ހުކުރު ދުވަހު ފަތިހު ޔަމަނުން މިސައިލް ހަމަލާ އެއް އިސްރާއީލަށް ފޮނުވާލުމާއެކު އިސްރާއީލުގެ ގިނަ ސިޓީތަކެއްގައި ސައިރަން އަޅައިފިއެވެ.
ހަމަލާތަކާ ގުޅިގެން އިސްރާއީލުގެ ސިފައިންގެ ބަޔާނެއްގައި ބުނެފައިވަނީ ހުކުރު ދުވަހުގެ ފަތިހު ޔަމަނުން ފޮނުވާލި މިސައިލެއް އިސްރާއީލުގެ ސަރަޙައްދަށް ވަދެފައިވަނިކޮށް އެ މިސައިލް އަށް ހުރަސް އެޅި ކަމަށެވެ.
"ޔަމަނުން ފޮނުވާލި މިސައިލެއް އިސްރާއީލުގެ ސަރަޙައްދަށް ވަދެފައިވަނިކޮށް އިންޓަރސެޕްޓް ކުރެވުނު،" ސިފައިންގެ ޓެލެގްރާމް ޗެނަލްގައި ޝާއިޢުކުރި ބަޔާނެއްގައި ބުނެފައިވެއެވެ.
"އިންޓަރސެޕްޓް ކުރުމުގެ ސަބަބުން ވެއްޓުނު މިސައިލުގެ ބައިތަކެއް އިސްރާއީލުގެ މެދުތެރޭ ސަރަޙައްދަށް ވެއްޓުނު ކަމަށް ރިޕޯޓެއް ލިބިފައިވެއެވެ. މި މައުލޫމާތު މިހާރު ދަނީ ބަލަމުންނެވެ."
އިސްރާއީލުގެ ކުއްލި ނުރައްކަލުގެ ޚިދުމަތް ފޯރުކޮށްދޭ އޮފިޝަލަކު މީޑިއާ އަށް ބުނެފައިވަނީ އިސްރާއީލުގެ މެދު އަދި ދެކުނު ސަރަޙައްދުތަކުގައި އެއަރ ރެއިޑް ސައިރަންތައް އިވުމާ ގުޅިގެން ޝެލްޓަރތަކަށް މީހުން އަވަހަށް ވަންނަން ދިޔުމުގެ ތެރޭގައި އަނިޔާވި ނުވަތަ ހާސްވި އެތައް ބަޔަކަށް ފަރުވާދެވުނު ކަމަށެވެ.
އަންގާރަ ދުވަހު ވެސް ޔަމަނުން ވަނީ އިސްރާއީލަށް މިސައިލް ހަމަލާ އެއް ދީފައެވެ. އިސްރާއީލުން ބުނެފައިވަނީ ޔަމަނުން ދޫކޮށްލި އެ މިސައިލަށް ވެސް ހުރަސް އެޅި ކަމަށެވެ.
އިރާނުގެ އެހީތެރިކަން ލިބިގެން ހަރަކާތްތެރިވާ ހޫތީ ހަނގުރާމަވެރިން ހަނގުރާމައިގެ ތެރޭގައިވާ ޔަމަނުގެ ގިނަ ސަރަޙައްދުތަކެއް ކޮންޓްރޯލް ކުރަމުންދާއިރު، އިސްރާއީލާއި ހަމާސްއާ ދެމެދު ޣައްޒާ ގައި ހިނގަމުންދާ ހަނގުރާމައިގައި ފަލަސްތީނުގެ ރައްޔިތުންނާ އެއްބައިވުމުގެ ގޮތުން އިސްރާއީލަށާއި ރެޑް ސީ އަދި ގަލްފް އޮފް އަދަންގައި ދުއްވާ އިސްރާއީލާ ގުޅުން ހުރި އުޅަނދުފަހަރަށް މިސައިލް އާއި ޑްރޯން ހަމަލާތައް ދަނީ ދެމުންނެވެ.
އިސްރާއީލުން ވެސް ވަނީ ޔަމަނަށް އެތައް ފަހަރަކު ހަމަލާދީފައެވެ. މީގެ ތެރޭގައި ޑިސެމްބަރު މަހުގެ ފަހުކޮޅު ސަނާ ބައިނަލްއަޤްވާމީ ވައިގެ ބަނދަރަށް އަމާޒުކޮށް ދިން ހަމަލާ ހިމެނެއެވެ.
