ކޯފީގެ ހެޓްރިކާ އެކު ފުވައްމުލަމުން ދެ ވަނަ މެޗު ވެސް ކާމިޔާބު ކޮށްފި

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު އޭގައި ފުވައްމުލައް ސިޓީން ކުޅުނު ދެ ވަނަ މެޗު ވެސް ކާމިޔާބު ކޮށްފި އެވެ.

ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ފުވައްމުލަކާއި ހއ.ދިއްދޫ ބައްދަލު ކުރި މެޗު އެ ޓީމުން ކާމިޔާބު ކުރީ 7-3 ގެ ތަފާތު ބޮޑު ނަތީޖާ އަކުންނެވެ. މިއީ މުބާރާތުގައި ފުވައްމުލައް ކުޅުނު ދެ ވަނަ މެޗެވެ.

މެޗުގައި ފުވައްމުލަކަށް ލީޑު ނަގައިދިނީ އަލީ ޝަމާލް ޢަބްދުﷲ އެވެ. އޭގެ ފަހުން އޭނާ ވަނީ ދެ ވަނަ ލަނޑެއް ޖަހައި އެ ޓީމުގެ ލީޑު ފުޅާ ކޮށްފަ އެވެ. އޭގެ ފަހުން މެޗުގެ 33 ވަނަ މިނެޓުގައި ދިއްދޫގެ އާދަމް އާޒިމް ވަނީ އެ ޓީމުގެ ފުރަތަމަ ލަނޑު ޖަަހައިފަ އެވެ. މެޗުގައި ފުވައްމުލަކުގެ ތިން ވަނަ ލަނޑު ޖެހީ ބިދޭސީ ކުޅުންތެރިޔާ ކޯފީ އޮސޫސޫ އެވެ. ފުރަތަމަ ހާފުގައި ދިއްދޫގެ ދެ ވަނަ ލަނޑު ޖެހީ ޙުސެއިން ޝިފާހު އެވެ.

ދެ ވަނަ ހާފު ފަށައިގެން ކުރީ ކޮޅު ކޯފީ ވަނީ ފުވައްމުލަކުގެ ހަތަރު ވަނަ ލަނޑު ޖަހައިފަ އެވެ. އޭގެ ފަހުން މެޗުގެ 81 ވަނަ މިނެޓުގައި ފުވައްމުލަކުގެ ފަސް ވަނަ ލަނޑު ޖަހައި ކޯފީ ވަނީ މެޗުގައި އޭނާގެ ހެޓްރިކް ހަމަކޮށްފަ އެވެ. މެޗުގައި ފުވައްމުލަކުގެ ހަ ވަނަ ލަނޑު މުޙައްމަދު އިޔާޝް އަޙުމަދު ޖެހިއިރު، ހަތް ވަނަ ލަނޑު ޖެހީ ޙުސެއިން ޝަރީފު މުޙައްމަދު އެވެ. މެޗުގައި ދިއްދޫގެ ތިން ވަމަ ލަނޑަކީ އެ ޓީމަށް ލިބުނު ޕެނަލްޓީ ކާމިޔާބުކޮށްގެން ޝިފާހު ޖެހި ލަނޑެކެވެ.

މޮޅާއެކު ފުވައްމުލަކުން ގުރޫޕް އޭގެ އެއް ވަަނައިގައި އޮތީ މިހާތަނަށް ކުޅުނު ދެ މެޗުން ވެސް މޮޅުވެ ހަ ޕޮއިންޓާ އެކު އެވެ.