ބުދަ ދުވަހުގެ ހަވީރު ޣައްޒާ ސްޓްރިޕްގެ މެދު އަދި ދެކުނު ސަރަޙައްދުތަކަށް އިސްރާއީލުން ދިން ވައިގެ ހަމަލާއެއްގައި ފަލަސްތީނުގެ އާންމުންގެ ދެ މީހުން ޝަހީދު ވެއްޖެއެވެ.
ވަފާ ނިއުސް އޭޖެންސީން ބުނާ ގޮތުގައި، ޣައްޒާ ސްޓްރިޕްގެ އުތުރުގައިވާ ޖަބާލިއާގެ އަލް-ނަޒްލާ ސަރަޙައްދުގައި ތިބި ބަޔަކަށް އަމާޒުކޮށް އިސްރާއީލުގެ ހަނގުރާމަ މަތިންދާބޯޓުތަކުން ބޮން އެޅުމުގެ ސަބަބުން އަންހެނަކު ޝަހީދުވިއެވެ. އަދި ސްޓްރިޕްގެ ދެކުނުގައިވާ ރަފާ ސިޓީގެ އައްސޭރިފަށުގެ ސަރަހައްދަކަށް ދިން ޑްރޯން ހަމަލާއެއްގައި އެހެން މީހަކު ޝަހީދުވިއެވެ.
ޔަހޫދީ ސިފައިން ޚާން ޔޫނިސްގެ މަވާސީ ސަރަޙައްދުގައި ހުރި ހިޖުރަކުރި މީހުންގެ ޓެންޓުތަކަށް އެތައް ހަމަލާއެއް ބުދަ ދުވަހު ވަނީ ދީފައެވެ. އަދި އިސްރާއީލުގެ މަތިންދާބޯޓުތަކުން ޣައްޒާ ސިޓީގެ އުތުރުގައިވާ ސަރަހައްދަކަށް ވެސް އެތައް ހަމަލާ އެއް ދިނެވެ.
ސިއްޙީ އޮފިޝަލުން ބުރާސްފަތި ދުވަހު އިޢުލާންކުރި ގޮތުގައި، 2023 ވަނަ އަހަރުގެ އޮކްޓޯބަރު 7 ވަނަ ދުވަހު އިސްރާއީލުން ޣައްޒާ ގައި ފެށި ޢުދުވާނު ގައި ޝަހީދުވި މީހުންގެ އަދަދު 45,361 ށް އަރައިފިއެވެ. މީގެ ތެރޭގައި ގިނައީ ކުޑަކުދިންނާއި އަންހެނުންނެވެ.
އެ މަސްދަރުތަކުން އިތުރަށް ބުނާ ގޮތުގައި، ޢުދުވާނު ފެށުނީއްސުރެ ޒަޚަމްވި މީހުންގެ އަދަދު 107,803 ށް ވަނީ އަރާފައެވެ. އަދި އެތައް ހާސް ބަޔަކު ފުނޑުވެފައިވާ އިމާރާތްތަކުގެ ދަށުގައި ވަނީ ތާށިވެ ވީނުވީ އެއް ނޭނގި ގެއްލިފައެވެ.
