ބުދަ ދުވަހުގެ ފަތިހުގެ ވަގުތެއްގައި ދިން ހަމަލާއެއްގައި ޣައްޒާ އިން މަދުވެގެން 9 މީހުން ޝަހީދު ވެއްޖެ

އިސްރާއީލީ ބާރުތަކުން ޣައްޒާއަށް ހުއްޓުމެއް ނެތި ދެމުންދާ ހަމަލާތަކުގައި ބުދަ ދުވަހުގެ ފަތިހުގެ ވަގުތެއްގައި ދިން ހަމަލާއެއްގައި މަދުވެގެން 9 މީހުން ޝަހީދު ވެއްޖެއެވެ. މީގެ ތެރޭގައި އުމުރުން އެންމެ 15 ދުވަސް ވެފައިވާ ތުއްތު ކުއްޖެއްވެސް ހިމެނެއެވެ. މި ހަމަލާތައް ދިނީ އިސްރާއީލުން "އަމާން ސަރަހައްދު" ކަމަށް ބުނާ އަލް-މަވާސީ އަށް ބޮން އެޅުމުގެ ސަބަބުން މަދުވެގެން 5 ކުޑަ ކުދިން ޝަހީދު ކޮށްލިތާ ދެތިން ގަޑިއިރު ފަހުންނެވެ.

އަނެއްކޮޅުން އިސްރާއީލުގެ އިސްތިއުމާރީ ބާރުތަކުން ހެބްރޯން ކައިރީގައި ފަލަސްތީނުގެ ބައެއްގެ ގަޔަށް ބަޑި ޖަހާ ވަނީ ޒަޚަމް ކޮށްލާފައެވެ.

އަންގާރަ ދުވަހުގެ ހަވީރު ހެބްރޯންގެ ދެކުނުގައިވާ އަލް-ފަވާރު ކޭމްޕުގައި ހިނގި ކުރިމަތިލުން ތަކެއްގައި އިސްރާއީލީ އިސްތިއުމާރީ ބާރުތަކުގެ ވަޒަނުން 4 އާންމުން ޒަޚަމްވިއެވެ.

ރެޑް ކްރެސެންޓްގެ މަސްދަރުތަކުން ބުނެފައިވަނީ އެފަރާތުގެ ޓީމުތަކުން ޒަޚަމްވި 4 މީހުންނަށް ފަރުވާދިން ކަމަށެވެ. މީގެ ތެރެއިން 3 މީހުންގެ ފަޔަށް އަދި އެކެއްގެ ބުރަކަށްޓަށް ވަޒަން އަރާފައިވާ ކަމަށް ބުނެފައިވެއެވެ.

ވަފާ ނިއުސް އިން ބުނެފައިވަނީ އިސްތިއުމާރީ ބާރުތަކުން ކޭމްޕްގެ މެދުތެރެއަށް އައިސް ވަދެގަތް ކަމަށާއި، އެކަމުގެ ސަބަބުން އިސްރާއީލު ސިފައިންނާއި ކޭމްޕްގައި ދިރިއުޅޭ އާންމުންނާ ދެމެދު ކުރިމަތިލުން ތަކެއް ހިނގާފައިވާ ކަމަށެވެ. އެއާއެކު އިސްރާއީލު ސިފައިން ވަނީ ބަޑިޖަހާ، ވިހަ ގޭސް ބޮމާއި ގަދަ އަޑުފައްގަނޑު އުފައްދާ ބޮން ބޭނުން ކޮށްފައެވެ.               

އެންމެ ފަހުގެ، ހިސާބުތަކުން ދައްކާ ގޮތުގައި، 7 އޮކްޓޯބަރު 2023 އިން ފެށިގެން ޣައްޒާ ސްޓްރިޕްގައި ޝަހީދުވި މީހުންގެ އަދަދު 45,885 އަށް ވަނީ އަރާފައެވެ. އަދި ހަމަ މި މުއްދަތުގައި ހުޅަނގު އައްސޭރީގައި ޝަހީދުވި މީހުންގެ އަދަދަކީ 841 އެވެ.