ހުދުމުހުތާރު ވެރިކަމެއް ބަލިކޮށް، ރައްޔިތުންގެ ބާރު ގެނައުމަށް ކުރަންޖެހޭ އެންމެހާ މަސައްކަތްތައް ކުރާނަން: ފައްޔާޒު
މި ސަރުކާރުގެ ބޭފުޅުން އަބަދުވެސް ވެރިކަން ހޯދުމަށް ޑިމޮކްރަސީ ހަމަތައް ބޭނުންކުރޭ
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޗެއާޕާސަން ފައްޔާޒު އިސްމާއީލް ވާހަކަދައްކަވަނީ
ރައީސް ޑރ.މުހައްމަދު މުއިއްޒުގެ ވެރިކަމުގައި ހުދުމުހުތާރުކަމުގެ ސިއްކަ ޖެހިފައިވާ ކަމަށާއި، މިފަދަ ވެރިކަމެއް ބަލިކޮށް، ރައްޔިތުންގެ ބާރު ގެނައުމަށް ކުރަންޖެހޭ އެންމެހައި މަސައްކަތްތައް ކުރާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.
20 ނޮވެންބަރު 2024 ގައި ރައްޔިތުންގެ މަޖިލީހުން ގާނޫނު އަސާސީއަށް ބޮޑެތި ބަދަލުތަކެއް ކުއްލި ގޮތަކަށް ގެނައުމާއި ގުޅިގެން ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ މިސަރުކާރުގެ ބޭފުޅުން އަބަދުވެސް ވެރިކަން ހޯދުމަށް ޑިމޮކްރަސީ ހަމަތައް ބޭނުންކުރާ ކަމަށެވެ. ނަމަވެސް މިއީ ވެރިކަން ލިބުމުން އެއާ ދެކޮޅަށް މަސައްކަތް ކުރާ ބޭފުޅުން ހިމެނޭ ޕާޓީއެއް ފައްޔާޒު ވިދާޅުވިއެވެ. މިޕާޓީގެ ފިކުރުގެ ބޭފުޅުން ވެރިކަމަށް އަންނަ ކޮންމެ ފަހަރަކު ވެސް ހުދުމުހުތާރުކަމާ ދިމާލަށް ގައުމު ގެންދާ ކަމަށް ފައްޔާޒު ވިދާޅުވިއެވެ.
ބުދަ ދުވަހު މަޖިލީހުން ކުރި މަސައްކަތްތަކަށް އިޝާރާތް ކުރައްވައި ފައްޔާޒު ވިދާޅުވީ ރައީސް މުއިއްޒު ބޭނުންވެއްޖެ ހާލަތެއްގައި ވަގުތުން ގާނޫނު އަސާސީ ވެސް އެމަނިކުފާނު ބޭނުންފުޅުވާ ގޮތަށް ބަދަލުކުރެވިގެންދާތަން ރައްޔިތުންނަށް ދައްކާފައިވާ ކަމަށާއި، މިއީ ބިރުވެރިކަމެއް ކަމަށެވެ.
މީގެ އިތުރުން ފައްޔާޒު ވިދާޅުވީ ރައްޔިތުންގެ ބާރުވެރިކަން ދެމެހެއްޓުމަށް ކުރަންޖެހޭ އެންމެހައިމަސައްކަތްތައް ކުރާނެ ކަމަށެވެ.
ފައްޔާޒު ވިދާޅުވީ ގާނޫނު އަސާސީ އާއި ވެރިކަމުގެ ނިޒާމު ބައްޓަން ކުރެވިފައިވަނީ މަޝްވަރާގެ މަތިން ރައްޔިތުން ބޭނުންވާ ގޮތަށް ކަމަށެވެ. ވަކި މަފްހޫމެއްގެ މައްޗަށް ގާނޫނު އަސާސީ އެކުލަަވާލާފައިވާއިރު، ގާނޫނު އަސާސީއަށް ބޭނުންވާ އިސްލާހެއް ގެނެސް ބޭނުންހާ ގޮތަކަށް ގާނޫނުތައް ބައްޓަން ކުރުމުގެ ފުރުސަތު ނުދޭނެ ކަމަށް ފައްޔާޒު ވިދާޅުވިއެވެ.
