މެންބަރުން ވަކި ކުރުމުގެ ބާރު ރައްޔިތުންނަށް ދޭން ސަރުކާރުން ބޭނުމެއް ނުވި

ރައްޔިތުންގެ މަޖިލީހުގެ މެންބަރުން ވަކި ކުރުމުގެ ބާރު ރައްޔިތުންނަށް ދިނުމުގެ ބާރު ސިޔާސީ ޕާޓީތަކަށް ދިނުމުގެ ބަދަލުގައި، އެ ބާރު ސީދާ އެ ދާއިރާއެއްގެ ރައްޔިތުންނަށް ދިނުމަށް ހުށަހެޅި އިސްލާހު ބަލައިގަންނަން ސަރުކާރު ހިންގާ ޕީއެންސީގެ މެމްބަރުން ދެކޮޅު ހައްދަވައިފިއެވެ.

އެ އިސްލާހު ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް ނަސީމްއެވެ. މި އިސްލާހު ބަލައިގަތުމަށް ވޯޓު ދީފައި ވަނީ މަޖިލީހުގެ 13 މެންބަރުންނެވެ. އެއީ އެމްޑީޕީގެ 12 މެންބަރުންގެ އިތުރުން އައްޑޫ މީދޫ ދާއިރާ އަމިއްލަ މެންބަރެއްގެ ގޮތުގައި ތަމްސީލުކުރައްވާ އަބްދުއްރަހުމާން އެވެ. އިސްލާހު ބޭރުކޮށްލާފައި ވަނީ ޕީއެންސީގެ 77 މެންބަރުންގެޓާއި އެކުގައެވެ. މީގެ އިތުރުން އިތުރު އިސްލާހެއް ގެނައުމަކާއި ނުލާ ޤާނޫނު ސަރުކާރުގެ ފަރާތުން މަޖިލީހަށް ހުށަހެޅި ގާނޫނުއަސާސީގެ އިސްލާހު އެއް ދުވަސް ތެރޭގައި މަޖިލީހުން މިވަނީ ފާސްކޮށްފައެވެ. ޤާނޫނު އަސާސީ އަށް އިސްލާހު ގެނެސްފައި މި ވަނީ ޖަލްސާއަށް ހާޒިރުވެވަޑައިގެން ތިއްބެވި 91 މެންބަރުންގެ ތެރެއިން 78 މެންބަރުންގެ ވޯޓުންނެވެ. ގާނުނުއަސާސީ އިސްލާހު ކުރުމަށް ބޭނުންވަނީ މަޖިލީހުގެ ޖުމްލަ މެންބަރުންގެ ތިންބައިކުޅަ އެއް ބައިން ކަމަށް ވާއިރު އެއީ 70 މެންބަރުންނެވެ.

ސަރުކާރުގެ ފަރާތުން ގާނޫނުއަސާސީ އަށް ބަދަލު ގެންނަން ހުށަހަޅާވާފައިވާ ބިލު މުޅި މަޖިލީހުގެ ކޮމިޓީން ފާސްކުރީ ވެސް ބުދަ ދުވަހުއެވެ. އެގޮތުން ރައްޔިތުންގެ މަޖިލީހުގެ މެންބަރަކު ޕާޓީ ބަދަލުކޮށްފިނަމަ ގޮނޑިގެއްލޭ ގޮތައް ހުށަހެޅި އިސްލާހު ހިމެނޭ ގޮތުން، ޤާނޫނު އަސާސީ އަށް ބަދަލު ގެންނަން ހުށަހެޅި ބިލު 69 މެންބަރުންގެ ވޯޓުން މަޖިލީހަށް ބަލައިގަންނަން ފާސް ކުރީ ބުދަ ދުވަހުގެ މެންދުރު ކުރިންނެވެ. މުޅި މަޖިލީހުގެ ކޮމިޓީގައި ނެގި ވޯޓުގައި ބިލު ފާސްކުރަން ހާޒިރުވެ ތިބި 89 މެންބަރުންގެ ތެރެއިން 75 މެންބަރުން ވޯޓުދެއްވިއެވެ. މުޅި މަޖިލީހުގެ ކޮމިޓީގައި ވެސް ބިލު ފާސްކުރަން ނުފެންނަ ކަމަށް ވޯޓުދެއްވީ އެންމެ 13 މެންބަރުންނެވެ.

ސަރުކާރުން އެ ބިލުގައި ގާނޫނު އަސާސީ އަށް ގެންނަން ހުށަހަޅާފައިވާ ބަދަލުތަކުގެ ތެރޭގައި، މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން މެމްބަރުކަން ގެއްލޭ ގޮތް ހެދުމާއި، ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ކަނޑައެޅުމާއި، ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ގާނޫނު އަސާސީގައި ކަނޑައެޅުން ހިމެނެއެވެ.