ފްލެޓު ލިބުނު މީހުންގެ ވަގުތީ ލިސްޓު އާންމު ކުރުން މުއްދަތެއް ނެތް ގޮތަށް ފަސްކޮށްފި
ފޯމް ބެލުމުގައި ކަށަވަރުކުރަންޖެހޭ ގިނަ ކަންކަން ހުރުމާ ގުޅިގެން މި މަސައްކަތްތައް ނިންމުމަށް އިތުރު މުއްދަތު ބޭނުންވާ ކަމަށް ބުނޭ
ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ.އަލީ ހައިދަރު ވާހަކަދައްކަވަނީ
ގެދޮރުވެރިޔާ ސްކީމުގެ ދަށުން ކުރީ ސަރުކާރުން ފްލެޓު ދިން މީހުންގެ ލިސްޓު އާންމު ކުރުން މުއްދަތެއް ނެތް ގޮތަށް ފަސްކޮށްފިއެވެ.
ހޮނިހިރު ދުވަހު މިނިސްޓްރީ އޮފް ހައުސިންގ ލޭންޑް އެންޑް އާބަން ޑިވަލޮޕްމަންޓުން ނެރުނު ބަޔާނެއްގައި ބުނީ މާލެ ސަރަހައްދުން ފްލެޓު ދޫކުރުމަށް 26 ޖޫން 2022 ގައި ފަށާފައިވާ ގެދޮރުވެރިޔާ ސްކީމްގެ ދަށުން 15 ނޮވެންބަރު 2023 ގައި އިއުލާނުކުރި ފްލެޓު ލިބޭ ފަރާތްތަކުގެ ދާއިމީ ލިސްޓް އެކުލަވައިލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރި ކަމަށް ތުހުމަތުކޮށް އާއްމު ފަރާތްތަކަކުން އެންޓި ކޮރަޕްޝަން ކޮމިޝަން (އޭސީސީ)އަށް ހުށަހަޅާފައިވާ ކަމަށެވެ.
މި މައްސަލައާއި ގުޅިގެން އެކޮމިޝަނުން މިނިސްޓްރީއަށް އަންގާފައިވާ ކަންކަން ބެލުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ލަފާފުޅުގެ މަތިން އެކުލަވާލެވުނު ހައުސިންގ އެޑްވައިޒަރީ ކޮމިޓީއާއި ހައުސިންގ ކޮންސަލްޓޭޓިވް ކޮމިޓީގެ ލަފާގެ މަތިން އެ ސްކީމްގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތަކެއް މުރާޖާކުރުމުގެ (ރީ-އިވެލުއޭޝަންގެ) އެންމެހައި މަސައްކަތްތައް ކުރަމުންދާ ކަމަށެވެ.
ކުރިން އާއްމު ކުރެވިފައިވާ ''ގޮދުވެރިޔާ'' ސްކީމުގެ އުސޫލުގެ ދަށުން ހުށަހަޅާފައިވާ 20،697 އެޕްލިކޭޝަން ފޯމް ބެލުމުގައި ކަށަވަރުކުރަންޖެހޭ ގިނަ ކަންކަން ހުރުމާ ގުޅިގެން މި މަސައްކަތްތައް ނިންމުމަށް އިތުރު މުއްދަތު ބޭނުންވާކަން ފާހަގަކޮށް ހައުސިން މިނިސްޓްރީން ބުނީ މި ސްކީމުގެ ވަގުތީ ލިސްޓާއި ރީ-އިވެލުއޭޝަން އާ ގުޅިގެން ކުރިއަށް ގެންދެވުނު މަސައްކަތްތަކުގެ ތަފްސީލުތައް މިމަސައްކަތްތައް ނިމުނުހާ އަވަހަށް އާންމު ކުރާނެ ކަމަށެވެ.
މިނިސްޓްރީން ބުނީ މި މަސައްކަތްތަކަށް އިތުރު މުއްދަތު ދިޔަކަމުގައި ވިޔަސް ސަރުކާރުގެ މަގުސަދަކީ މި ސްކީމުން ފްލެޓު ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރުކުރުން ކަމަށެވެ. އަދި މި ސްކީމުގެ ދަށުން ތަރައްގީ ކުރާ ފްލެޓުތައް ދޫކުރެވޭނީ ހައްގުވެރިންނަށް ކަން ޔަގީން ކުރާނެ ކަމަށް މިނިސްޓްރީން ބުނެއެވެ.
ފުލެޓު ލިސްޓު ހާމަކުރުން މުއްދަތެއް ނެތް ގޮތަށް ފަސްކޮށްފައި ވާއިރު، ހައުސިން މިނިސްޓަރު ޑރ.އަލީ ހައިދަރު ފުރަތަމަ ވިދާޅުވީ އޮކްޓޫބަރު މަސް ނިމުމުގެ ކުރިން ލިސްޓު އިއުލާން ކުރާނެ ކަމަށެވެ. ނަމަވެސް އެމަހުގެ 28 ވަނަ ދުވަހު ނެރުނު ބަޔާނެއްގައި މިނިސްޓްރީން ބުނެފައިވަނީ އިތުރު ވަގުތު ބޭނުންވާ ކަމަށެވެ. އޭގެފަހުން 7 ނޮވެންބަރު 2024ވީ ބުރާސްފަތި ދުވަހު މިނިސްޓަރު ހައިދަރު ވިދާޅުވީ ނޮވެންބަރު މަހުގެ ދެ ވަނަ ހަފްތާ ނިމުމުގެ ކުރިން ފްލެޓުގެ ވަގުތީ ލިސްޓު ހާމަކުރާނެ ކަމަށެވެ.
މިދިޔަ ސަރުކާރުން ހިންގި ގެދޮރުވެރިޔާ ސްކީމުގެ ދަށުން 4,000 ފްލެޓް ލިބޭ ފަރާތްތައް ގެޒެޓްކޮށް، އޭގެ ތެރެއިން 3,778 ފަރާތާއެކު އެގްރީމެންޓް ވެސް ވަނީ ހަދާފައެވެ.
ފްލެޓް ދޫކުރުމުގެ މައްސަލައާ ގުޅޭގޮތުން އަދިވެސް ވާނުވާ ނޭނގޭ ކަމަށް ފްލެޓް ލިސްޓުގައި ހިމެނޭ ބައެއް ފަރާތްތަކުން ފާހަގަކޮށްފައިވާއިރު، ސަރުކާރުން ދައްކާ ވާހަކަތަކުގެ ރާގު އެކި ފަހަރު ބަދަލުވަމުންދާތީ އެކަމުގެ ކަންބޮޑުވުން އެތައް ފަހަރެއްގެ މަތިން ފާޅުކޮށް، ސިލްސިލާކޮށް މުޒާހަރާވެސް ދަނީ ކުރަމުންނެވެ.
ރައީސް މުއިއްޒު ރިޔާސީ އިންތިޚާބުގައި، ސަރުކާރުގެ ތައްގަނަޑު ޖެހި ލިޔުމެއް އޮވެއްޖެ ނަމަ، ފްލެޓާއި ގޯތި ލިބުނު ފަރާތްތަކަށް ވެރިކަން ލިބިވަޑައިގެންފި ނަމަ އެތަންތަންތަން ހަވާލު ކުރައްވާނެ ކަމަށް ވަނީ ވިދާޅުވެފައެވެ. ގިނަ ބަޔަކު ބުނަމުން ދަނީ މުއިއްޒުގެ ސަރުކާރުން ފްޕެޓާއި ގޯތީގެ މައްސަލައިގައި އަމަލު ކުރަމުން ދަނީ ވައުދާ އެއް ގޮތަށް ނޫން ކަމަށެވެ.
