ފަތުރުވެރިކަން ތިރިއަށް ގޮސް މައްޗަށް ދިއުމަކީ ގުދުރަތީ ކަމެއް: ފޮރިން މިނިސްޓަރ ޚަލީލް
ފޮރިން މިނިސްޓަރ ޚަލީލު ވިދާޅުވީ، އިންޑިއާގެ މަޝްހޫރު މީހުންގެ މެދުގައި ދިވެހިރާއްޖެ ވަރަށް މަޝްހޫރު ކަމަށެވެ. ބައެއް ސެލެބްރެޓީން ތަކުރާރުކޮށް ދިވެހިރާއްޖެއަށް ޒިޔާރަތްކުރާ ކަމަށް ވެސް ޚަލީލު ވިދާޅުވިއެވެ.
ރާއްޖޭގެ ފޮރިން މިނިސްޓަރ ޑރ. އަބްދުﷲ ޚަލީލު، އިންޑިއާގެ އެކްސްޓާނަލް އެފެއާޒް މިނިސްޓަރާ އެސް. ޖައިޝަންކަރާ އެކު
ފަތުރުވެރިކަން ތިރިއަށް ދިއުމާއި މައްޗަށް ދިއުމަކީ ގުދުރަތީ ކަމެއް ކަމަށް ރާއްޖޭގެ ފޮރިން މިނިސްޓަރ އަބްދުﷲ ޚަލީލު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ހުސްވި ހަފްތާގައި އިންޑިއާ އަށް ކުރެއްވި ރަސްމީ ދަތުރުފުޅުގައި، އެއްދުވަސް ވަރެއްގައި ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރީ އިންޑިއާ އިން ކަމަށްވީ ނަމަވެސް އެކަން ބަދަލުވެ، އަދިވެސް އިންޑިއާ އިން ޒިޔާރާތް ކުރާ ފަތުރުވެރިންގެ އަދަދު ދަށުގައި އޮތްކަން ފާހަގަ ކުރޭވޭތީ އެކަމާ ބެހޭ ގޮތުން އިންޑިއާގެ ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.
އެ ކަމަށް ފޮރިން މިނިސްޓަރ ޚަލީލު ވިދާޅުވީ، "އަޅުގަނޑު ޤަބޫލުކުރާ ގޮތުގައި ފަތުރުވެރިކަން މައްޗަށް ދިއުމަކީ ޤުދުރަތީ ކަމެއް،" ކަމަށެވެ.
މިނިސްޓަރ މިހެން ވިދާޅުވުމަށްފަހު، ފަހުން ދެއްކެވި ވާހަކައިގައި އިންޑިއާ އިން އަންނަ ފަތުރުވެރިން އިތުރު ކުރުމަށް އިންޑިއާގައި ރޯޑް ޝޯވތައް ބޭއްވުމުގެ މުހިންމު ކަމާއި ދަތުރުފަތުރުގެ ގުޅުން އަދިވެސް ރަނގަޅު ކުރުމަކީ ފަތުރުވެރިންގެ އަދަދު އިތުރު ކުރުމަށް ކުރަން ޖެހޭ ކަންކަމުގެ ގޮތުގައި ވިދާޅުވިއެވެ.
މިނިސްޓަރ ޚަލީލު ވިދާޅުވީ، ރައްޖެއަށް ފަތުރުވެރިން އަންނަ އަދަދަށް ބަލާއިރު އިންޑިއާ އަކީ ނަންބަރު އެކެއްގައި އޮތް ޤައުމު ކަމަށާއި އެހެން ނަމަވެސް އިންޑިއާ އިން އަންން ފަތުރުވެރިންގެ އަދަދު ދަށަށް ދިއުމަށްފަހު، 2024 ގެ މެދުތެރެއިން ފެށިގެން އަދަދު އިތުރުވަމުންދާ ތަން ފެންނަމުންދާ ކަމަށެވެ.
ފޮރިން މިނިސްޓަރ ޚަލީލު ވިދާޅުވީ، އިންޑިއާގެ މަޝްހޫރު މީހުންގެ މެދުގައި ދިވެހިރާއްޖެ ވަރަށް މަޝްހޫރު ކަމަށެވެ. ބައެއް ސެލެބްރެޓީން ތަކުރާރުކޮށް ދިވެހިރާއްޖެއަށް ޒިޔާރަތްކުރާ ކަމަށް ވެސް ޚަލީލު ވިދާޅުވިއެވެ.
ރާއްޖޭގެ ފަހުގެ ތާރީޚުގައި ރަހުމަތްތެރި ގައުމަކާ ދެކޮޅަށް ހިންގި އެންމެ ބޮޑު އެންޓިކެމްޕޭން އިންޑިއާ އާ ދެކޮޅަށް ހިންގުމުގައި އިސްކޮށް އުޅުއްވި މިނިސްޓަރ ޚަލީލު ވަނީ އިންޑިއާ ގެ ކޮންމެ ރައްޔިތެއް ރާއްޖެ އަށް ޒިޔާރާތް ކުރުމަށް އެދިވަޑައިގަންނަވާ ކަމަށް ވިދާޅުވެފައެވެ. ޚަލީލު ފާހަގަ ކުރެއްވި ގޮތުގައި ސަރުކާރުން ގެންދަނީ އުތުރުގައި ފަތުރުވެރިކަމުގެ ދާއިރާ ފުޅާކުރުމަށް މަސައްކަތް ކުރަމުންނެވެ. އެ ގޮތުން އިންޑިއާގެ އެހީގައި ހަނިމާދޫ އިންޓަރނޭޝަނަލް އެއަރޕޯޓް ތަރައްޤީ ކުރަމުން ދާއިރު އެންމެ ދެކުނުގެ އެންމެ ދުރުގައިވާ ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަސައްކަތްވެސް ކުރަމުންދަނީ ވެސް އިންޑިއާއިން ދީފައިވާ ފެސިލިޓީއެއްގެ ދަށުން ކަން ޚަލީލު ފާހަގަ ކުރެއްވިއެވެ.
ޚަލީލު ވިދާޅުވީ، ރާއްޖޭގެ ޓޫރިޒަމް މިނިސްޓަރ އިންޑިއާގައި ރޯޑްޝޯތަކާއި ޕްރޮމޯޝަނަލް އިވެންޓްތައް ބޭއްވުމަށް، ވަރަށް ޝައުގުވެރިވެ ވަޑައިގަންނަވާ ކަމަށެވެ. އެ ގޮތުން ފާއިތުވި އަހަރު، ޓޫރިޒަމް މިނިސްޓަރު ރާއްޖެ އިޝްތިހާރު ކުރަން މުމްބާއީ އަށް ވަޑައިގެންނެވި ކަމަށާއި، އޭގެ ނަތީޖާއެއްގެ ގޮތުން، ސެލެބްރިޓީންގެ ފަރާތުން ޝައުޤުވެރިކަން އިތުރުވެފައިވާކަމަށްވެސް ޚަލީލު ވިދާޅުވިއެވެ.
