހީދު ކޮށްލައިފި

އާދީއްތަ ދުވަހު ތަންފީޒު ކުރަން އެއްބަސްވި ހަނގުރާމަ ހުއްޓާލުމުގެ އެއްބަސްވުން އިއުލާނު ކުރިފަހުން އިސްރާއީލުން ޣައްޒާއަށް ދިން ހަމަލާތަކުގައި މަދުވެގެން 101 ފަލަސްތީނު މީހުން ޝަހީދުވެއްޖެއެވެ. މީގެ ތެރޭގައި 27 ކުދިންނާއި 31 އަންހެނުން ހިމެނެއެވެ. މިއީ ފަލަސްތީނުގެ މަދަނީ ދިފާއީ އިދާރާ އިން އާންމުކޮށްފައިވާ މައުލޫމާތެވެ.

ރިޕޯޓުތަކުގައިވާ ގޮތުން، ހަނގުރާމަ ހުއްޓާލުމުގެ އެއްބަސްވުމާ ބެހޭ ގޮތުން އިސްރާއީލުގެ ކެބިނެޓް ހުކުރު ދުވަހު  ބައްދަލު ކުރާނެއެވެ.

ނަތަންޔާހޫގެ ކެބިނެޓުން އެއްބަސްވުން ފާސް ކުރަން ޖެހޭއިރު ކެބިނެޓުގައި ހިމެނޭ ހައްދުފަހަނައަޅާފައިވާ ކަނާތުފިޔައިގެ ފިކުރުގެ ދެ ވަޒީރަކު ވަނީ އެއްބަސްވުން ފާސްކޮށްފިނަމަ ނަތަންޔާހޫގެ ކެބިނެޓުން އިސްތިއުފާ ދޭނެ ކަމަށް ބުނެ ބިރު ދައްކާފައެވެ.

އިސްރާއީލުން ޣައްޒާގައި ކުރަމުންދާ ހަނގުރާމައިގައި، 7 އޮކްޓޯބަރު 2023 އިން ފެށިގެން މަދުވެގެން 46,788 ފަލަސްޠީނުން ޝަހީދުވެ، 110,453 މީހުން ޒަޚަމްވެފައިވެއެވެ.