މޫސުން ގޯސްވެ އިދާރާތައް ތައްޔާރީ ހާލަތަށް
13 ޖެނުއަރީ 2025 | ހޯމަ 06:58ފެންބޮޑުވާ ތަންތަނުގައި ވެލި ބަސްތާ ޖެހުމަށް ބޭނުންވާ ގޯނި ފަދަ ތަކެތި ފޯރުކޮށްދީފައިވާ ކަމަށް އިދާރާތަކުން ބުނޭ
2025 ޖެނުއަރީ 13 - މޫސުމާއި ގުޅޭ މައުލޫމާތު ދިނުމަށް އިދާރާތަކުން ބޭއްވި ނޫސްވެރިންގެ ބައްދަލުވުން
ރާއްޖޭގެ މޫސުން ގޯސްވެ އެމަރޖެންސީ އޮޕަރޭޝަން އެކްޓިވޭޓްކޮށް, އިދާރާތައް ތައްޔާރީ ހާލަތަށް ގެނެސްފައިވާކަން އިދާރާތަކުން ހާމަކޮށްފިއެވެ.
އެކަން ހާމަކޮށްފައި ވަނީ ހޯމަ ދުވަހު މެންދުރު ބޭއްވި ނޫސްވެރިންގެ ބައްދަލުވުމެއްގައެވެ.
އެ ނޫސްވެރިންގެ ބައްދަލުވުމުގައި ނޭޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭގެ ޗީފް އެގްޒެކެޓިވް ހިސާން ޙަސަން ވިދާޅުވީ މޫސުން ގޯސްވުމުގެ ސަބަބުން އެމަރޖެންސީ އޮޕަރޭޝަންސް އެކްޓިވޭޓްކޮށްފައިވާ ކަމަށެވެ. ރާއްޖޭގެ ހުރިހާ ސަރަހައްދެއްގައި ކަމާއި ގުޅުން ހުރި ފަރާތްތައް ވާން ޖެހޭ ތައްޔާރީތައް ވަމުންދާ ކަމަށާއި ފެންބޮޑުވާ ތަންތަނުގައި ވެލި ބަސްތާ ޖެހުމަށް ބޭނުންވާ ގޯނި ފަދަ ތަކެތި ފޯރުކޮށްދީފައިވާ ކަމަށް އޭނާ ވިދާޅުވިއެވެ. އަދި އާއްމުކޮށް ފެންބޮޑުވާ ސަރަހައްދުތަކުގެ ތެރެއިން މާލޭގައި 57 އަށް ވުރެ ގިނަ ތަނުގައި ވެލި ބަސްތާ ޖަހާފައިވާ ކަަމަށް އޭނާ ވިދާޅުވިއެވެ. އެއީ އާއްމުކޮށް ފެންބޮޑުވާކަމުގެ މައުލޫމާތު ލިބޭ ތަންތަން ކަމަށާއި އިތުރަށް ވެލިބަސްތާ ޖަހަން ޖެހޭ ތަންތަނުގައި ވެލި ބަސްތާ ޖެހުމުގެ މަސައްކަތް ކުރަމުންދާ ކަމަށް ވެސް ހިސާން ވަނީ ވިދާޅުވެފައެވެ. އެ ތަންތަނުގައި ވެލި ބަސްތާ ޖަހާފަިއ ވަނީ މާލެ ސިޓީ ކައުންސިލުގެ ބޮޑެތި އެހީތެރިކަމަކާއި ކަމަށާއި އިތުރު ތަންތަނުގައި ވެލި ބަސްތާޖެހުމުގެ މަސައްކަތް މިހާރުވެސް ކުރިއަށްދާ ކަަމަށް އޭނާ ވިދާޅުވިއެވެ.
މޫސުމާ ބެހޭ ޤައުމީ އިދާރާއިން ބުނެފައިވާ ގޮތުގައި ރާއްޖޭގެ ހުޅަނގު ދެކުނުން އުފެދިފައިވާ ކޮޅިގަނޑު ހުޅަނގަށް ޖެހި، ރާއްޖެ ސަރަޙައްދުގައި ބޯ ވިއްސާރަ ވިލާ އުފެދުމުގެ ފުރުޞަތު ބޮޑެވެ. އެހެންކަމުން މާދަމާއިން ފެށިގެން މި ހަފްތާގެ ހޮނިހިރު ދުވަހުގެ ނިޔަލަށް ރާއްޖޭގެ ބޮޑު ބަޔަކަށް ވިއްސާރަކުރާނެކަމަށް ވަނީ ލަފާކޮށްފައެވެ. އެހެންކަމަށް ވާއިރު ކަމާއި ގުޅުން ހުރި އިދާރާތަކުން ދޭ އިރުޝާދުތައް ބަލާ އެ އިރުޝާދުތަކަށް އެއްބާރުލުން ދިނުމުގެ މުހިންމުކަމަށް އޭނާ ވަނީ އިލްތިމާސްކުރައްވާފައެވެ. އޭނާ ވަީ ވިޔަފާރިތައް ބަންދުކޮށްފައި ހުންނަ ވަގުތުތަކުގައި ވެސް އެ ތަންތަނަށް ފެން ނުވަންނާނެ ފަދައިން ރައްކާތެރިކަމުގެ ފިޔަވަޅު ވީ ވަރަކުން އެޅުން މުހިންމު ކަމަށް އޭނާ ވިދާޅުވިއެވެ. އަދި ވައި ގަދަވެ އުދަ އަރާނެ ކަމަށް ލަފާކުރެވޭތީ އެކަމަށް ސަމާލުވުމަށް ވެސް ވަނީ އިލްތިމާސްކުރައްވާފައެވެ. އެގޮތުން ދަނޑުވެރިކަން ކުރާ ފަރާތްތަކާއި، ވަޔާއި އެއްލާލަފާނެ ފަދަ އެއްޗެހި ހުރި ތަންތަނުގައި ރައްކާތެރިކަން އިތުރުކުރުމަށް އޭނާ ވަނީ އިރުޝާދު ދެއްވާފައެވެ.
ފުލުހުންނާއި ސިފައިންވެސް ތިބީ މޫސުން ގޯސްވުމުގެ ސަބަބުން ދިމާވެދާނެ ކަމަށް ތައްޔާރުވެގެން ކަމަށް އެ އިދާރާތަކުން ވަނީ ހާމަކޮށްފައެވެ. އެގޮތުން މޫސުމުގެ އަސަރުކޮށް، ފެންބޮޑުވުމާއި ރާޅު އެރުމުގެ އަސަރުކޮށްފާނެ ކަަމަށް ބެލެވޭ ސަރަހައްދުތަކަށް އެހީތެރިކަން ފޯރުކޮށްދިނުމަށް ސިފައިންނާއި ފުލުހުން ތައްޔާރަށް ތިބި ކަމަށް އެ އިދާރާތަކުން ވަނީ ފާހަގަކޮށްފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ ވިދާޅުވީ މޫސުން ގޯސްވާނެ ކަމަށް ލަފާކުރެވޭތީ ސިފައިންނާއި ފުލުހުންގެ ޖޮއިންޓް އޮޕަރޭޝަނެއް އެކުލަވާލާ އެ އޮޕަރޭޝަންގެ މައިމަރުކަޒު ބަންޑާރަކޮށީގައި ޤާއިމްކޮށްފައިވާ ކަމަށެވެ. ހިލްމީ ވިދާޅުވީ މޫސުމާއި ގުޅިގެން އެހީތެރިކަން ފޯރުކޮށްދިނުމަށް ފުރިހަމައަށް ތައްޔާރުވެފައިވާ ކަމަށެވެ. އެގޮތުން ރާއްޖެގެ ހަތަރު ހާލަތެއްގައި ޓާސްކްފޯސްތައް ޤާއިމްކޮށްފައިވާކަމަށް އޭނާ ވިދާޅުވިއެވެ. ހަމައެހެންމެ މާލޭގެ ތިން ސަރަހައްދަކުން ވެލިބަސްތާ ލިބޭނެ އިންތިޒާމް ހަމަޖައްސާފައިވާ ކަަމަށް ހިލްމީ ވިދާޅުވިއެވެ. އޭގެ ތެރޭގައި ހިމެނެނީ ކުޑަކުދިންގެ ބަގީޗާ، ސަލްމާން މިސްކިތް ކައިރި ސަރަހައްދުގެ އިތުރުން އަދި ރަސްފަންނު ސަރަހައްދެވެ. އޭނާ ވިދާޅުވީ ސިފައިން ތިބީ 24 ގަޑި އިރު މޫސުމާއި ގުޅިގެން ދިމާވާ ކަންކަމަށް އެޓެންޑުވުމަށް ތައްޔާރަށް ކަމަށެވެ.
ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ މޫސުން ގޯސްވުމުގެ ސަބަބުން ލިބޭ ގެއްލުން ކުޑަކުރުމަށް ތައްޔާރުވެފައިވާ ކަމަށެވެ. އެގޮތުން ފުލުހުންގެ ޚިދުމަތް ނެތް ރަށްރަށުގައި ވެސް ދިމާވެދާނެ ހާލަތަކަށް ތައްޔާރުވެ ކައުންސިލްތަކާއި އެކު މަސައްކަތް ކުރަމުންދާ ކަމަށް ޝުޖާއު ވިދާޅުވިއެވެ. އަދި މާލެ ސަރަހައްދުގައި ފެންބޮޑުވާ ސަރަހައްދުތަކުގައި އުޅަނދު ދުއްވުމަކީ އެހެން އާއްމުންނަށް ވެސް ގެއްލުންވާނެ ކަމަކަށް ވާތީ އެފަދަ މަގުތައް ބަންދުކުރާނެ ކަމަށް ޝުޖާއު ވިދާޅުވިއެވެ. މާލޭގައި ފެންބޮޑުވާ ސަރަހައްދުތަކުގެ އާއްމުންނަށް އެހީތެރިކަން ފޯރުކޮށްދިނުމަށް 24 ގަޑި އިރު ފުލުހުން ހަރަކާތްތެރިވާނެ ކަމަށާއި އެ އިންތިޒާމްތައް ވަނީ ހަމަޖެހިފައި ކަމަށް ޝުޖާއު ވަނީ ވިދާޅުވެފައެވެ.
ޖެނުއަރީ 13 ން 18 ށް ރާއްޖޭގެ ބޮޑު ބަޔަކަށް މޫސުން ވަރަށް ގޯސް ވާނެ ކަމަށް ލަފާ ކުރެވޭތީ ލިބިދާނެ ގެއްލުންތަކުން ދުރާލާ ރައްކައުތެރިވުމަށް އެންޑީއެމްއޭ އިން ވަނީ އިލްތިމާސްކޮށް ފައެވެ. އަދި އެންޑީއެމްއޭގެ ހޮޓްލައިން 115 އަށް ގުޅައިގެން މޫސުމުގެ ސަބަބުން ލިބޭ ގެއްލުން ރިޕޯޓްކުރުމަށާއި އެހީ ހޯދުމުގެ އިންތިޒާމް ވަނީ ހަމަޖެހިފައެވެ.
ޤައުމީ މޫސުމާބެހޭ އިދާރާއިން ލަފާކުރާ ގޮތުގައި، ދިވެހިރާއްޖޭގެ އިރުން ބަންގާޅު ކަނޑުގެ ދެކުނު-ހުޅަނގު ސަރަޙައްދުގައި އުފެދިފައިވާ ކޮޅިގަނޑު ހުޅަނގަށް ޖެހިގެން ދާނެކަމަށް ބެލެވެއެވެ. މިކަމުގެ ސަބަބުން ޖަނަވަރީ 13 އިން 18 އާ ދެމެދު ރާއްޖޭގެ ބޮޑު ބަޔަކަށް، ގުގުރާ އަދި ވިއްސާރަވެދާނެ ކަމަށް މެޓުން ވަނީ ބުނެފައެވެ. އަދި މީގެ ސަބަބުން ވައި ގަދަވެ، ކަނޑު ގަދަވެ، އަދި ބައެއް ރަށްތަކަށް ރާޅު އަރާފާނެ ކަމަށް ބެލެވެއެވެ.
