ޣައްޒާ އަށް ކާބޯތަކެތި ފޯރުކޮށްދިނުމަށް ހުއްޓުމެއް ނެތި އިސްރާއީލުން ހުރަސް އަޅަމުން ގެންދިއުމާއެކު ޣައްޒާގައި ބަނޑުހައިހޫނުކަން އާންމު ވަމުން ދާ ކަމަށް ދުނިޔޭގެ ކާބޯތަކެއްޗާ ބެހޭ މާހިރުން ބުނެފިއެވެ.

އެހީދޭ އޭޖެންސީތަކުން ބުނާ ގޮތުގައި، ދުނިޔޭގެ ކާބޯތަކެތީގެ ރައްކާތެރިކަމާ ބެހޭ މާހިރުން ހަނގުރާމައިގެ ތެރޭގައިވާ ޣައްޒާގައި ބަނޑުހައިހޫނުކަން ކުރިމަތިވިޔަ ނުދިނުމަށް ވަގުތުން ފިޔަވަޅު އަޅަން ގޮވާލިތާ އެއް މަސް ފަހުންވެސް، އިސްރާއީލުގެ ފަރާތްތަކުން ޣައްޒާ އަށް އިންސާނީ އެހީ ފޯރުކޮށް ދިނުމަށް ބޮޑެތި ހުރަސްތައް ގެންދަނީ ކުރިމަތި ކުރަމުންނެވެ.

ޣައްއްޒާ އަށް ކުރިމަތިވެފައިވާ ކާބޯތަކެތީގެ ހާލަތައް ބަލާއިރު، ނޮވެމްބަރު 8 ގައި ނެރުނު އިންޒާރެއްގައި ބަނޑުހައިހޫނުކަމާ ބެހޭ މުރާޖަޢާ ކޮމިޓީން ބުނެފައިވަނީ ޣައްޒާގެ 1.95 މިލިއަން މީހުންގެ ތެރެއިން 91 އިންސައްތަ މީހުންނަށް ކާބޯތަކެތި ނުލިބުމުގެ މައްސަލަ ސީރިއަސް މިންވަރަކަށް ކުރިމަތިވެފައިވާ ކަމަށެވެ. އަންދާޒާކުރެވޭ ގޮތުގައި 345،000 މީހުން ބަނޑުހައިހޫނުކަމާ ކުރިމަތިލާން މަޖުބޫރުވެފައިވެއެވެ.

އދ. ގެ ކާބޯތަކެއްޗާބެހޭ އޭޖެންސީން ބުނާ ގޮތުގައި ޣައްޒާގެ ދަނޑުބިންތަކުގެ 68 އިންސައްތަ، ދަނޑުވެރިކަމަށް ބޭނުންކުރާ ފެންވަޅުތަކުގެ 52 އިންސައްތަ އަދި ގްރީންހައުސް ސަރަޙައްދުތަކުގެ 44 އިންސައްތަ އަށް ހަނގުރާމައިގެ ސަބަބުން ވަނީ ގެއްލުން ލިބިފައެވެ.

އޭގެ އިތުރުން ޣައްޒާގެ މަސްވެރިކަމަށް ބޭނުން ކުރާ އުޅަނދުފަހަރުގެ 70 އިންސައްތަ ހަލާކުވެފައިވާއިރު، ޣައްޒާގެ ގެރިބަކަރީގެ 95 އިންސައްތަ ވަނީ މަރުވެފައެވެ.