ވަޒީފާގެ އެއްބަސްވުމަކީ ހަމައެކަނި މުސާރަ ލިބިގަތުމަށްޓަކައި ވެވޭ އެއްބަސްވުމަކަށް ނުހެދުމަށް ހުކުރު ހުތުބާގައި ގޮވާލައިފި
މުވައްޒަފުގެ ސަލާމަތާއި ރައްކާތެރިކަމަށް ސަމާލުވެ، ކަނޑައެޅިފައިވާ މުސާރައާއި އިނާޔަތްތައް ޤަވާއިދުން ދިނުމަށް ގޮވާލާފައިވޭ
ހުކުރު ނަމާދުގެ ތެރެއިން
ވަޒީފާގެ އެއްބަސްވުމަކީ ހަމައެކަނި މުސާރަ ލިބިގަތުމަށް ޓަކައި ވެވޭ އެއްބަސްވުމަކަށް ނުހެދުމަށް ހުކުރު ހުތުބާގައި ގޮވާލައިފިއެވެ.
ރާއްޖޭގެ އެކި ކަންކޮޅުތަކުގައި އިއްވި ހުކުރު ހުތުބާ އިއްވާފައިވަނީ މަސައްކަތުގެ އަހުލާގާއި ގުޅޭގޮތުންނެވެ. ހުތުބާގައި ބުނެފައިވަނީ އިސްލާމީ ޝަރީޢަތުގެ ހުރިހާ ތަނބުތައް އޮފުދާރުކޮށްދެނީ މަތިވެރި އަޚްލާޤާއި ރިވެތި ސިފަތަކުންނެވެ. އުންމަތެއް ހެޔޮ އުންމަތަކަށް ވަނީ އެއުންމަތުގެ އަޚްލާޤީ ފޭރާން ތާހިރުވެގެންނެވެ. މަތިވެރި އަޚްލާޤަކީ އިސްލާމީ ޢަޤީދާގެ އެންމެ މުހިއްމު އަސާސެވެ. އަޅުކަމުގެ ބިންގަލުކަމަށް ހުތުބާފައި ބުނެފައިވެއެވެ. އަދި އަޅުކަން ބިނާވެފައި ވަނީ ޢިބާދާތާއި މުޢާމަލާތުގެ މައްޗަށް ކަމަށާއި، ޢިބާދާތާއި މުޢާމަލާތު ވަނީ ގުޅި ލާމެހިފައި ކަމަށާއި، މާތް ﷲ އަށް އަޅުކަން ކުރުމަށްފަހު ދުނިޔަވީ ޙަޔާތުގެ އެކި މުޢާމަލާތްތައް ކުރުމަށް ބިމުގައި ފެތުރިގަތުމަށް މާތް ﷲ އަންގަވާފައިވާ ކަމަށް ހުކުރު ހުތުބާފައި ބުނެފައިވެއެވެ.
މުޖުތަމަޢުގައި ހިމެނޭ ގިންތިތަކުގެ ތެރެއިން މުވައްޒަފުންނަކީ އެންމެ މަތިވެރި ސުލޫކުން އެންމެ ފުރިހަމައަށް ޒީނަތްތެރިވާންޖެހޭ މީހުން ކަމަށް ހުކުރު ހުތުބާގައި ބުނެފައިވެއެވެ. އަދި ވަޒީފާގެ މައިދާނުން ރިވެތި މާތް އަޚްލާޤީ ސިފަތައް ފެންނަންޖެހޭ ކަމަށް ބުނެފައިވެއެވެ. އަދި ކޮންމެ މުވައްޒަފަކީ އޭނާ ވާ ކޮންމެ ތަނެއްގައި އޭނާ ހެއްދެވި މަޤުޞަދު މަތިން ހަނދާންކޮށް އެމަޤުޞަދު ޙާޞިލުކުރުމަށް މަސައްކަތް ކުރަންޖެހޭނޭ މީހެއް ކަމަށް ހުތުބާގައި ވަނީ ބުނެފައެވެ.
ވަޒީފާގެ އެއްބަސްވުމަކީ ހަމައެކަނި މުސާރަ ލިބިގަތުމަށް ޓަކައި ވެވޭ އެއްބަސްވުމަކަށް ނުހެދުމަށް ހުތުބާގައި ވަނީ ގޮވާލާފައެވެ. އަދި ސޮއިކުރާ ޢަޤުދަކީ އޮފީސް ވަތްގަނޑުގައި ބާއްވާލުމަށް ކުރަހައިލެވޭ ތަޞްވީރަކަށް ނެހެދުމަށާއި، އެހެނީ، ވަޒީފާ ބަޔާނަކީ ޚިދުމަތް ފޯރުކޮށް ދިނުމަށް ހިފޭ ޢަހުދު ކަށަވަރެއް ކަމަށް ހުތުބާގައި ވަނީ ބުނެފައެވެ.
ހުތުބާގައި ބުނެފައިވަނީ އޮފީހުގެ ކަރަންޓާއި ފެނަކީ ވެސް އަމާނާތެއް ކަމަށާއި، ފޯނާއި ކަރުދާހާ ދެއްޔަކީވެސް އަމާނާތެއް ކަމަށެވެ. އޮފީހުގެ މެޝިނަރީތަކަކީވެސް އަމާނާތެއް ކަމަށާއި، ވަޒީފާއަށް ކަނޑައެޅިފައިވާ ވަގުތަކީ ވެސް އަމާނާތެއް ކަމަށެވެ. އަދި މުއައްސަސާގެ މުހިއްމު މަސައްކަތްތަކާ ގުޅޭ ވަޒީފާގެ ސިއްރުތައް ހިފެހެއްޓުމަކީވެސް އަމާނާތަކަށް ވާއިރު، މި އަމާނާތްތަކަށް ރައްކާތެރިވުމަށް ހުތުބާގައި ވަނީ ގޮވާލާފައެވެ.
އަދި ވަޒީފާގެ މުހިއްމު ވަގުތުތައް އޮފީހުން ބޭރުގައި އަމިއްލަ ކަންކަމަށް ހޭދަކުރާއިރު، ޙަވާލުވި އަމާނާތުގެ މަތިން ހަނދުމަކުރުމަށް ގޮވާލާފައިވެއެވެ. އޮފީހުގެ ތަކެތި ނަހަމަ ގޮތުގައި ބޭނުން ކުރާއިރު، މާތް ﷲ ބައްލަވައިވޮޑިގެންވާކަން ހަނދުމަކުރުމަށާއި، އޮފީހުގެ ސިއްރުތައް މީސްމީޑިއާގެ މަންސަތަކުގައި ފަތުރާއިރު، ފަހުން ހިތާމަކުރަންޖެހޭނެކަން ވެސް ހަނދުމަކުރުމަށް ވަނީ ހުތުބާގައި ބުނެފައެވެ.
މީގެ އިތުރުން މުވައްޒަފުގެ މައްޗަށް ވާޖިބުތަކެއްވާ ފަދައިން ވަޒީފާ ދޭ ފަރާތުގެ މައްޗަށްވާ ޙައްޤުތަކެއްވާ ކަމަށާއި، މުވައްޒަފުގެ ސަލާމަތާއި ރައްކާތެރިކަމަށް ސަމާލުވެ، ކަނޑައެޅިފައިވާ މުސާރައާއި އިނާޔަތްތައް ޤަވާއިދުން ދިނުމަށް ވަނީ ގޮވާލާފައެވެ. އަދި ވަޒީފާގެ އުޞޫލުތަކުގެ ތެރެއިން ދޭންޖެހޭ ޗުއްޓީއާއި ހުސްވަގުތު ދީ، މުވައްޒަފުންގެ މެދުގައި ޢަދުލުއިންޞާފު ޤާއިމުކޮށް، އޯގާތެރިކަމާއެކު މުޢާމަލާތު ކުރަންޖެހޭނެ ކަމަށް ހުތުބާގައި ބުނެފައިވެއެވެ.
