ޣައްޒާ ގައި ބަނޑުހައިހޫނުކަމުގެ ހާލަތު އިތުރަށް ގޯސްވަމުންދާކަމަށް އދ. އިން އިންޒާރު ކޮށްފި

އދ. ގެ އިންސާނީ އެހީތެރިކަމާ ބެހޭ ކަންކަން ވިލަރެސްކުރާ އޮފީސް ކަމުގައިވާ ޔުނައިޓެޑް ނޭޝަންސް އޮފީސް ފޯ ދަ ކޯޑިނޭޝަން އޮފް ހިއުމެނިޓޭރިއަން އެފެއާޒް (އޯޗާ) އިން ބުރާސްފަތި ދުވަހު އިންޒާރު ދީފައިވާ ގޮތުގައި ޣައްޒާގައި ބަނޑުހައިހޫނުކަމުގެ ހާލަތު ދަނީ އިތުރަށް ގޯސްވަމުންނެވެ.

ހާލަތު އިތުރަށް ގޯސްވަމުންދަނީ ބޭނުންވާ ތަކެތީގެ މަދުވުމާއި، ވަސީލަތްތައް ޣައްޒާ އަށް އެތެރެ ކުރުމަށް އިސްރާއީލުން ކުރިމަތިކޮށްފައިވާ ހަރުކަށި ހުރަސްތަކާއި އަދި ހަތިޔާރުއެޅި ގްރޫޕް ތަކުން އެހީގެ ތަކެތި ވަގަށް ނެގުމުގެ މައްސަލަ އިތުރުވެފައިވާތީ ކަމަށް އެފަރާތުން ބުނެއެވެ.

އޯޗާގެ ރިޕޯޓުގައި ބަޔާންކޮށްފައިވާ ގޮތުގައި، ޣައްޒާގެ މެދުތެރޭ ސަރަހައްދުން ތަކެތީގެ ހުރިހާ ސްޓޮކެއް އާދީއްތަ ދުވަހު ވަނީ ހުސްވެފައެވެ. އަދި ހަމައެއާއެކު، ޣައްޒާ ވާދީގެ ދެކުނަށް ކާނާގެ އެހީ ފޯރުކޮށްދިނުމަށް ހުޅަނގުގައި އޮންނަ އެރެޒް ޗެކްޕޮއިންޓް ތެރެއިން ތަކެތި ގެންދިއުމުގެ ހުއްދަ ދިނުން އިސްރާއީލު ސަރުކާރުން ވަނީ ހުއްޓާލާފައެވެ. 

މި ރިޕޯޓުގައި އިތުރަށް ފާހަގަކޮށްފައިވަނީ ޣައްޒާގެ އާބާދީއަށް ތިން މަސް ދުވަހަށް ބޭނުންވާ ގާތްގަނޑަކަށް 120،000 މެޓްރިކް ޓަނުގެ ކާނާގެ އެހީ ސަރަހައްދުން ބޭރުގައި ހިފެހެއްޓިފައިވާކަމަށެވެ. 

އިންސާނީ އެހީތެރިކަމުގެ ބައިވެރިން އިންޒާރުދެމުންދަނީ އިތުރު ސަޕްލައި ފޯރުކޮށްނުދެވިއްޖެނަމަ، ބަނޑުހައިހޫނު ކަމުގައި ތިބި އާއިލާތަކަށް ކާނާގެ ޕާރުސަލްތައް ބެހުން ވަރަށް ބޮޑަށް މަދުވެގެންދާނެކަމަށެވެ. މެދު އަދި ދެކުނު ޣައްޒާގައި ދުވާލަކު 200،000 އަށްވުރެ ގިނަ ޕާރުސަލު ފޯރުކޮށްދޭ 50 އަށްވުރެ ގިނަ ކޮމިއުނިޓީ ބަދިގެ ކުރިއަށް އޮތް ދުވަސްތަކުގައި ބަންދުވުމުގެ ބިރު އެބައޮތެވެ.

ވޯލްޑް ފުޑް ޕްރޮގްރާމް (ޑަބްލިއުއެފްޕީ) އިން ރިޕޯޓުކޮށްފައިވާ ގޮތުގައި، ހޯމަ ދުވަހާ ހަމައަށް، ކާބޯތަކެތީގެ އެހީ ފޯރުކޮށްދިނުމަށް އެފަރާތުން ހިންގާ 20 ބޭކަރީގެ ތެރެއިން މިހާރު މަސައްކަތް ކުރަނީ ހަމައެކަނި 5 ބޭކަރީ ކަމަށެވެ. މިތަންތަން މަސައްކަތް ކުރުން ބިނާ ވެފައި އޮންނަނީ، އެތަންތާނގެ ޖަނަރޭޓަރުތައް ހިންގުމަށް ދެކުނު ޣައްޒާ އިން ފޯރުކޮށްދޭ ތެލުގެ އެހީ ގެ މައްޗަށެވެ.

އޯޗާއިން އިތުރަށް އިންޒާރުދީފައިވަނީ ޖެނެރޭޓަރުތައް ހިންގުމަށް ބޭނުންވާ ތެލުގެ ދަތިކަމުގެ ސަބަބުން ޣައްޒާގެ ކުރިންވެސް ވީރާނާވެފައިވާ ސިއްހީ ނިޒާމަށް އިތުރު ގެއްލުން ލިބެމުންދާކަމަށާއި، މިކަމުގެ ސަބަބުން ބަލިމީހުންގެ ފުރާނައަށް ނުރައްކާވެފައިވާކަމަށެވެ. އުތުރު ޣައްޒާއަށް ދެމުންދާ ހަމަލާތަކުގެ ސަބަބުން އެތަނުގައި ދިރިއުޅޭ މީހުންނަށް ސިއްހީ ޚިދުމަތްތައް ފޯރުކޮށްދިނުމަށް ބޮޑެތި ދަތިތަކާ ކުރިމަތިވެފައިވެއެވެ. އުތުރު ޣައްޒާގައި މިހާރު ކުޑަކޮށްވެސް މަސައްކަތްކުރަމުންދާ ހަމައެކަނި ހޮސްޕިޓަލްކަމުގައިވާ ޖަބާލިޔާގެ އަލް-އަވްދާ ހޮސްޕިޓަލަށް ވަދެ ނިކުމެ ހެދުމަށް އިސްރާއީލުން ވަނީ ބޮޑެތި ހުރަސްތަކެއް ކުރިމަތި ކޮށްފައެވެ.

މީގެ އިތުރުން، އދ. އިން އުތުރު ޣައްޒާއަށް ޒިޔާރަތް ކުރުމަށް ކުރަމުންދާ މަސައްކަތްތަކަށް ހުރަސް އަޅާ އދ. ޓީމަށް ބޭނުންވާ ހުއްދަ ދިނުމަށް އިސްރާއީލުން ވަނީ އިންކާރު ކޮށްފައެވެ.