މެކްއަޓީގެ ހެޓްރިކާ އެކު ބޮޑު މޮޅެއް ހޯދައި، ސިޓީ އަނެއް ބުރަށް

އިނގިރޭސި އެފްއޭ ކަޕްގެ ތިން ވަނަ ބުރުގައި ސަލްފޯޑް ސިޓީ އަތުން ބޮޑު މޮޅެއް ހޯދައި، މެންޗެސްޓަރ ސިޓީން މުބާރާތުގެ އަނެއް ބުރުން ޖާގަ ހޯދައިފި އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 8-0 އިންނެވެ. މެޗުގެ ފުރަތަމަ ހާފުގައި ސިޓީން ތިން ލަނޑު ޖެހިއިރު، އަނެއް ފަސް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން އަށް ވަނަ މިނެޓުގައި ޖެރެމީ ޑޮކޫ ވަނީ ލަނޑު ޖަހައި ސިޓީ އަށް ކުރި ހޯދައިދީފަ އެވެ. އޭގެ ފަހުން މެޗުގެ 20 ވަނަ މިނެޓުގައި ޑިވިން މުބާމާ ވަނީ ސިޓީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ފުރަތަމަ ހާފު ނިމުމުގެ ކުރިން ސިޓީގެ ތިން ވަނަ ލަނޑެއް ޖަހައި، އިތުރަށް ލީޑު ފުޅާ ކޮށްދިނީ ނިކޯ އޯރެއިލީ އެވެ.

މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި ސިޓީ އަށް ލިބުނު ޕެނަލްޓީ ކާމިޔާބުކޮށް، އެ ޓީމުގެ ހަތަރު ވަނަ ލަނޑު ޖެހީ ޖެކް ގްރީލީޝް އެވެ. އޭގެ ފަހުން މެޗުގެ 62 ވަނަ މިނެޓުގައި ޖޭމްސް މެކްއަޓީ ވަނީ ސިޓީގެ ފަސް ވަނަ ލަނޑު ޖަހައިފަ އެވެ. އޭގެ ހަތް މިނެޓު ފަހުން ސިޓީ އަށް ލިބުނު ޕެނަލްޓީ ކާމިޔާބުކޮށް ހަ ވަނަ ލަނޑު ޖެހީ ޑޮކޫ އެވެ. މެޗުގައި ސިޓީގެ ފަހު ދެ ލަނޑު ޖަހައި މެކްއަޓީ ވަނީ މެޗުގައި އޭނާގެ ހެޓްރިކް ހަމަކޮށްފަ އެވެ.

މެންޗެސްޓަރ ސިޓީން ވަނީ ހަތް ފަހަރެއްގެ މަތިން އެފްއޭ ކަޕް ކާމިޔާބު ކޮށްފަ އެވެ. މިދިޔަ އަހަރު އޮތް އެފްއޭ ކަޕްގެ ފައިނަލްގައި ސިޓީ ބަލިވެފައި ވަނީ ވާދަވެރި މެންޗެސްޓަރ ޔުނައިޓެޑު އަތުންނެވެ.