އިސްރާއީލުން އެއްވެސް ބެލުމެއް ނެތި ޣައްޒާ އަށް ބޮން އެޅުން ހުއްޓުމެއް ނެތި ކުރިއަށް ގެންދަމުން ދިއުމުގައި ހޯމަ ދުވަހު މީހުން ދިރިއުޅޭ އިމާރާތަކަށް ބޮން އަޅާ ކުޑަކުއްޖަކާއެކު 6 މީހުން ޝަހީދު ކޮށްލައިފިއެވެ.

އަލް ބުރެއިޖު ރެފިއުޖީ ކޭމްޕް ގައި ހުރި އާންމުން ދިރިއުޅޭ މި ގެއަށް ބޮން އެޅުމުގެ ސަބަބުން ޒަޚަމް ވި މީހުންގެ އަދަދު 13 ށް އަރާފައިވާ ކަމަށް އަލް އައުދާ ހޮސްޕިޓަލުން ހާމަ ކޮށްފައިވެއެވެ.

މިއާއެކު ހޯމަ ދުވަހު ދިން ހަމަލާތަކުގައި ޝަހީދުވި މީހުންގެ އަދަދު މަދުވެގެން 28 އަށް އަރާފައިވެއެވެ.

އަނެއްކޮޅުން ޣައްޒާ އަށް އދ. ގެ އިންސާނީ އެހީ ފޯރުކޮށްދޭ އޮފީހުގެ ވެރިޔާ ޓޮމް ފްލެޗަރ ވިދާޅުވެފައިވަނީ، އިސްރާއީލުން އެހީގެ މަސައްކަތުގައި އުޅޭ ފަރާތްތަކަށް ދެމުންދާ ހަމަލާތަކާއި، ހަނގުރާމައިގެ ތެރޭގައި ވާ ޣައްޒާގައި ޤާނޫނާއި ގަވައިދުތައް ނެތިގޮސްފައިވުމުގެ ސަބަބުން، ދިރިތިބި މީހުންގެ ފުރާނަ ސަލާމަތްކުރުމަށް ކުރެވޭ މަސައްކަތްތައް "ހުއްޓުމުގެ ހިސާބުގައި" ވާކަމަށެވެ.

ގަލްގީލިޔާ ގަވަރނަރޭޓުގައި ޔަހޫދީން އާބާދުވެފައިވާ ޣައިރު ޤާނޫނީ ސަރަހައްދެއްގެ ކައިރީގައި ފަލަސްތީނު މީހަކު ބަޑި ޖަހާ ތިން އިސްރާއީލު މީހުން މަރާލުމާ ގުޅިގެން އިސްރާއީލުގެ ސިފައިން ހިފާފައިވާ ހުޅަނގު އައްސޭރީގައި އެކަމަށް ޝައްކު ކުރެވޭ މީހުން ހޯދުމަށް ރެއިޑެއް ވަނީ ފަށާފައެވެ.

ވަފާ ނިއުސް އޭޖެންސީން ބުނާގޮތުގައި އިސްރާއީލު ސިފައިންގެ ހިމާޔަތް ލިބިގެން ގާނޫނާ ޚިލާފަށް ވަޒަންވެރިވެގެން އުޅޭ ހައްދުފަހަނަ އެޅި ޔަހޫދީން ގެންދަނީ ފަލަސްތީނު މީހުން އުޅަނދުތަކުގައި ހުޅުޖަހާ އަވަށްތަކަށް ހަމަލާތައް ދެމުންނެވެ.

7 އޮކްޓޯބަރު 2023 ގައި ޣައްޒާ ގައި އިސްރާއީލުން ފެށި އަނިޔާވެރި ހަމަލާތަކުގައި ޝަހީދުވި މީހުންގެ އަދަދު 45,854 އަށް އަރައިފިއެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ. މި އަނިޔާވެރި ހަމަލާތައް ފެށުނީއްސުރެ މަދުވެގެން 109,139 މީހުން ޒަޚަމްވެފައިވެއެވެ.