ސަޢޫދީ އިން ލަންޑަނުގެ ހީތްރޯ އެއަރޕޯޓުގެ 15 އިންސައްތަ ހިއްސާ ގަނެފި
ހިއްސާ ގަތީ ސަޢޫދީ އަރަބިއްޔާގެ ޕަބްލިކް އިންވެސްޓްމަންޓް ފަންޑުން
ލަންޑަން ހީތްރޯ އެއަރޕޯޓުގެ ޑިޕާޗަރ ސަރަހައްދު
ސަޢޫދީ އަރަބިއްޔާގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ލަންޑަނުގެ ހީތްރޯ އެއަރޕޯޓުގެ 15 އިންސައްތަ ހިއްސާ ގަނެފައިވާކަމަށް ބުރާސްފަތި ދުވަހު އިޢުލާނުކޮށްފިއެވެ.
ޕީއައިއެފްއިން ބުނެފައިވަނީ ހީތްރޯ އެއަރޕޯޓުގެ ހޯލްޑިންގ ކުންފުނި ކަމުގައިވާ އެފްޖީޕީ ޓޮޕްކޯގެ ގާތްގަނޑަކަށް 15 އިންސައްތަ ހިއްސާ ގަތުމުގެ މުއާމަލާތް ފުރިހަމަ ކުރެވިފައިވާ ކަމަށެވެ.
"ޕީއައިއެފްއިން ހީތްރޯ އެއަރޕޯޓުގައި އިންވެސްޓުކުރުމަކީ އުފަލެއް. އެއީ އިނގިރޭސިވިލާތުގެ މުހިންމު އެސެޓެއް އަދި ދުނިޔޭގެ ފެންވަރުގެ އެއަރޕޯޓެއް،" ޑެޕިއުޓީ ގަވަރނަރ އަދި އިންޓަރނޭޝަނަލް އިންވެސްޓްމަންޓްސްގެ ވެރިޔާ ތުރުކީ އަލް-ނުވައިސަރު ވިދާޅުވިއެވެ.
އަލް-ނުވައިސަރު ވިދާޅުވީ ހީތްރޯއަކީ ދުނިޔޭގެ މުހިންމު ދޮރޯށްޓެއް ކަމަށާއި، އެއަރޕޯޓުގެ ކުރިއެރުމަށް އެހީތެރިވުމަށާއި ދުނިޔޭގެ ވައިގެ ދަތުރުފަތުރުގެ މަރުކަޒެއްގެ ގޮތުގައި އެ އެއަރޕޯޓުގެ މަޤާމު ދެމެހެއްޓުމަށް އެހީތެރިވުމަށް ޕީއައިއެފްއިން މަސައްކަތް ކުރާނެ ކަމަށެވެ.
