45 ރަށަކުން 4000ށް ވުރެ ގިނަ ބިދޭސީންގެ ބަޔޮމެޓްރިކް މައުލޫމާތު ނަގައިފި

ރާއްޖޭގައި ގަވައިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ހިންގާ "އޮޕަރޭޝަން ކުރަނގި" ޕްރޮގްރާމްގެ ދަށުން ރާއްޖޭގެ 45 ރަށަކުން 4272 ބިދޭސީންގެ ބަޔޯމެޓްރިކް މައުލޫމާތު ނަގައިފިކަމަށް ބުނެފިއެވެ.

ހޯމްލޭންޑް ސެކިއުރިޓީ އަދި ޓެކްނޮލޮޖީ މިނިސްޓްރީއިން ބުނެފައިވަނީ މިއީ ރާއްޖޭގައި ގަވައިދާ ޚިލާފު ބިދޭސީން ގަވާއިދުގެ ތެރެއަށް ގެނައުމަށް ކުރެވޭ މަސައްކަތެއް ކަމަށެވެ.

މިއަހަރުގެ މެއި މަހުގެ ތެރޭގައި ފެށުނު މި އޮޕަރޭޝަންގެ މަސައްކަތް މީހުން ދިރިއުޅޭ ހުރިހާ ރަށެއްގައި ފުރިހަމަ ކުރާނެ ކަމަށް މިނިސްޓްރީން ބުނެފައިވެއެވެ.

އޮޕަރޭޝަން ކުރަންގި ކުރިއަށްދަނީ މޯލްޑިވްސް ޕޮލިސް ސަރވިސް އަދި މޯލްޑިވްސް އިމިގްރޭޝަނާ ގުޅިގެންނެވެ.

މި މަސައްކަތުގެ މަޤްޞަދަކީ ރާއްޖޭގައި ތިބި ހުރިހާ ބިދޭސީންގެ މަޢުލޫމާތު ޗެކްކޮށް، އެމީހުންގެ ބަޔޯމެޓްރިކް މަޢުލޫމާތު ރެކޯޑުކުރުން ކަމަށް ހޯމް މި މިނިސްޓްރީން ބުނެފައިވެއެވެ.

މިނިސްޓަރ ޢަލީ އިޙްސާން ވިދާޅުވެފައިވަނީ، ދެ ފިޔަވަހީގެ މައްޗަށް އެކުލެވޭ ތިން އަހަރުގެ އޮޕަރޭޝަން މި ނިމޭއިރު، ރާއްޖޭގައި ޑޮކިއުމެންޓް ނެތް އެއްވެސް ބިދޭސީއަކު ނުހުންނާނެ ކަމަށެވެ.

ގަވައިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމުގެ މަސައްކަތަކީ 2019 ވަނަ އަހަރު އެމްޑީޕީ ސަރުކާރުން ފަށާފައިވާ މަސައްކަތެކެވެ. އޭރު 40،000ށް ވުރެ ގިނަ މީހުން ރަޖިސްޓަރީކޮށް، ޑޮކިއުމެންއުމެންޓް ނެތް ބިދޭސީންގެ މައްސަލަ ޙައްލުކުރުމުގެ މަސައްކަތް ވަނީ ކޮށްފައެވެ.

މޯލްޑިވްސް އިމިގްރޭޝަނުން ޑޮކިއުމެންޓް ނެތް ބިދޭސީންނާއި އިމިގްރޭޝަން ގަވާއިދާ ޚިލާފުވާ މީހުން ފާހަގަކޮށް އެމީހުން ޑިޕޯޓްކުރުމުގެ މަސައްކަތް ކުރިއަށް ގެންދާ ކަމަށްވެސް ސަރުކާރުން ވަނީ ބުނެފައެވެ.