ހަނގުރާމަ ހުއްޓާލާ މަތިން 34 ރަހީނުން ދޫކޮށްލަން ހަމާސް އިން އެއްބަސްވެއްޖެ: ރޮއިޓާސް

ޣައްޒާގައި އިސްރާއީލުން ހިންގަމުންދާ ހަނގުރާމަ ހުއްޓާލުމަށް ޝަރުތު ކޮށް އިސްރާއީލުގެ 34 ރަހީނުން ދޫކޮށްލަން ހަމާސް އިން އެއްބަސްވެފައިވާ ކަމަށް ރޮއިޓާސް އިން ބުނެފިއެވެ.

ފަލަސްތީނުގެ ހަމާސްގެ އޮފިޝަލަކު ރޮއިޓަރސް އަށް މައުލޫމާތު ދިން ކަމަށް އެ ނޫސް އެޖޭންސީން ބުނެފައިވަނީ ހަނގުރާމަ ހުއްޓާލުމުގެ ޑީލްގެ ފުރަތަމަ މަރުހަލާގެ ތެރެއިން ދޫކޮށްލުމަށް ނިންމި 34 ރަހީނުންނަކީ އިސްރާއީލުގެ ސަރުކާރުން ހުށަހަޅާފައިވާ 34 ރަހީނުންގެ މައްޗަށް އެކުލެވޭ ލިސްޓެއް ކަމަށެވެ.

އިސްރާއީލުން މި ވާހަކަ ދޮގުކޮށްފައިވާ ކަމަށް އަލް-ޖަޒީރާ އިން ބުނެއެވެ.

އިސްރާއީލާއި ފަލަސްތީނުގެ ހަމާސް އާ ދެމެދު ހަނގުރާމަ ހުއްޓާލުމުގެ ނުރަސްމީ ވާހަކަތައް ދޯހާ ގައި ކުރިއަށް ދާ އިރު އިސްރާއީލުގެ ބާރުތަކުން ވަނީ ޣައްޒާ އަށް ހަމަލާދިނުން ކުރިއަށް ގެންގޮސް، އާދިއްތަ ދުވަހުގެ ވައިގެ ހަމަލާތަކުގައި ރަފަހް ގައި މަދުވެގެން 4 ފަލަސްތީނުން އަދި ބުރެއިޖުގައި އިތުރު 3 މީހުން ޝަހީދު ކޮށްލާފައެވެ.

އާދިއްތަ ދުވަހާއި ހޯމަ ވިލޭރޭ އިތުރު މީހުން ޝަހީދުވިއިރު، ފާއިތުވި ތިން ދުވަހުގެ ތެރޭގައި އިސްރާއީލުގެ ގަދަފަދަ ހަމަލާތަކުގައި ފަލަސްތީނުން މަދުވެގެން  200 މީހުން ވަނީ ޝަހީދު ކޮށްލާފައެވެ.

ޣައްޒާގެ އުތުރުގައި ގޯސްވަމުންދާ އިންސާނީ ހާލަތައް ފަރުވާލެއް ނުބަހައްޓާ އިސްރާއީލުން ގެންދަނީ އެ ސަރަހައްދަށް އިންސާނީ އެހީ ފޯރުކޮށް ދިނުމަށް ހުއްޓުމެއްނެތި ހުރަސް އަޅަމުންނެވެ. އޭގެ ނަތީޖާއެއްގެ ގޮތުން ގަދަ ފިނީގެ ސަބަބުން އުތުރު ޣައްޒާ ގައި 8 ވަނަ ތުއްތު ކުއްޖާގެ ފުރާނަ ގެއްލިއްޖެ ކަމަށް ރިޕޯޓުތައް ބުނެއެވެ.

އޮކްޓޯބަރު 7، 2023 އިން ފެށިގެން ޣައްޒާގައި އިސްރާއީލުން ކުރަމުންދާ ހަނގުރާމައިގައި މިހާތަނަށް މަދުވެގެން 45،805 ފަލަސްތީނު މީހުން ޝަހީދުވެ 109،064 މީހުން ޒަޚަމްވެފައިވެއެވެ.