ތެލެސީމިއާ ހޮސްޕިޓަލެއް ތަރައްޤީކުރަން ސޮއިކޮށްފި
16 އޮކްޓޯބަރު 2024 | ބުދަ 02:24ސަރުކާރުން ބުނެފައިވަނީ މި ހޮސްޕިޓަލަކީ އެންމެ ޒަމާނީ ވަސީލަތްތަކާއެކު ތެލަސީމިއާ ކުދިންނަށް ބޭނުންވާ ފަރުވާތައް ދެވޭގޮތަށް އިމާރާތް ކުރާ ހޮސްޕިޓަލެއް ކަމަށް
10 އަހަރުގެ ތެލެސީމިއާ ޕްރިވެންޝަން، މެނޭޖްމަންޓް އެންޑް ކޮންޓްރޯލް މާސްޓަރ ޕްލޭން އިފްތިތާހް ކުރުމަށް ބޭއްވި ރަސްމިއްޔާތުގެ ތެރެއިން
ތެލެސީމިއާ އަށް ފަރުވާ ދެވޭ ގޮތަށް ހުޅުމާލެ ފޭސް ދޭއް ގައި ހޮސްޕިޓަލެއް އިމާރާތް ކުރުމުގެ އެމްއޯޔޫއެއްގައި އަންގާރަ ދުވަހުގެރޭ ސޮއިކޮށްފިއެވެ.
އެ އެއްބަސްވުމުގައި ސޮއިކުރީ ކުރިއަށް އޮތް 10 އަހަރަށް އެކުލަވައިލި "ތެލެސީމިއާ ޕްރިވެންޝަން އެންޑް ކޮންޓްރޯލް މާސްޓަޕްލޭން" އިފްތިތާހު ކުރުމަށް ކްރޮސް ރޯޑްސް މޯލްޑިވްސްގައި ބޭއްވި ރަސްމިއްޔާތުގަ އެވެ.
ހޮސްޕިޓަލު އިމާރާތްކުރުމަށް މާލީ އަދި ފަންނީ އެހީތެރިކަން ފޯރުކޮށްދޭން ހަމަޖެހިފައިވަނީ ސައިނޯމާ އިންޖީނިއަރިންގ އިންޑަސްޓްރީ ކުންފުނިން ކަމަށާއި މި ހޮސްޕިޓަލުގަ ހިންގާ ބަލަހައްޓަން ހަމަޖެހިފައިވަނީ މެލޭޝިޔާގެ މެޑޯ އޭޝިއާ ކުންފުނިން ކަމަށް ސަރުކާރުން ބުނެއެވެ.
އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ހެލްތު މިނިސްޓަރ އަބްދުﷲ ނާޒިމް އިބްރާހިމް އެވެ. މެލޭޝިޔާގެ މެޑޯ އޭޝިއާ ކުންފުނީގެ ފަރާތުން ސޮއިކުރީ ސީއީއޯ އަދި މެނޭޖިންގ ޑިރެކްޓަރ ސްޓުއާޓް ޖޭ ވެނަރ ޕެކް އެވެ. ޗިން ހިން އިންޖީނިއަރިން ގްރޫޕްގެ ފަރާތުން ސޮއި ކުރީ އެ ކުންފުނީގެ ސީއީއޯ ރޮޖަރ ލިމް ސްވީކިއެޓްއެވެ. އަދި ސައިނޯމާ އިންޖީނިއަރިންގ އިންޑަސްޓްރީގެ ފަރާތުން ސޮއި ކުރީ މެނޭޖިންގ ޑިރެކްޓަރު ލިއު ޓާއޯއެވެ.
ސަރުކާރުން ބުނެފައިވަނީ މި ހޮސްޕިޓަލަކީ އެންމެ ޒަމާނީ ވަސީލަތްތަކާއެކު ތެލަސީމިއާ ކުދިންނަށް ބޭނުންވާ ފަރުވާތައް ދެވޭގޮތަށް، ލެބޯޓްރީއާއި ވޯޑްތަކުގެ އިތުރުން ޕްރައިވެޓް ރޫމްތަކާއި އައިސީޔޫ އަދި ގުނަވަން ބަދަލުކުރުމާއި ބޯންމެރޯ ޓްރާންސްޕްލާންޓް ހެދުމުގެ ޚިދުމަތް ދެވޭނެ ހޮސްޕިޓަލެއް ކަމަށެވެ.
މި ހޮސްޕިޓަލް އެޅުމަށް ހުޅުމާލެ ދެވަނަ ފިޔަވަހިން 72،000 އަކަފޫޓުގެ ބިމެއް ސަރުކާރުން ވަނީ ހަމަޖައްސައިދީފައެވެ.
