ވޯލްޑް ބޮޑީބިލްޑިން މުބާރާތުގައި އަޒްނީން އަށް ރަން މެޑަލް

ރާއްޖޭގައި ކުރިއަށްދާ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގައި ވާދަކޮށް، ރާއްޖޭގެ އަޒްނީން ރަޝާދު ރަން މެޑަލް ހޯދައިފި އެވެ،

އައްޑޫ ސިޓީ ކެނަރީފް ރިޒޯޓުގައި ކުރިއަށް ދާ މުބާރާތުގައި ވާދަކޮށް އަޒްނީން ރަން މެޑަލް ހޯދީ ސްޕޯޓްސް ފީޒީކް 170 ސެންޓްމީޓަރު ކެޓަގަރީންނެވެ. މި އިވެންޓުގެ ރަން މެޑަލް އެންމެ ފުރަތަމަ އަޒްނީން ހޯދީ 2022 ވަނަ އަހަރު އެވެ. ތައިލެންޑުގައި އެ އަހަރު ކުރިއަށް ދިޔަ މުބާރާތުގައި ވާދަކޮށް އަޒްނީން ރަން މެޑަލް ހޯދިއިރު، މިދިޔަ އަހަރު ދެކުނު ކޮރެއާގައި ކުރިއަށް ދިޔަ މުބާރާތުން ވެސް އަޒްނީން ވަނީ ރަން މެޑަލް ހޯދައިފަ އެވެ. އެހެންކަމުން މިއީ ވޯލްޑް ބޮޑީބިލްޑިން މުބާރާތުގައި އަޒްނީން، ޖެހި ޖެހިގެން ރަން މެޑަލް ހޯދި ފަހަރެވެ.

ވޯލްޑް ބޮޑީބިލްޑިން މުބާރާތުގެ އިތުރުން، އަޒްނީން ވަނީ މި ކެޓަގަރީން އޭޝިއާ މުބާރާތުގައި ވެސް ޖެހި ޖެހިގެން ތިން ވަނަ ފަހަރަށް ރަން މެޑަލް ހޯދައިފަ އެވެ. އެގޮތުން 2022 ވަނަ އަހަރު ރާއްޖޭގައި އޮތް އޭޝިއާ މުބާރާތުގައި އަޒްނީން ރަން މެޑަލް ހޯދި އެވެ. އޭގެ ފަހުން 2023 ވަނަ އަހަރު ނޭޕާލުގައި ބޭއްވި އޭޝިއާގެ މުބާރާތް އަދި މިއަހަރު އިންޑޮނޭޝިއާގައި އޮތް އޭޝިއާ މުބާރާތުގައި ވެސް އަޒްނީން ވަނީ ރަން މެޑަލް ތަކުރާރުކޮށްފަ އެވެ.

މީގެ އިތުރުން މިއަހަރުގެ ވޯލްޑް ބޮޑީބިލްޑިން މުބާރާތުގައި ވާދަކޮށް ރާއްޖޭގެ ޝާހީން އިބްރާޙީމް ވެސް ވަނީ ރަން މެޑަލް ހޯދައިފަ އެވެ. އޭނާ ރަން މެޑަލް ހޯދާފައި ވަނީ ބޮޑީބިލްޑިން 55 ކިލޯ ކެޓަގަރީންނެވެ. މިއީ މި ކެޓަގަރީގައި ވާދަކޮށް ދިވެހި އެތުލީޓަކު ރަން މެޑަލް ހޯދި ފުރަތަމަ ފަހަރެވެ.