މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ އަހަރީ ދުވަސް ފާހަގަކުރުމަށް ކޮންމެ އަހަރަކު ވެސް ފާހަގަ ކުރާ "ޓެކްސް ވީކް" ނިންމުމުގެ ގޮތުން ބާއްވާ "ތިކުދިންގެ ހަވީރު" މިއަދު ހުޅުމާލޭގެ ސެންޓްރަލް ޕާކް ގައި އޮންނާނެއެވެ.
މީރާއާ އެކު ދައުލަތުގެ މިނިވަން މުއައްސަސާތަކާއި ސަރުކާރުގެ ކުންފުނިތައް ވެސް ބައިވެރިވެގެން ބާއްވާ މި އިވެންޓްގައި 28 ސްޓޯލް އާއި 80 އަށްވުރެ ގިނަ ޙަރަކާތްތައް ކުރިއަށް ގެންދިއުމަށް ރޭވިފައިވާ ކަމަށް އެ އިދާރާއިން މައުލޫމާތުދެއެވެ. އޭގެ ތެރޭގައި ކުޑަކުދިންނާ ގުޅޭ ތަޢުލީމީ ޙަރަކާތްތަކާއި ކުޅިވަރާއި މުނިފޫހި ފިލުވުމުގެ އައިޓަމްތައް ވެސް ހިމެނޭ ކަމަށް އެ އިދާރާއިން ބުންޏެއެވެ.
މީރާގެ ހަތް ވަނަ އަހަރީ ދުވަހާ ގުޅިގެން މިއަހަރު ކުރިއަށް ގެންދިޔަ "ޓެކްސް ވީކް" ގައި ޓެކްސް ދައްކާ ފަރާތްތަކަށާއި ޢާއްމުންނަށް އަމާޒުކޮށްގެން ވަނީ "އޯޕަން ޑޭ" އެއް ބާއްވާފައެވެ. އޭގެ އިތުރުން މީރާގެ މުވައްޒަފުންނާއި ޢާއްމު ބައެއް ފަރާތްތަކުގެ ލޭ ހަދިޔާ ކުރުމުގެ ކޭމްޕެއް ވެސް ވަނީ މިދިޔަ ހަފްތާގައި ކުރިއަށް ގެންގޮސްފައެވެ.
