ފްލެޓް ހަވާލު ކުރާނެ ތާރީޚާ ބެހޭ ގޮތުން ވެސް ރައީސް މުއިއްޒު ވަނީ ސީދާ އިތުރުފުޅު ހައްދަވާފައި
02 ޖެނުއަރީ 2024 ގައި ރައީސް ޑރ މުހައްމަދު މުއިއްޒު ވިދާޅުވީ ހިނގަމުންދާ ހަފްތާ އާއި ކުރިއަށް އޮތް ހަފްތާގައި ރަޖިސްޓަރީ ހަވާލުކޮށް ނިންމާނެ ކަމަށް
ރައީސް މުއިއްޒު މި ސަރުކާރުގެ ސިޔާސީ އިސް މަގާމުތަކުގައި ތިބި ފަރާތްތަކާއެކު އޭރު އޮތް ސަރުކާރާ ދެކޮޅަށް އިހްތިޖާޖުގައި
ފްލެޓް ހަވާލު ކުރާނެ ތާރީޚް އާ ބެހޭ ގޮތުން ވެސް ރައީސް މުއިއްޒު ސީދާ އިތުރުފުޅު ހައްދަވާކަން އަނެއްކާވެސް ހާމަ ވެއްޖެއެވެ.
"ގޯތި އަދި ފްލެޓް ލިބޭނެ ކަމަށް ފައިނަލް ލިސްޓުގައި ހިމެނި ގެޒެޓް ކޮށްފައިވާ ފަރާތްތަކަށް ރަޖިސްޓްރީ ހަދައިދީ ގޯތި/ފްލެޓް ޙަވާލުކުރުމަކީ އަޅުގަނޑުމެން ވަޢުދުވީ ގޮތަށް ކުރިއަށް ދާނެ ކަމެކެވެ. މި ހަފްތާ އާއި މި އަންނަ ހަފްތާ ތެރޭ ރަޖިސްޓްރީ ޙަވާލުކޮށް ނިންމުމުގެ މަސައްކަތް ހައުސިންގ މިނިސްޓްރީ އިން ކުރިއަށް ގެންދާނެއެވެ."
މިއީ 2 ޖެނުއަރީ 2024 ގައި ރައީސް ޑރ މުހައްމަދު މުއިއްޒު ސޯޝަލް މީޑިއާ ޕްލެޓް ފޯމް "އެކްސް" ގައި ކުރެއްވި ޕޯސްޓެކެވެ.
ވަރަށް ސާފު ބަހުން ކަމެއް ކުރިއަށް ދާނެ ކަމުގެ ޔަގީންކަން ތާރީޚް އާއެކު ރައްޔިތުންނަށް ރައީސް އެ ވަނީ ދެއްވާފައެވެ. އަމިއްލަފުޅު އިޚްތިޔާރުގައި ކުރެއްވި ޕޯސްޓެކެވެ. އޭގެ ފަހުން، އެ ވިދާޅުވި ދެ ހަފްތާ މަސްތަކަކަށް ބަދަލުވެ، އެންމެ ފަހުން އަހަރު ނިމި، 2025 ވަނަ އަހަރުގެ ޖަނަވަރީ މަހުގެ 2 ވަނަ ދުވަހަށް އަހަރެއް ފާއިތުވީ އިރުވެސް އެ ވިދާޅުވި ގޮތައް އެކަމެއް ނުހިނގައެވެ.
އޭގެ ބަދަލުގައި ބޯހިޔާވަހިކަމުގެ ދާއިރާ އިން ހިނގި ބޮޑެތި ކަންކަމަކީ ފްލްޓާ ގޯތީގެ ކަންކަން ބަލަހައްޓަށް ހުރި ހައުސިން މިނިސްޓްރީ އަނދާ އަޅިޔަށް ވުމާއި، ހައުސިންގ މިނިސްޓަރަކަށް ހުންނެވި ހައިދަރު ހަޔަރ އެޑިއުކޭޝަން އަށް ބަދަލު ކުރެއްވުމެވެ.
ކަމެއް ވިދާޅުވި ތާރީޚަށް ނުހިނގިތާ އެކަން އެ ގޮތައް ނުހިނގީ ކީއްވެގެން ކަމެއްވެސް ރައީސުލް ޖުމްހޫރިއްޔާ ސާފުކޮށް ނުދެއްވިތާ، ސާފުކޮށްދޭނެ މީހަކު ވެސް ސަރުކާރަކު ނެތެވެ. އިސްވެ ކަމެއް ސާފުކޮށް ނުދިނީމާ ކަންބޮޑުވެފައި ތިބި ރައްޔިތުން ހައުސިންގ މިނިސްޓްރީ އަށް ދިޔުމުން މިހާރު ބުނަނީ ފްލެޓާ ބެހޭ ކަންކަމެއް ތިމަންނާމެނަކަށް ނޭނގޭ ކަމަށެވެ. އަދި އޭގެ އިތުރުން މިނިސްޓަރ ވިދާޅުވެފައި އޮންނީ އެޕޮއިންޓްމެންޓް ދޫކުރާ ފޯމުވެސް ދޫކުރުން ހުއްޓާލުމަށެވެ.
ފްލެޓް ހަވާލު ކުރައްވާނެ ކަމަށް ކުރިން ޔަގީން ކަމާއެކު ރައީސް މުއިއްޒު ދެއްވި ތާރީޚް ބޮޑު ތަނުން ފަހަނަ އަޅާ ދިޔަފަހުން ނޫސްވެރިއަކު ފްލެޓްތަކާ ބެހޭ ގޮތުން 09 ޖެނުއަރީ، 2025 ގައި ސުވާލު ކުރުމުން ހަމަ އެ ރައީސް ވަރަށް ޔަގީން ކަމާއެކު އަނެއްކާ އަނެއް ތާރީޚް ދެއްވައިފިއެވެ. މިފަހަރު ވިދާޅުވީ ރޯދަމަސް ފެށުމުގެ ކުރިން ފްލެޓް ލިސްޓު ނެރުއްވާނެ ކަމަށެވެ.
ހުވަދު އަތޮޅަށް ކުރައްވަމުންދާ ދަތުރުފުޅުގެ ތެރެއިން، ބުރާސްފަތި ދުވަހު ރޯދައިގެ ކުރިން ލިސްޓް އާންމު ކުރެވިދާނެތޯ ނޫސްވެރިއަކު ސުވާލު ކުރުމުން މުއިއްޒު ވިދާޅުވީ ރޯދައިގެ ކުރިން ކުރެވޭނެ ކަމަށް ވަރަށް ބޮޑަށް ގަބޫލުކުރެއްވޭ ކަމަށެވެ.
"އަޅުގަނޑަށް ވަރަށް ބޮޑަށް ގަބޫލު ކުރެވޭ ކުރެވޭނެ ކަމަށް،"
"ރޯދައިގެ ކުރިއަށް އިއުލާން ކުރަން އިރާދަކުރެއްވިއްޔާ މި މަސައްކަތް ކުރަނީ، އަޅުގަނޑަށް ވަރަށް ބޮޑަށް ގަބޫލު ކުރެވޭ ކުރެވޭނެ ކަމަށް" މުއިއްޒު ވިދާޅުވިއެވެ.
ކުރީ ސަރުކާރުން އެގްރީމެންޓް ހަދާ ހަވާލު ކޮށްފައިވާ އެކިފާޑުގެ ބަހަނާ ދައްކައިގެން އޭގެ ހައްގުވެރިންނަށް ހަވާލު ނުކޮށް ދިގު ދަންމާތީ އެތައް ބަޔަކު އަންނަނީ ހިތްހަމަ ނުޖެހުން ފާޅު ކުރަމުންނެވެ. ހިތާމައަކީ ރައީސް މިގޮތައް ވިދާޅުވާ އެއްޗެއް ގަބޫލު ކުރާ މީހަކު ވަރަށް މަދެވެ. ރައީސް މުއިއްޒު އަކީ ވިދާޅުވާ އެއްޗަކާ ދިމާ އިދިކޮޅަށް އާންމުކޮށް ކަންކުރައްވާ ބޭފުޅެއް ކަމަށް ގިނަ ބަޔަކު ގަބޫލު ކުރެއެވެ.
