އެއްވެސް އިންޒާރެއް ދިނުމެއްނެތި އިޒްރޭލު ސިފައިން ހަމަލާދީ މަދުވެގެން 70 ފަލަސްތީނު މީހުން ޝަހީދު ކޮށްލައިފި
7 އޮކްޓޯބަރު 2023 އިން ފެށިގެން އިޒްރޭލުން ދީފައިވާ ހަމަލާތަކުގައި ޣައްޒާގައި މަދުވެގެން 42،519 މީހުން މަރުވެ، 99،637 މީހުން ޒަޚަމްވެފައިވޭ
ބައިތު ލަހިޔާގެ ފުނޑުވެފައިވާ އިމާރާތްތަކުގެ ތެރެއިން މީހަކު ހިނގާފައިދަނީ - ޖޫން 2024
އެއްވެސް އިންޒާރެއް ދިނުމެއް ނެތި ޣައްޒާގެ އުތުރުގައި އޮންނަ ބައިބޯ ސަރަހައްދެއް ކަމަށްވާ ބައިތު ލަހިޔާ އަށް އިޒްރޭލުން ހޮނިހިރު ދުވަހުގެ ރޭ ދިން ހަމަލާއެއްގައި މަދުވެގެން 73 ފަލަސްތީނު މީހުން ޝަހީދު ވެއްޖެއެވެ.
ޣައްޒާ ސަރުކާރުގެ މީޑިއާ އޮފީހުން ބުނާ ގޮތުގައި ގިނަ އަދަދެއްގެ މީހުން އަދިވެސް ވަނީ ވެއްޓިފައިވާ އިމާރާތްތަކުގެ ދަށުގައި ތާށިވެފައެވެ. އެހެން ކަމުން މިހަމަލާގައި މަރުވި މީހުންގެ އަދަދު އިތުރުވާނެ ކަމަށް ލަފާކުރެވެއެވެ.
މަންޒަރު ދުށް މީހުން ބުނެފައިވަނީ، ވައިގެ މަގުން އިޒްރޭލު ސިފައިން ފުލުފުލުން ދިން ހަމަލާގެ ވަރުގަދަ ކަމާއެކު އިމާރާތްތަކުގެ ފައުންޑޭޝަންތަކަށް ގުޑުން އަރައިގެން ދިޔަކަމަށެވެ.
ބައިތު ލަހިޔާ އަށް ހަމަލާ ދިން އިރު، ޣައްޒާ ސްޓްރިޕްގެ އުތުރުގައި މުވާސަލާތީ ޚިދުމަތްތައް ވަނީ ކަނޑާލާފައެވެ. މި ސަރަހައްދު އިޒްރޭލުން ހިސޯރުކޮށްގެން ތިބޭތާ 16 ފާއިތުވެފައިވާ އިރު ކާނާއާއި، ފެނާއި، ބޭހާއި އަދި އެހެނިހެން މުހިންމު ވަސީލަތްތައް މި ސަރަހައްދަށް ފޯރުން ވަނީ މުޅިން ހުއްޓުމަކަށް އައިސްފައެވެ.
ޣައްޒާގެ ދެކުނުގައި، ޚާން ޔޫނިސް ކައިރީގައި އުމްރާނީ ވަސީލަތްތައް މަރާމާތުކުރަން ދިޔަ ހަތަރު އިންޖިނޭރުންނާއި މަސައްކަތްތެރިންނަށް އިޒްރޭލު ސިފައިން ހަމަލާދީ މަރާލާފައިވާ ކަމަށް އެހީ ފޯރުކޮށްދޭ ޖަމްއިއްޔާ އެއް ކަމަށްވާ އޮކްސްފާމްއިން ބުނެފައިވެއެވެ.
7 އޮކްޓޯބަރު 2023 އިން ފެށިގެން އިޒްރޭލުން ދީފައިވާ ހަމަލާތަކުގައި ޣައްޒާގައި މަދުވެގެން 42،519 މީހުން މަރުވެ، 99،637 މީހުން ޒަޚަމްވެފައިވެއެވެ.
