ސެޓެލްމަންޓޭ ކިޔައިގެން ހުށަހަޅައިގެން އުޅެނީ ސިޔާސީ މަގުސަދެއްގައި - ޣަފޫރު

ސެޓެލްމަންޓޭ ކިޔައިގެން ހުށަހަޅައިގެން އުޅެނީ ސިޔާސީ މަގުސަދެއްގައި ކަމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެއެވެ.

ރައްޔިތުންގެ މަޖިލީހުގެ ބުރާސްފަތި ދުވަހުގެ ޖަލްސާގައި ބަހުސްކުރައްވަމުން ޣަފޫރު ވިދާޅުވީ ދައުލަތުގެ ފައިސާ ޚިޔާތްތެރިފައިވާނަމަ އެ މައްސަލައެއް ބެލުމަކީ އެއީ ކުރަންޖެހޭނެ ކަމެއް ކަމަށެވެ. އެހެންނަމަވެސް މިއީ ސިޔާސީ މައްސަލައެއް ކަމަށާއި، ސެޓެލްމަންޓް ކޮމިޓީގެ މައްސަލަ ހުށަހެޅިފައިވަނީ ސިޔާސީ ގޮތުން ބިރުދެއްކުމަށް ޓަކައި ކަމަށެވެ. ޣަފޫރު ވިދާޅުވީ ދިވެހި ޖުމްހޫރިއްޔާގެ ޤާނޫނު އަސާސީގެ 115 ވަނަ މާއްދާގައި ބުނަނީ ރައީސުލްޖުމްހޫރިއްޔާގެ މައްޗަށް ލާޒިމޭ އެންމެހައި ދިވެހި ރައްޔިތުންގެ އަގުތައް ހިމާޔަތްކުރުން ކަމަށާއި، ހަމަ އެއާއެއްކޮށް ހަމަ އެ މާއްދާގެ (ގ) ގައި ބުނަނީ އެކިއެކި ކޮމިޓީތައް އުފައްދުމާއި އަދި ކޮމިޓީތައް އުފައްދައިގެން ކުރަންޖެހޭ ތަޙުޤީޤުތައް ކުރުމަށް ރައީސުލްޖުމްހޫރިއްޔާގެ މައްޗަށް ލާޒިމް ކަމަށެވެ.

ޣަފޫރު ވިދާޅުވީ އެއީ ގާނޫނުން ބާރު ލިބިގެން ކޮށްފައި އޮތް ކަމެއް ކަމަށެވެ. އަދި މަޖިލީހުން އެކަން ފާސްކޮށްފައި ވާއިރު، ސެޓްލްމެންޓް ކޮމިޓީން ކުރި ހުރިހާ މުޢާމަލާތެއް ކުރުމަށްފަހު ކެބިނެޓަށް ހުށަހަޅައިގެން ކެބިނެޓުގައި ވެސް ހުރިހާ މެންބަރުން ތިއްބަވައިގެން ކެބިނެޓުންވެސް އެކަން ފާސްކޮށްފައިވާނެ ކަމަށެވެ.

ޣަފޫރު ވިދާޅުވީ ޤާނޫނުއަސާސީ ލާޒިމުކުރާ އުސޫލުގެ މަތިން ރައީސް އިބްރާހީމް މުހައްމަދު ޞާލިހުގެ ވެރިކަމުގައި ކުރެވި މަސައްކަތެއް ކުރައްވާފައި އޮންނާނެ ކަމަށާއި، އެގޮތަށް ހުރިހާ ކަމެއް ކުރެވިފައިވާނެ ކަމަށެވެ. އަދި އޭގެ ބޭރުން ކަމެއް ވާނަމަ ބެލުމަކީ ކުރަންޖެހޭނެ ކަމެއް ކަމަށާއި، އަދި އެކަން ބެލުމަށް އެޓަރނީ ޖެނެރަލަކަށް ހުރަސްއެޅޭ އެއްވެސް ކަމެއް ނޯންނާނެ ކަމަށެވެ.

ޣަފޫރު ވިދާޅުވީ ގާނޫނުއަސާސީއާއި ގާނޫނުތަކާ އެއްގޮތްވާ ގޮތުގެ މަތީން ރައީސް އިބުރާހީމް މުހައްމަދު ޞާލިހު އެޅުއްވި ކޮންމެ ފިޔަވަޅެއް އަޅުއްވާފައި ވާނެ ކަމަށެވެ. އަދި އެއާއެއްކޮށް ގާނޫނުން ބޭރުންކޮށްފައި އޮތް އެއްވެސް ކަމެއް ނޯންނާނެ ކަމަށެވެ. ޣަފޫރު ވިދާޅުވީ ސިޔާސީ ގޮތުން ބިރު ދެއްކުމަކީ ބަލައިގަންނާނެ ކަމެއް ނޫން ކަމަށެވެ.

ރައީސް ޑރ. މުހައްމަދު މުއިއްޒު ނޫމަޑި މައްސަލައިގައި ދޮގުހެކިބަސް ދިން މައްސަލައަށް އިޝާރާތްކުރައްވާ ޣަފޫރު ވިދާޅުވީ ކޯޓަކުން މައްސަލައެއް ސާބިތުނުވި ކަމުގައި ވިޔަސް ވައްކަމެއް ކުރިއްޔާ ކުރި ވައްކަމެއް ވާނީ ވައްކަމަކަށް ކަމަށާއި، ކޯޓުގެ ހުކުން އަދި އެއީ ތަފާތު ކަމެއް ކަމަަށާއި، ޝަރީޢަތަށް ސާބިތުގެން ވައްކަން ކުރި މީހާގެ މައްޗަށް ހުކުން ނައުން އެއީ އޭނާ ވައްކަމުން ބަރީޢަ ވާނެ ކަމެއް ނޫން ކަމަށް ޣަފޫރު ވިދާޅުވިއެވެ.