ޔަމަނުން ވަރުގަދަ މިސައިލް ހަމަލާ އެއް އިސްރާއީލަށް ދީފި
ޔަމަނުން ފޮނުވާލި މިސައިލް މަތަ ނުކުރެވުނު ކަމަށް އިސްރާއީލުގެ އަސްކަރިއްޔާ އިން ބުނެފައިވާއިރު އެތައް ބަޔަކު މި ހަމަލާގައި ވަނީ ޒަޚަމްވެފައި
ޔަމަނުގެ ވެރިރަށް ސަނާ ގައި އިސްރާއީލާއި އެމެރިކާ އާ ދެކޮޅަށް ހަނގުރާމަވެރިން އަޑު އުފުލަނީ
ޔަމަނުން ވަރުގަދަ ރޮކެޓް ހަމަލާ އެއް އިސްރާއީލުގެ ތެލް އަވީވް އަށް ދީފިއެވެ.
އިސްރާއީލުގެ އަސްކަރިއްޔާ އިން ބުނީ، ޔަމަނުން ފޮނުވި މިސައިލް އެ ގައުމުގެ މިސައިލް ދިފާއީ ނިޒާމަށް ހުއްޓުވިފައި ނުވާ ކަމަށެވެ.
ހޮނިހިރު ދުވަހު ހެނދުނު ދިން މި ހަމަލާ ގައި މަދުވެގެން 14 މީހުން ޒަޚަމްވި ކަމަށް އިސްރާއީލުގެ އެމްބިއުލާންސް ސާވިސް އިން ހާމަ ކޮށްފައިވެއެވެ.
މިސައިލް އެރީ ތެލް އަވީވް ގެ ޖައްފާ ސަރަހައްދަށެވެ.
ޔަމަންގެ ހޫތީން ބުނެފައިވަނީ، އިސްރާއީލަށް ދޭ ހަމަލާތަކަކީ ޣައްޒާ ގައި އިސްރާއީލުން ހިންގާ އަނިޔާވެރި ހަނގުރާމަ އަށް ބަދަލު ހިފުމުގެ ގޮތުން ދޭ ހަމަލާތަކެއް ކަމަށެވެ.
ޔަމަން އިން އިސްރާއީލަށް ހޮނިހިރު ދުވަހު މި ހަމަލާ ދިން އިރު، މި ދިޔަ ބުރާސްފަތި ދުވަހު އިސްރާއީލުން ވަނީ ހޫތީން ކޮންޓްރޯލް ކުރާ ޔަމަނުގެ ސަރަހައްދު ތަކުގައި ހުރި މުހިންމު ތަންތަނަށް ބޮން އަޅާފައެވެ. އޭގެ ތެރޭގައި ކަރަންޓު އުފައްދާ މަރުކަޒަކާއި ބަނދަރެއް ހިމެނެއެވެ.
ހަމަލާ އަށް ފަހު ހޫތީން ބުނީ އިސްރާއީލަކީ ރައްކާތެރި ތަނެއް ނޫން ކަމަށާއި އެތައް ބިލިއަން ޑޮލަރުގެ އޭރިއަލް ޑިފެންސް ސިސްޓަމަކީ ބޭނުމެއް ނެތް ފޭލު ވެފައިވާ ނިޒާމެއް ކަމަށެވެ.
