ފިނިފެންމާ ގޮއްވާލި މައްސަލަ: ވަޒީފާއިން ވަކިކުރި މޫސާ ޒަމީރަށް ގެއްލުމުގެ ބަދަލުގެ މިންވަރު ކަނޑައަޅަން އަންގައިފި
ވަޒީފާ އިއާދަކޮށްދޭން އަންގާނެ ތަނެއް ނެތް
ރިޔާސީ ލޯންޗްގައި އެއްޗެއް ގޮވި މައްސަލަ
ފިނިފެންމާ ލޯންޗް ގޮއްވާލި ހާދިސާއާއި ގުޅިގެން، އެމްއެންޑީއެފްގެ ވަޒީފާ އަދާކުރަމުންދިޔަ މުސާ ޒަމީރު ވަޒީފާއިން ވަކިކުރި މައްސަލައިގައި ބަދަލު ހަމަޖައްސަން ހައިކޯޓުން ސިވިލް ކޯޓަށް ތަހުވީލުކޮށްފިއެވެ.
2015 ސެޕްޓެމްބަރު މަހުގެ ފަހުކޮޅު ހިނގި އެ ހާދިސާގައި ފިނިފެންމާ ލޯންޗްކޮޅަށް އަރައި، އެތަނުގައި ހުރި ހެކިތައް ހުއްދަ ނެތި ގެންދިޔަ ކަމަށް ބުނެ ދައުވާކުރީ ސިފައިންގެ ދެ މީހުން ކަމަށްވާ ޒަމީރާއި އަހުމަދު ތިހާމްގެ މައްޗަށެވެ. އަދި އެދެމީހުން ވަޒީފާއިން ވަކިކުރިއެވެ. އަދި އެ މައްސަލައިގައި ހަތަރު މަހާއި 24 ދުވަހަށް ޖަލަށްލާން ކްރިމިނަލް ކޯޓުން ހުކުމް ވެސް ކުރިއެވެ.
ނަމަވެސް އެ ހުކުމް އިސްތިއުނާފުކޮށް ޒަމީރުގެ ޖަލު ހުކުމް 2019 ވަނަ އަހަރު ހައި ކޯޓުން ބާތިލްކުރިއެވެ. އަދި އޭނާއަށް ސިފައިންގެ ވަޒީފާ އަނބުރާ ދިނުމަށާއި ބަދަލުގެ ގޮތުގައި އެއް މިލިއަން ރުފިޔާ ހޯދަން ނަގައިދޭން ސިވިލް ކޯޓަށް އޭނާ ހުށަހެޅިއެވެ.
ނަމަވެސް ސިވިލް ކޯޓުން ނިންމީ އޭނާ ވަޒީފާއިން ވަކިކޮށްފައިވަނީ ސިފައިންކުރާ ކުށްތަކަށް އަދަބު ދިނުމުގެ ގަވައިދާ އެއްގޮތަށް ކަމުން ވަޒީފާ އިއާދަކުރަން އަންގާނެ ތަނެއް ނެތް ކަމަށެވެ. އަދި މީހެއްގެ މައްޗަށް އަންނަ ހުކުމަކާ ގުޅިގެން ވަޒީފާއިން ވަކިކުރާ ސިފައިންނަށް، އެ ހުކުމް ފަހުން ބާތިލުކުރިޔަސް އެ ވަޒީފާއަށް ރުޖޫއަ ކޮށްދޭންޖެހޭނެ ކަމަށް ސިފައިންގެ ގާނޫނު ބުނެފައިނުވާތީ ގެއްލުުމުގެ ބަދަލު ނަގައިދެވެން ނެތް ކަމަށް ވެސް ސިވިލް ކޯޓުން ނިންމާފައިވެއެވެ.
އަދި މި މައްސަލަ ހައިކޯޓުގައި އިސްތިއުނާފުކުރިއެވެ. ހައިކޯޓުގައި މި މައްސަލަ އިސްތިއުނާފުކުރުމުން، ހައިކޯޓުން ވަނީ މޫސާ ޒަމީރަށް ނަގައިދެވޭނެ ގެއްލުމުގެ ބަދަލުގެ މިންވަރު ކަނޑައެޅުމަށް އަމުރުކޮށް ސިވިލް ކޯޓަށް މައްސަލަ ފޮނުވުމަށް އަމަރުކޮށްފައެވެ.
ހައިކޯޓުގެ ހުކުމުގައި ވަނީ ޒަމީރަށް ސިފައިންގެ ވަޒީފާ އަނބުރާ ދޭން ނުޖެހޭ ކަމަށެވެ. އެހެންކަމުން އެ މައްސަލާގައި އެންމެ އަދުލުވެރި ގޮތަކީ ވަޒީފާ އަލުން އިޔާދަ ކުރުމުގެ ބަދަލުގައި ގެއްލުމުގެ ބަދަލު ނަގައި ދިނުން ކަމަށް އެ ހުކުމްގައިވެއެވެ.
