ޝެއިޚް ހަސީނާ ހައްޔަރު ކުރަން ކޯޓު އަމުރު ނެރެފި

އިންޑިއާއަށް ފިއްލަވައިގެން ވަޑައިގެންނެވި ބަންގްލަދޭޝްގެ ކުރީގެ ވެރިޔާ ޝެއިޚް ހަސީނާ ހައްޔަރުކުރުމުގެ އަމުރެއް ބަންގްލަދޭޝްގެ ކޯޓަކުން ބުރާސްފަތި ދުވަހު ވަނީ ނެރެފިއެވެ.

ޝެއިޚް ހަސީނާ ގައުމުން ފިއްލެވީ މިދިޔަ އޯގަސްޓް މަހު ބަންގްލަދޭޝް ޔުނިވަރސިޓީ  ދަރިވަރުންގެ އިސްނަގައިގެން ހިންގި އިންޤިލާބަކުން އޭނާގެ ވެރިކަން ވައްޓާލުމާ ގުޅިގެންނެވެ.

"ކޯޓުން ވަނީ... ކުރީގެ ބޮޑުވަޒީރު ޝެއިޚް ހަސީނާ ހައްޔަރުކޮށް، ނޮވެމްބަރު 18 ވަނަ ދުވަހު ކޯޓަށް ހާޒިރުކުރުމަށް އަމުރުކޮށްފައި،" ބަންގްލަދޭޝްގެ އިންޓަނޭޝަނަލް ކްރައިމްސް ޓްރައިބިއުނަލް (އައިސީޓީ) ގެ ޕްރޮސެކިއުޓަރ މުޙައްމަދު ތާޖުލް އިސްލާމް ބުރާސްފަތި ދުވަހު ނޫސްވެރިންނަށް މައުލޫމާތު ދެމުން ބުންޏެވެ.

ހަސީނާގެ 15 އަހަރުގެ ވެރިކަމުގައި އިންސާނީ ޙައްޤުތަކަށް ފުޅާ ދާއިރާއެއްގައި އަރައިގަތުމުގެ ޢަމަލުތައް ހިންގާފައިވާ ކަމުގެ ތުހުމަތު ވަނީ ކުރެވިފައެވެ. މީގެ ތެރޭގައި އޭނާގެ ސިޔާސީ ވާދަވެރިން ގަވާއިދާ ޚިލާފަށް ހައްޔަރުކުރުމާއި މަރާލުން ފަދަ ކުށްތައް ހިމެނެއެވެ.

އުމުރުން 77 އަހަރުގެ ހަސީނާ ބަންގްލަދޭޝް ދޫކޮށް ވަޑައިގެންނެވި ފަހުން އާންމުކޮށް ފެނިފައެއް ނުވެއެވެ. އަދި އޭނާ އެންމެ ފަހުން ހުންނެވި ކަމަށް ބެލެވެފައިވަނީ އިންޑިއާގެ ވެރިރަށް ނިއު ދިއްލީ ކައިރީގައި ހުންނަ މިލިޓަރީ އެއަރބޭސްއެއްގައެވެ.

އިންޑިއާގައި އޭނާ ހުންނެވުމުން ބަންގްލަދޭޝް އިން ވަނީ ރުޅިގަދަވެފައެވެ.

ޑާކާއިން ވަނީ ހަސީނާގެ ޑިޕްލޮމެޓިކް ޕާސްޕޯޓު ބާޠިލުކޮށްފައެވެ.

ބަންގްލަދޭޝް އާއި އިންޑިއާ އާ ދެ ޤައުމުގެ ދެމެދުގައި ކުށްވެރިން އަނބުރާ ފޮނުވާލުމުގެ މުޢާހަދާއެއް ހަދާފައިވުމާއެކު، މި މުޢާހަދާގެ ދަށުން އޭނާ ޖިނާއީ ޝަރީޢަތަކަށް ކުރިމަތިލުމަށް އަނބުރާ ގެނައުމުގެ ފުރުޞަތު އެބައޮތެވެ.

އެހެން ނަމަވެސް ކުށްވެރިން ބަދަލު ކުރުމުގެ އެއްބަސްވުމުގައި އޮންނަ ގޮތުން، ތުހުމަތު ކުށަކީ "ސިޔާސީ ސިފައެއް" އޮތް ކުށެއްނަމަ، އަނބުރާ ފޮނުވާލުމަށް އިންކާރުކުރެވިދާނެއެވެ.

ހަސީނާގެ ހައްޔަރުކުރުމުގެ އަމުރަކަށް އެދުނު އައި.ސީ.ޓީ އަކީ 1971 ވަނަ އަހަރު ޕާކިސްތާނުން މިނިވަންވުމުގެ ހަނގުރާމައިގައި ހިންގާފައިވާ އަނިޔާވެރި ޢަމަލުތައް ތަޙްޤީޤުކުރުމަށް ޝޭޚް ހަސީނާގެ ސަރުކާރުން 2010 ވަނަ އަހަރު އުފެއްދި މުއައްސަސާއެކެވެ.