ހުޅުމާލެ އިން ބޮޑު ގޯއްޗެއް އެމްޑީ ފަޒުލް ގެ އާއިލާ މީހަކަށް ވަގަށް ދޭން އުޅެނި ކޮށް ފަޅާ އަރައިފި

ހައުސިން ޑިވަލޮޕްމަންޓް ކޯޕްރޭޝަން (އެޗްޑީސީ)ގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދުގެ އާއިލާ މީހަކަށް ބިންވެރިޔާ ސްކީމްގެ ދަށުން ނުލިބޭ ބިމެއް ހޯދައިދޭން މަސައްކަތް ކުރި ކަން ފަޅާ އަރައިފިއެވެ.

މިމައްސަލައާ ގުޅޭ މުހިންމު ލިޔެކިއުންތަކެއް ސޯޝަލް މީޑިއާގައި ހަސަން ކުރުސީ ނަމުގައި ހިންގާ އެކައުންޓުން ވަނީ ލީކުކޮށްލާފައެވެ.

ފަޅާއަރުވާލި ލިޔެކިއުންތަކުން އިނގޭ ގޮތުގައި އެޗްޑީސީގެ ޑެޕިއުޓީ ޑިރެކްޓަރު އަހުމަދު އައިމަން ސޮއިކުރައްވައި، ހައުސިން މިނިސްޓަރު ޑރ. އަލީ ހައިދަރަށް ފޮނުވާފައިވާ ސިޓީގައި ބުނެފައިވަނީ ހުޅުމާލެ ލޮޓް ނަންބަރު 20768, 1250 އަކަފޫޓުގެ ގޯތި ލިބިފައިވާ ކަމަށް ބުނެ، ދެ ފަރާތަކުން ވަށާފާރު ރޭނުމުގެ ހުއްދަ އަދި ހުށަހަޅާފައިވާ ކަމަށެވެ. އެއީ މުހައްމަދު ފަޒީލް ރަޝީދު އަދި އަބްދުލް މަޖީދު މާހިރެވެ. އެހެންކަމުން މި ގޯތި ލިބިފައިވަނީ ކޮން ފަރާތަކަށްކަން އަންގައިދިނުމަށް ސިޓީ ގައި ވަނީ އެދިފައެވެ.

މިސިޓީއާއި ގުޅިގެން ހައުސިން މިނިސްޓްރީން ފޮނުވާފައިވާ ސިޓީގައި ބުނެފައިވަނީ ސަރުކާރުން ކުރިއަށް ގެންދާ ގެދޮރުވެރިޔާ ޕްރޮގްރާމްގެ ދަށުން މާލެ ސަރަހައްދަށް އަމާޒުކޮށް ކުރިއަށް ގެންދާ ބިންވެރިޔާ ސްކީމުން ގޯތި ލިބިފައިވާ ފަރާތްތަކުގެ ތެރެއިން ތިޔަ ކޯޕްރޭޝަނުގެ ސިޓީގައި ބަޔާންކޮށްފައިވާ ފަރާތްތަކަކީ މި ސްކީމްއިން ގޯއްޗަކަށް އެދި އެޕްލިކޭޝަން ހުށަހަޅާފައިވާ ފަރާތްތަކެއް ނޫންކަން މި ސްކީމްގެ ޑާޓާބޭސް އިން ދައްކާ ކަމަށެވެ. އަދި ސިޓީތަކުގައި ބަޔާންކޮށްފައިވާ 20821 އާއި 20768 ނަންބަރު ގޯތިތަކަކީ އެ މިނިސްޓްރީން މިހާތަނަށް އެއްވެސް ފަރާތަކާއި ހަވާލުކޮށްފައިނުވާ ދެ ގޯތިކަމުގައި ބުނެފައިވެއެވެ.

ސްޓޭޓް މިނިސްޓަރު އިބްރާހިމް ނިޒާމް ސޮއިކުރައްވައި، ހައުސިން މިނިސްޓްރީން ފޮނުވި މިސިޓީ އާއެކު، ބިންވެރިޔާ ސްކީމުން ހުޅުމާލެއިން ދޫކޮށްފައިވާ ގޯތިތައް ލިބިފައިވާ ފަރާތްތައް ހިމެނޭ ލިސްޓް (ބިން ހަވާލުކުރެވުނު ފަރާތްތައް، ސޮއިކުރެވުނު ފަރާތް، ސޮއިނުކުރާ ފަރާތްތައް) އެނގޭގޮތަށް ލިސްޓް ވެސް ވަނީ ފޮނުވާފައެވެ.

މީގެ އިތުރުން ހައުސިން މިނިސްޓްރީ އާއްމުކޮށްފައިވާ ލިސްޓުގައި މުހައްމަދު ފަޒީލް ރަޝީދު ބިންވެރިޔާ ސްކީމުގެ ދަށުން ގޯއްޗަށް ޝަރުތުހަމަނުވާކަން ހާމަވެއެވެ.

މިމައްސަލައާ ގުޅިގެން އެޗްޑީސީގެ ބަހެއް ވަނީ ލިބޭ ގޮތް ނުވެފައެވެ.

މި މައްސަލައިގައި އާންމުންގެ ގިނަ ބަޔަކު އަންނަނީ ސަރުކާރުން ކުރާ މިބާވަތުގެ ވައްކަން ހުއްޓުވުމަށް ސޯޝަލް މީޑިއާ ގައި ގޮވަމުންނެވެ. އަދި މިއީ ބިމެއް ވަގަށް ނަގަން އުޅުމުގެ އިތުރުން ލިޔެކިޔުން ބަދަލު ކޮށް އޮޅުވާލުމާއި މަކަރު ހީލަތުގެ މައްސަލައެއް ކަމަށް ވެސް ގިނަ ފަރާތްތަކަކުން އަންނަނީ ބުނަމުންނެވެ.

ސަރުކާރުގެ ތެރޭގައި ހިނގާ މިބާވާތުގެ ބޮޑެތި ކަރަޕްޝަން ގެ މައްސަލަ ތަކަށް މިހާތަނަށް މާ ބޮޑު ސަމާލު ކަމެއް ރައީސް މުއިއްޒުގެ ސަރުކާރުން ދީފައެއް ނުވެއެވެ.

މި ބާވަތުގެ ކަރަޕްޝަންގެ މައްސަލަތައް ބަލަން އުފައްދާފައިވާ އެންޓި ކަރަޕްޝަން ކޮމިޝަން ގެ ރައީސް އަކީ ރައީސުލް ޖުމްހޫރިއްޔާ އައްޔަން ކުރައްވާ މަގާމަކަށް ވެސް ދާދި ފަހުން މި ސަރުކާރުން ވަނީ ބަދަލު ކޮށްފައެވެ.