އދ ގެ އެހީގެ ގާފިލާއަކަށް ހުއްދަ ދިނުމާއެކު، ވަގުތީ ހިޔާތަކަށް އިޒްރޭލުން ހަމަލާދީފި

އުތުރު ޣައްޒާގައި ހާލުގައި ޖެހިފައިވާ ފަލަސްތީނުގެ ރައްޔިތުންނަށް އދ. އެހީގެ ގާފިލާއަކަށް ހުއްދަ ދިނުމާއެކު، ފަލަސްތީނުގެ ރައްޔިތުންގެ ވަގުތީ ހިޔާތަކަށް އިޒްރޭލުން ހަމަލާދީފިއެވެ.

އދ އިން ބުނެފައިވަނީ މި މަހު އިޒްރޭލުން ހިޞާރުކޮށްފައިވާ އުތުރު ޣައްޒާއަށް ވަނުމަށް ހުއްދަދީފައިވަނީ އެންމެ އެހީގެ މިޝަނަކަށް ކަމަށާއި، އަދި އެކަމަށް ހުއްދަ ދިނުމަށްފަހު ކުޑައިރުކޮޅެއްގެ ތެރޭގައި އެ ތަކެތި ބެހި ވަގުތީ ހިޔާވަހިތަކަށް އިޒްރޭލުން ހަމަލާދީފައިވާ ކަމަށެވެ.

އދ ގެ އެހީގެ ވެރިޔާ ވިދާޅުވެފައިވަނީ "ދުނިޔެއަށް ޣައްޒާ އިން ފެންނަމުންދަނީ އެންމެ ނުރައްކާތެރި ބައިނަލްއަޤްވާމީ ޖަރީމާތަކާ އެއްފަދަ ޢަމަލުތަކެއް" ކަމަށެވެ. އުތުރު ޣައްޒާ އަށް ކާނާ އާއި ބޭސްފަރުވާ ފޯރުކޮށްދިނުމަށް ހުރަސް އެޅުމަށްފަހު އިޒްރޭލުން ބުނެފައިވަނީ ޣައްޒާގައި ބަނޑަހައިހޫނުކަން ފެތުރިދާނެ ކަމަށް ބުނެ ދޭ އިންޒާރުތަކަކީ "ބަދުނާމުކުރުމުގެ ވާހަކަތަކެއް" ކަމަށެވެ.

ޣައްޒާއަށް އެހީ ފޯރުކޮށް ދިނުމަށް ހުރަސް އަޅާނަމަ، އިޒްރޭލަށް ދޭ އެހީ ހުއްޓާލުމަށް ދީފައިވާ 30 ދުވަހުގެ މުއްދަތު ހަމަވުމަމާއެކު، އެމެރިކާ އިން ބުނީ އިޒްރޭލަށް އެމެރިކާއިން އެހީތެރިކަން ދެމުންގެންދާނެ ކަމަށެވެ. އަނެއްކޮޅުން އެމެރިކާ އިން ދިން 30 ދުވަހުގެ މުއްދަތުގެ ތެރޭގައި ކަމެއް ރަނގަޅު ކުރުމުގެ ބަދަލުގައި، އެހީދޭ ޖަމާޢަތްތަކުން ބުނެފައިވަނީ މި މުއްދަތުގެ ތެރޭގައި އިޒްރޭލުން ޣައްޒާގެ ހާލަތު އިތުރަށް ގޯސްކޮށްފައިވާ ކަމަށެވެ.

ފާއިތުވި 24 ގަޑީއިރުގެ ތެރޭގައި އިޒްރޭލު ސިފައިންގެ ހަމަލާތަކުގައި ޣައްޒާގައި 64 މީހުން އަދި ލުބުނާނުގައި އިތުރު 28 މީހުން މަރާލާފައިވެއެވެ.

ޣައްޒާ އަށާއި ލުބުނާނަށް ހުއްޓުމެއް ނެތި އިޒްރޭލުން ބޮން އަޅަމުން ގެންދާއިރު، 7 އޮކްޓޯބަރ 2023 އިން ފެށިގެން މަދުވެގެން 43،665 ފަލަސްތީނު މީހުން މަރުވެ، 103،076 މީހުން ޒަޚަމްވެފައިވެއެވެ.

ލުބުނާނުގައި، އިޒްރޭލުގެ ހަމަލާތަކުގައި މަދުވެގެން 3،287 މީހުން މަރުވެފައިވާއިރު 14،222 މީހުން ޒަޚަމްވެފައިވެއެވެ.