ލޮސް އެންޖެލެސްގެ ގައި ފެތުރެމުންދާ އަލިފާނުން 5،000 ށް ވުރެ ގިނަ އިމާރާތް އަނދާ ހުލިވެއްޖެ!

އެމެރިކާގެ ލޮސް އެންޖެލެސް ސަރަޙައްދުގައި ރޯވެ ފެތުރެމުން ދިޔަ އަލިފާނުގެ ހާދިސާގައި މަދުވެގެން 10 މީހުން މަރުވެ، ގިނަ އަދެއްގެ ގެދޮރާއި އިމާރާތް އަނދައިގެން ގޮސްފައިވާކަމަށް ސަރަޙައްދުގެ އޮފިޝަލުން ބުނެފިއެވެ.

މި ދެ ހާދިސާ ހިނގަމުންދަނިކޮށް، ތިންވަނަ ސަރަހައްދެއްގައި އަލިފާންގަނޑެއް ރޯވެ ފެތުރެން ވަނީ ފަށާފައެވެ. އެއާއެކު އިތުރު އެތައް ހާސް މީހުން ސަލާމަތްކުރަން ވަނީ ޖެހިފައެވެ.

އެންމެ ފަހުން ހިނގި ހާދިސާ ގައި ބުރާސްފަތި ދުވަހުގެ މެންދުރުފަހު ރޯވެ އަނދަން ފެށީ ވެސްޓް ހިލްސް ސަރަޙައްދުގައެވެ. ތިންވަނަ އަލިފާންގަނޑު ފެތުރެން ފެށިއިރު ޕެލިސޭޑްސް އަދި އީޓަން ގައި ރޯވި އަލިފާންގަނޑު ކޮންޓްރޯލްކުރުމަށް އަލިފާން ނިއްވާ ފަރާތްތައް ހުއްޓުމެއް ނެތި ދަނީ މަސައްކަތް ކުރަމުންނެވެ.

"ވައި ބާރު ވުމާ ގުޅިގެން މި އަލިފާންގަނޑު އަވަހަށް ފެތުރިގެންދާނެ ކަމަށް ލަފާކުރެވޭ،" ލޮސް އެންޖެލެސްގެ މޭޔަރު ކެރެން ބާސް ވިދާޅުވިއެވެ.

ރެޔާ ހަމައަށް މަރުވި މީހުންގެ އަދަދު 10 އަށް އަރާފައިވާ ކަމަށް ލޮސް އެންޖެލެސް ކައުންޓީގެ މެޑިކަލް އެގްޒެމިނަރ ޑިޕާޓްމަންޓުން ބުނެފައިވެއެވެ. މީގެ ކުރިން އިއުލާނު ކޮށްފައިވަނީ މި ހާދިސާގައި 7 މީހުން މަރުވި ކަމަށެވެ.

ޕެލިސޭޑްސް އަދި އީޓަން ގައި ރޯވި އަލިފާންގަނޑުގެ ސަބަބުން 5،000 އަށްވުރެ ގިނަ އިމާރާތް ވަކިވަކިން އަނދައިގެން ގޮސްފައިވާކަން އޮފިޝަލުން ވަނީ ކަށަވަރުކޮށްދީފައެވެ. މީގެ ތެރޭގައި ގެދޮރުގެ އިތުރުން ގުދަން ފަދަ އެހެނިހެން ތަންތަންވެސް ހިމެނެއެވެ. ގިނަ އަދަދެއްގެ ވެހިކަލްތައް ވެސް ވަނީ އަނދާ އަޅިޔަށް ވެފައެވެ.

މި ދެ އަލިފާނުގެ ހާދިސާއިން ޖުމްލަ 30،000 އޭކަރ (12،000 ހެކްޓަރ) އަށްވުރެ ބޮޑު ބިން އަނދައިގެން ގޮސްފައިވާކަމަށް ސްޓޭޓްގެ ވައިލްޑް ފަޔަރ އޭޖެންސީ ކެލް ފަޔަރ އިން ބުނެފައިވެއެވެ.

ލޮސް އެންޖެލެސް ކައުންޓީގެ ޝެރިފް ރޮބަޓް ލޫނާ ވިދާޅުވި ގޮތުގައި، 179,783 މީހުން ވަނީ އެ ސަރަޙައްދު ދޫކޮށް ދިއުމުގެ އަމުރުގެ ދަށުގައެވެ.

އެން.ބީ.ސީ ނިއުސް އިން ރިޕޯޓުކުރި ގޮތުގައި، ޖޭ.ޕީ މޯގަންގެ އިންޝުއަރެންސް އިން ހެދި ދިރާސާއަކުން ދައްކާ ގޮތުގައި، މި އަލިފާނުގެ ސަބަބުން ލިބޭ ގެއްލުމުގެ އަގު 10 ބިލިއަން އެމެރިކާ ޑޮލަރަށް ވުރެ އިތުރުވެދާނެއެވެ.