ބަންގްލަދޭޝްގެ ވަގުތީ ސަރުކާރުން، އެ ގައުމަށް 1971 ވަނަ އަހަރު ލިބުނު މިނިވަންކަމުގެ ތާރީޚް ބަދަލުކޮށް، މިނިވަންކަން އިއުލާނު ކުރެއްވީ ކުރީގެ ރައީސް އަދި ކުރީގެ ބޮޑުވަޒީރު ޚާލިދާ ޒިޔާގެ ފިރިކަލުން ޒިއާއުއް ރަހުމާން ކަމަށް ޓެކްސްޓް ފޮތްތަކުގައި ލިޔެފިއެވެ. އޭގެ ކުރިން މިނިވަން ކަމުގެ ތާރީޚުގައި ލިޔެފައިވަނީ އެ ގައުމުގެ މިނިވަންކަން އިއުލާން ކުރެއްވީ ވެރިކަމުން ދުރުކުރެވުނު ކުރީގެ ބޮޑު ވަޒީރު ޝެއިޚް ހަސީނާގެ ބައްޕާފުޅު ބަންގަބަންދު ޝެއިޚް މުޖީބުއް ރަހުމާން ކަމަށެވެ.

ބަންގްލަދޭޝްގެ ނޫހެއް ކަމަށްވާ ޑެއިލީ ސްޓާރގެ ރިޕޯޓެއްގައިވާ ގޮތުން، ގިނަ ބަދަލުތަކަކާ އެކު އާ ޓެކްސްޓް ފޮތް ޖެނުއަރީ 1 އިން ފެށިގެން ޕްރައިމަރީ އަދި ސެކަންޑަރީ ދަރިވަރުންނަށް އައު ސަރުކާރުން ދަނީ ފޮނުވަމުންނެވެ.

ބަންގްލަދޭޝް ގެ ނޭޝަނަލް ކަރިކިއުލަމް އެންޑް ޓެކްސްޓް ބުކް ބޯޑުގެ ޗެއަރމަން ޕްރޮފެސަރ އޭކޭއެމް ރިއާޒުލް ހަސަން ވިދާޅުވި ގޮތުގައި 2025 ވަނަ އަހަރުގެ ދިރާސީ އަހަރަށް ތައްޔާރުކުރާ އާ ޓެކްސްޓް ފޮތްތަކުގައި ބަޔާން ކޮށްފައިވާނީ "26 މާރޗު 1971 ގައި ޒިއާއުއް ރަހުމާން ބަންގްލަދޭޝްގެ މިނިވަންކަން އިޢުލާންކުރެއްވި ކަމަށާއި، 27 މާރޗު ގައި އޭނާ ބަންގަބަންދުގެ ފަރާތްޕުޅުން ދެވަނަ ފަހަރަށް މިނިވަންކަމުގެ އިޢުލާނެއް ކުރެއްވި،" ކަމަށެވެ.

ޓެކްސްޓް ފޮތްތައް އިސްލާހުކުރުމުގައި ބައިވެރިވި ލިޔުންތެރިޔާ އަދި ދިރާސާކުރާ ފަރާތެއް ކަމުގައިވާ ރަކާލް ރާހާ ވިދާޅުވި ގޮތުގައި އެ ފަރާތްތަކުގެ މަޤްޞަދަކީ ފޮތްތަކުން "ހަގީގަތައްވުރެ ބޮޑުކޮށްގެން، މަޖުބޫރުކޮށްގެން ލިޔެފައިވާ ތާރީޚު" ނައްތާލުމެވެ.

"ފޮތްތައް އިސްލާހުކުރި ފަރާތްތަކުން ބަންގްލަދޭޝްގެ މިނިވަންކަން ޝެއިޚް މުޖީބުއް ރަހުމާން އިއުލާނު ކުރެއްވީ ޕާކިސްތާނު ސިފައިން ހައްޔަރުކޮށްފައި ހުންނަވަނިކޮށް އޭނާ ފޮނުއްވި ވަޔަރލެސް މެސެޖެކުން ކަމަށް ބުނެފައިވާ ބުނުމަކީ ޙަޤީޤީ މަޢުލޫމާތުގެ މައްޗަށް ބިނާކޮށް ލިޔެފައިވާ އެއްޗެއް ނޫން ކަމަށް ވާތީ، އެ ބައި ނައްތާލަން ނިންމީ." ކަމަށެވެ.

ގްރޭޑް 1 އިން 10 އަށް ކިޔަވައިދިން ކުރީގެ ޓެކްސްޓް ފޮތްތަކުގައި މިނިވަންކަމުގެ އިޢުލާން ކުރި ފަރާތް ބަޔާން ކޮށްފައި ވަނީ ވެރިކަމުގައި އޭރަކު އެ ގައުމުގައި އޮތް ސަރުކާރަށް ބަލައިގެންނެވެ. އަވާމީ ލީގު އަށް ތާއީދުކުރާ ގިނަ ބަޔަކު ޤަބޫލުކުރާ ގޮތުގައި މިނިވަންކަން އިއުލާނު ކުރެއްވީ ޝެއިޚް މުޖީބުއް ރަހުމާން އެވެ. އޭރު އާމީ މޭޖަރެއް އަދި ފަހުން މިނިވަންކަމުގެ ހަނގުރާމައިގައި ސެކްޓަރ ކޮމާންޑަރެއްގެ ގޮތުގައި ހުންނެވި ޒިއާއުއް ރަހްމާން ހަމައެކަނި މުޖީބުގެ އިރުޝާދުގެ ދަށުން އެ އިޢުލާން ވިދާޅުވީއެވެ. އެހެންނަމަވެސް، ބީއެންޕީ ގެ ސަޕޯޓަރުން ބުނާ ގޮތުގައި އެ ގައުމުގެ މިނިވަންކަން އިއުލާނު ކުރެއްވީ އެ ޕާޓީގެ ބާނީ އަދި ކުރީގެ ރައީސް ޒިއާއުއް ރަހުމާން އެވެ.

1996 ން 2001 ށް އަވާމީ ލީގު ވެރިކަމުގައި އޮތް އިރު، ޓެކްސްޓް ފޮތްތަކުގައި ބަޔާންކޮށްފައިވަނީ މިނިވަންކަން އިއުލާން ކުރެއްވީ ޝެއިޚް މުޖީބުއް ރަހުމާން ކަމަށާއި، ޒިއާއުއް ރަހުމާން އެ އިޢުލާން އޭނާގެ އަޑުން ހަމައެކަނި އިއްވީ ކަމަށެވެ. އެހެންނަމަވެސް، 2001 ން 2006 ށް ބީއެންޕީ ވެރިކަމުގައި އޮތް އިރު ޓެކްސްޓް ފޮތްތަކުގައި ބަޔާން ކޮށްފައި ވަނީ މިނިވަންކަން އިއުލާނު ކުރެއްވީ ޒިއާއުއް ރަހުމާން ކަމަށެވެ. 1996 ގެ ކުރިން ފޮތްތަކުގައި އެ ވާހަކަ ގެނެސްފައިވާ ގޮތެއް މިހާރުގެ އޮފިޝަލުން ހަނދާނުގައި ނެތް ކަމަށް ބުނި ކަމަށް ވެސް ޑެއިލީ ސްޓާރ ގައި ބުނެފައިވެއެވެ.

މި އިސްލާހު ގެނައުމުން އާ ބަހުސްތަކެއް ފެށިދާނެތޯ ޑެއިލީ ސްޓާރ އިން ސުވާލު ކުރުމުން އޮފިޝަލުން ވިދާޅުވީ، "އެއްގޮތަކަށްވެސް ނުއުފެދޭނެ. މިއީ އަވާމީ ލީގު ނުވަތަ ބީއެންޕީ އާ ގުޅުންހުރި ކަމެއް ނޫން. މިއީ ޤައުމީ މައްސަލައެއް. އަޅުގަނޑުމެންގެ އަމާޒަކީ ޙަޤީޤަތުގެ މައްޗަށް ބިނާކޮށް، އެއްގޮތަކަށް ބަޔާންކުރުން ކަށަވަރުކުރުން." ކަމަށެވެ.

މިނިވަންކަމުގެ އިޢުލާން 1971 ގައި ކުރެއްވި ބޭފުޅަކާ މެދު ދެފަރާތުން އަރާރުން ވަމުން ދާއިރު، ތާރީޚީ ގޮތުން، 27 މާރިޗު 1971 ގައި މިނިވަންކަމުގެ އިޢުލާން ކުރެއްވީ ޒިޔާއުއް ރަހްމާން ނޫން ކަމާއި މުޖީބުއް ރަޙްމާން ކަން ދައްކުވައިދޭ ގިނަ ހެކިތައް ވެއެވެ.

އެމެރިކާގެ ޑިފެންސް އިންޓެލިޖެންސް އެޖެންސީ (ޑީއައިއޭ) އިން 26 މާރިޗު 1971 ގައި ވައިޓް ހައުސްއަށް ފޮނުވި، މިހާރު އާންމެ ވެފައިވާ ރިޕޯޓެއްގައިވާ ގޮތުން "ޝެއިޚް މުޖީބުއް ރަޙްމާން ދެބައިވެފައިވާ ޤައުމުގެ އިރުމަތީ ބައި 'މިނިވަން އަދި އަމިއްލަ ބަންގްލަދޭޝް ޕީޕަލްސް ރިޕަބްލިކް' އަކަށް ވެއްޖެ ކަމަށް އިޢުލާން ކުރެއްވުމާ އެކު މިއަދު ޕާކިސްތާން ދާޚިލީ ހަނގުރާމަ އެއްގެ ތެރެއަށް ވެއްޓިއްޖެ،" ކަމަށް ބުނެފައިވެއެވެ.

ދުނިޔޭގެ އެކި ކަންކޮޅުތަކުގެ ނޫސްތަކުން ވެސް ރިޕޯޓުކޮށްފައި ވަނީ ބަންގަބަންދު މިނިވަންކަމުގެ އިޢުލާން ކުރެއްވީ 27 މާރިޗު 1971 ގައި ކަމަށެވެ.

އޭރު އެސޯސިއޭޓެޑް ޕްރެސް (އޭޕީ) އިން ރިޕޯޓުކުރި ގޮތުގައި، "އިރުމަތީ ޕާކިސްތާނުގެ ޤައުމިއްޔަތުގެ ލީޑަރު ޝެއިޚް މުޖީބުއް ރަޙްމާން އޭނާގެ ސަރަޙައްދު މިނިވަންވެއްޖެ ކަމަށް އިޢުލާންކުރެއްވިތާ ގަޑިއިރުތަކެއްގެ ތެރޭގައި ހައްޔަރުކުރެވުނެވެ..."

އޭރު ޕާކިސްތާން އަސްކަރިއްޔާގެ މޭޖަރެއްގެ މަޤާމުގައި ހުންނެވި ޒިޔާއުއް ރަޙްމާން ވެސް 27 މާރިޗު 1971 ގައި މިނިވަންކަމުގެ އިޢުލާނެއް ކިޔުއްވިކަން ފުޅާ ދާއިރާއެއްގައި ރިޕޯޓުކުރެވުނެވެ.

ނަމަވެސް، އޭގެ ފަހުން ބަންގްލަދޭޝްގެ މިނިވަންކަން ފުރަތަމަ އިޢުލާން ކުރެއްވީ ކާކުތޯ ބަހުސްކުރެވެމުން އައިސްފައިވެއެވެ.

ފާއިތުވި މާޗު މަހު، ޝެއިޚް ހަސީނާ ވިދާޅުވެފައި ވަނީ 1971 ގެ މިނިވަންކަމުގެ އިޢުލާނުގެ ތާރީޚު އޭނާގެ ބައްޕާފުޅު އަވަހާރަވުމާ އެކު ދެން އައި އަހަރުތަކުގައި ވަނީ އޮޅުވާލާފައެވެ.

ބަންގްލަދޭޝްގެ ޤާނޫނު އަސާސީގައި ބަޔާންކޮށްފައިވަނީ ޝެއިޚް މުޖީބުއް ރަޙްމާން 26 މާރިޗު 1971 ގައި ޑާކާގައި މިނިވަންކަމުގެ އިޢުލާން ކުރެއްވި ކަމަށެވެ.

ޓެކްސްޓް ފޮތްތަކުން މުޖީބުގެ "ޤައުމުގެ ބާނީ" ގެ ލަޤަބު ވެސް މިހާރު ވަނީ ނަގާފައެވެ.