ރައީސްގެ ދެކަނބަލުން އާރަށަށް ކުރައްވާ ދަތުރުފުޅުތަކަށް ހަފްތާއަކު 7 ލައްކަވުރެ ގިނަ ފައިސާ ހަރަދު ކުރާ މައްސަލަ ސަރުކާރުން ދޮގެއް ނުކުރި

ރައީސް ޑރ.މުހައްމަދު މުއިއްޒުގެ ދެކަނބަލުން އާރަށަށް ކުރައްވާ ދަތުރުފުޅުތަކަށް ހަފްތާއަކު 7 ލައްކަވުރެ ގިނަ ފައިސާ ހަރަދު ކުރާ މައްސަލަ ސަރުކާރުން ދޮގެއް ނުކުރެއްވިއެވެ.

އެ ދެ ބޭފުޅުން އާރަށަށް ވަޑައިގަންނަވާއިރު އެއްކޮށްނާއި ވަކިވަކިން ވެސް އާރަށަށް ވަޑައިގަންނަވާ ކަަމަށް ވަނީ އަޑު ފެތުރިފައެވެ. އަދި ރައީސް ޑރ.މުހައްމަދު މުއިއްޒު ވެސް ކޮންމެ ދުވަހަކު ހެން އާރަށަށް ވަޑައިގަންނަވާ ކަމަށް ވަނީ އަޑު ފެތުރިފައެވެ. މިގޮތަށް ކުރައްވާ ދަތުރުފުޅުތަކުގައި ސަރުކާރުގެ އިސް މަޤާމުތަކުގައި ތިބި ބޭފުޅުންނާއި، ވަޒީރުން، މެމްބަރުންގެ އިތުރުން އެ ދެބޭފުޅުންގެ ގާތް ރަހުމަތްތެރިން އަރިހުގައި ގެންދަވާ ކަަމަށް ވަނީ އަޑު ފެތުރިފައެވެ. ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާރަށަށް ވަޑައިގަންނަވާ ހަފްތާއަކު 7 ލައްކަ އަށްވުރެ ގިނަ ފައިސާ ޚަރަދު ކުރައްވާ ކަމަށް ދެކެވޭ ވާހަކާއި ގުޅިގެން ސުވާލުކުރުމުން ސަރުކާރުން ވަނީ އެކަމަށް ސާފު ޖަވާބެއް ދޭން ދެކޮޅު ހައްދަވާފައެވެ. އެއީ ރައީސްއަށް ލިބިވަޑައިގަންނަވާ އިހުތިޔާރެއް ކަމަށް ރައީސް އޮފީހުގެ ތަރުޖަމާން ހީނާ ވަލީދު ވަނީ ވިދާޅުވެފައެވެ.

ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީން ވަނީ ރައީސް އާ ރަށަށް ވަޒީރުންނާއެކު ވަޑައިގަންނަވާއިރު، ހަފްތާއެއްގެ މައްޗަށް 7 ލައްކަ ރުފިޔާ ހޭދަވާކަމަށް މައުލޫމާތު ލިބިފައިވާތީ އެކަން ސާފުކޮށްދިނުމަށް އެދިފައެވެ. އެ ސުވާލުގެ ޖަވާބުގައި ހީނާ ވިދާޅުވީ ރައީސް މުއިއްޒު، ރައީސް ކަމުގައި ހުންނެވުމުގެ ސަބަބުން އެމަނިކުފާނަށް އާރަށަށް ވަޑައިގެންނެވުމުގެ އިޚްތިޔާރު ލިބޭ ކަމަށެވެ. އަދި އާރަށުގައި ވަޒީރުންނާއެކު ބައްދަލުވުންތައް ބޭއްވުމަކީ ރައީސްގެ އިޚުތިޔާރީ ކަމެއް ކަމަށް ފާހަގަކުރެއްވިއެވެ. އެހެންނަމަވެސް އެކަމަށް ހޭދަވާ ޚަރަދުގެ ތަފްސީލުތައް އޭނާ ހިއްސާކުރައްވާފައެއް ނުވެއެވެ.

ރައީސްގެ އިތުރުން އެމަނިކުފާނުގެ އަނބިކަނބަލުން ސާޖިދާ މުހައްމަދު ވަރަށް ގިނައިން އެރަށަށް ވަޑައިގަންނަވާ ކަމަށް އިތުބާރު ހުރި ގޮތަކަށް ރާއްޖެ އެމްވީ އަށް ވަނީ ލިބިފައެވެ. އަދި މި ދަތުރުތަކުގައި އަރިސް ބޭފުޅުން ގެންދަވާ އިރު އެ މީހުންގެ ކެއިންބުއިން ފަދަ ޚަރަދުތަކަށް ވެސް ބޮޑު އަދަދެއް ހޭދަކުރާކަމަށް ވަނީ މައުލޫމާތު ލިބިފައެވެ. ރާއްޖޭގެ މާލީ ހާލަތު ދަށް ކަމަށް ބުނެ، ޚަރަދު ކުޑަކުރުމުގެ ފިޔަވަޅުތަކެއް އަޅަމުންދާ ކަމަށް ސަރުކާރުން ބުނަމުން ދާއިރު އާރަށަށް މިހާ ބޮޑު ހޭދައެއް ކުރުމާއި، ސަރުކާރުގެ ދަތުރުތަކަށް ބޮޑު ހޭދައެއް ކުރާތީ އާއްމުން ދަނީ ކަންބޮޑުވުން ފާޅުކުރަމުންނެވެ. އެކަމާއި ގުޅިގެންގިނަ ބައެއްގެ ފާޑު ކިޔުން ވެސް ސަރުކާރަށް ވަނީ އަމާޒުވެފައެވެ. މީގެ އިތުރުން ރައީސް މުއިއްޒުގެ ވެރިކަމުގައި އާރަށުގައި 24 ގަޑީއިރު ސިފައިންގެ ޚާއްސަ ޔުނިޓްތަކުން ޑިއުޓީ ކުރާ ގޮތަށް ހަމަޖައްސަައި، ސެކިއުރިޓީ ވެސް ވަނީ ވަރުގަދަކޮށްފައެވެ.