ޓީޖީއެސްޓީ 17 އިންސަތައަށް ބޮޑުކުރަން ފާސްކޮށްފި

ފަތުރުވެރިކަމުގެ ދާއިރާއިން ނަގާ ޓެކްސް 17 އިންސައްތައަށް ބޮޑުކުރަން މަޖިލީހުން ފާސްކޮށްފިއެވެ.

ބުރާސްފަތި ދުވަހު ބޭއްވި މަޖިލީހުގެ ޖަލްސާގައި ވަނީ ޓީޖީއެސްޓީ، ގްރީން ޓެކްސް އަދި އެއާޕޯޓު ފީ އާއި ޓެކްސްތައް ބޮޑު ކުރަން ސަރުކާރުން ރައްޔިތުންގެ މަޖިލީހަށް ހުށަހަޅާފައި އޮތް ތިން ބިލު ވެސް އެއްވެސް ބަދަލެއް ނުގެނެސް ފާސްކޮށްފައެވެ. ޓެކްސް އާއި ފީ ބޮޑުކުރަން ގާނޫނުތަކަށް ހުށަހެޅި އިސްލާހުތައް ފާސްކުރީ ސަރުކާރު މެންބަރުންގެ އިއްތިފާގުންނެވެ. އަދި ބިލުތަކާ ދެކޮޅަށް އެމްޑީޕީގެ 8 މެންބަރުން ވޯޓު ދެއްވިއެވެ.

މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ހުށައެޅީ ފަތުރުވެރިކަމުގެ ދާއިރާއިން ނަގަމުން އަންނަ ޓީޖީއެސްޓީ ބޮޑު ކުރުމަށެވެ. އެގޮތުން މިހާރު ޓީޖީއެސްޓީގެ ގޮތުގައި 16 އިންސައްތަ ނަގަމުންދާއިރު އަންނަ އަހަރުގެ ޖޫން މަހުން ފެށިގެން އެ އަދަދު 17 އިންސައްތައަށް ބޮޑުކުރަން ބިލުގައި ހިމެނި ނަމަވެސް ކޮމެޓީން ގެނައި ބަދަލައެކު މަޖިލީހުން ފާސްކުރީ އަންނަ އަހަރުގެ ޖޫން މަހުގެ ނިޔަލަށް ޓީޖީއެސްޓީގެ ގޮތުގައި 16 އިންސައްތަ ނަގައި ޖުލައި މަހުން ފެށިގެން 17 އިންސައްތަ ބޮޑުކުރުމަށެވެ.

މީގެ އިތުރުން ގްރީން ޓެކްސް ބޮޑުކުރުމަށް ޓޫރިޒަމާ ބެހޭ ގާނޫނަށް ގެނައި އިސްލާހު ފާސްކޮށްފައިވާއިރު، އަންނަ އަހަރުގެ ޖުލައި މަހުން ފެށިގެން ގްރީން ޓެކްސްގެ ގޮތުގައި މިހާރު 6 ޑޮލަރު ދައްކަމުންދާ ތަންތަނުން ޓޫރިސްޓަކަށް ދައްކަން ޖެހޭނީ 12 ޑޮލަރެވެ. އަދި މިހާރު 3 ޑޮލަރު ދައްކަން ޖެހޭ ތަންތަނުން ދައްކަން ޖެހޭނީ 6 ޑޮލަރެވެ.

އަދި ރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާ ބެހޭ ގާނޫނަށް ގެނައި އިސްލާހު ފާސްކުރުމާއެކު އިކޮނޮމީ ކްލާހުގައި ދަތުރުކުރާ ބިދޭސީންގެ އަތުން 50 ޑޮލަރު ނެގުމަށާއި ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން 120 ޑޮލަރު، ފަސްޓް ކްލާހުގައި ދަތުރުކުރާ ދިވެހީންނާއި ބިދޭސީންގެ އަތުން 240 ޑޮލަރު އަދި ޕްރައިވެޓް ޖެޓުގައި ދަތުރު ކުރާ ދިވެހީންނާއި ބިދޭސީންގެ އަތުން 480 ޑޮލަރު ނަގާނެއެވެ.

މަޖިލީހުސް ފާސްކުރި އިސްލާހުތަކާއެކު ދައުލަތަށް އިތުރަށް 200 މިލިއަން ރުފިޔާ ލިބޭނެ ކަމަށް ވަނީ އަންދާޒާކޮށްފައެވެ.