އިޒްރޭލު ސިފައިން ޣައްޒާގައި ދިގު މުއްދަތަކަށް ތިބެން ތައްޔާރުވަމުން ދާ ކަމަށް އިޒްރޭލުގެ ނޫހަކުން ބުނެފި

އިޒްރޭލު ސިފައިން ޣައްޒާގައި ދިގު މުއްދަތަކަށް ތިބެން ތައްޔާރުވަމުން ދާ ކަމަށް އިޒްރޭލުގެ ނޫހަކުން ބުނެފި އެވެ.

"މިހާރު އެތަނުގެ ޙާލަތު ހުރިގޮތުން، އިޒްރޭލު ސިފައިން 2026 ގެ ކުރިން ޣައްޒާއިން ފައިބާނެ ކަމަކަށް ނުފެނެއެވެ،" އިޒްރޭލުގެ ނޫސް ހާރެޓްޒް އަށް މައުލޫމާތު ދެމުން ޣައްޒާ އަށް އަރައިގަނެގެން އުޅޭ އިޒްރޭލު ސިފައިންގެ ފައުޖުގައި ހިމެނޭ މީހަކު ބުދަ ދުވަހު ބުނެފައިވެއެވެ.

ފަލަސްތީނު ސަރަޙައްދުގައި އިޒްރޭލުން އިމާރާތްތަކާއި، ފުޅާ މަގުތަކާއި، ފެނާއި، ނަރުދަމާއާއި ކަރަންޓުގެ ވިއުގަތައް ޤާއިމުކުރަމުންދާ ކަމަށް ވެސް އެ ނޫހުގައި ބުނެފައިވެއެވެ.

"މަސައްކަތް ކުރިއަށްދަނީ ވަރަށް ބާރަށެވެ. މީގެ ކުޑަ ދުވަސްކޮޅެއް ކުރިން ވިރާނާވެފައިވާ ސަރަހައްދެއް މިހާރު ވަނީ ހަރަކާތްތެރި ކޮންސްޓްރަކްޝަން ސައިޓަކަށް ބަދަލުވެފައެވެ. ފުޅާ މަގުތައް ހަދަމުން ދާއިރު، މޯބައިލް އެންޓެނާތައް ބެހެއްޓެމުންދެއެވެ. ފެނާއި، ނަރުދަމާއާއި ކަރަންޓުގެ ވިއުގަތައް ޤާއިމުކުރެވެމުންދާއިރު، އިމާރާތްތައްވެސް ކުރެވެމުންދެއެވެ. އޭގެ ތެރެއިން ބައެއް އިމާރާތްތަކަކީ ޕޯޓަބަލް އިމާރާތްތަކެވެ. އަނެއްބައި އިމާރާތްތަކަކީ އެނޫން ބާވަތްތަކުގެ އިމާރާތްތަކެވެ،" ހާރެޓްޒްގައި ބުނެފައިވެއެވެ.

"ތަރައްޤީގެ މަސައްކަތް ދަނީ ފުރިހަމަ ބާރުމިނުގައެވެ. އަދި އެކަމުގެ މަޤްޞަދު - އެކަމާ ބެހޭގޮތުން ހާމަކަމާ އެކު ވާހަކަ ދެކެވުނަސް، ނުދެކެވުނަސް - ވަރަށް ސާފެވެ: އެއީ ސިފައިން އެތަނުގައި ދިގު މުއްދަތަކަށް ތިބުމަށް ބޭނުންވާ އިންފްރާސްޓްރަކްޗަރ ޤާއިމުކުރުމެވެ." އެ ނޫހުގައި ވެއެވެ.

ރިޕޯޓުގައި ބުނެފައިވާ ގޮތުގައި، ސިފައިން މަސައްކަތް ކުރަމުން ދަނީ ފަލަސްތީނުގެ އެ ސަރަޙައްދުގެ އެކި ހިސާބުތަކުގައި މަދުވެގެން ހަތަރު ސަރަޙައްދެއް އެމީހުންގެ ބާރުގެ ދަށުގައި ބޭއްވުމަށެވެ. ޚާއްޞަކޮށް "ނެޓްޒަރިމް ކޮރިޑޯ" ގައެވެ.

އިރުމަތިން ހުޅަނގަށް ދެމިގެންދާ ނެޓްޒަރިމް ކޮރިޑޯ ގާއިމުކުރީ އިޒްރޭލު ސިފައިންނެވެ. ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގެ ފުރަތަމަ ދުވަސްކޮޅު އުފެއްދި މި ކޮރިޑޯގެ ބޭނުމަކީ ޣައްޒާ ދެބަޔަކަށް ބައިކޮށް، ހަނގުރާމައިން ރައްކާތެރިކަން ހޯދަން ދިޔަ ފަލަސްޠީނުގެ ރައްޔިތުންނަށް ޣައްޒާގެ އުތުރު ސަރަޙައްދަށް އަނބުރާ އައުމަށް ހުރަސް އެޅުމެވެ.

މިއަހަރުގެ ކުރީކޮޅު ހާރެޓްޒް ނޫހުން ރިޕޯޓުކުރި ގޮތުގައި "މުއްދަތެއް ނެތް" ގޮތަށް އިޒްރޭލު ސިފައިން ޣައްޒާގައި ދެމި ތިބުމަކީ ގާނޫނާ ޚިލާފަށް ޔަހޫދީން ފަލަސްތީނު ބިމުގައި އާބާދު ވުމަށް މަގުފަހިކުރުމެވެ.

އިޒްރޭލުން ޣައްޒާގައި ހަނގުރާމަ ފެށީ 7 އޮކްޓޯބަރ 2023 ގައެވެ.

އިޒްރޭލުން ޣައްޒާގައި ހިންގަމުންދާ ލާއިންސާނީ ހަމަލާތަކުގެ ސަބަބުން މިހާތަނަށް 43،600 ށް ވުރެ ގިނަ ފަލަސްޠީނުގެ ރައްޔިތުން ޝަހީދުވެފައިވެއެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި 103،000 އަށްވުރެ ގިނަ މީހުން ޒަޚަމްވެފައިވެއެވެ. މީގެ އިތުރުން އެތައް ހާސް މީހުން ވަނީ ގެއްލިފައެވެ.