މި ސަރުކާރުގެ ސިޔާސީ މުވައްޒަފުންގެ އަދަދަކީ 2300، ރައްޔިތުންނަށް މިހާތަނަށް ދިނީ ގެއްލުން - ފައްޔާޒު
އެމްޑީޕީ ސަރުކާރުން ޖެހިލުމެއް ނެތި ހާމަކުރަމުން އައި ހުރިހާކަމެއް ހާމަކުރުން މި ސަރުކާރުން ހުއްޓާލައިފި
އެމްޑީޕީގެ ޗެއަރޕާސަން ފައްޔާޒް އިސްމާއިލް
މި ސަރުކާރުގެ ސިޔާސީ މުވައްޒަފުންގެ އަދަދަކީ 2300 ކަމަށާއި، ވެރިކަމަށް އަންނަންވެގެންނާއި ވެރިކަމަށް އައިސްވެސް ރައްޔިތުންނަށް މިހާތަނަށް ދިނީ ގެއްލުން ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
އެމްޑީޕީގެ ހަވަރު ބެރު ޕެނަލް ޑިސްކަޝަންގައި ވާހަކަ ދައްކަވަމުން ފައްޔާޒު ވިދާޅުވީ މިހާރު އޮތް ސަރުކާރު ވެރިކަމަށް އަންނަންވެގެން ދެއްކީ މައިގަނޑު ދެކަމެއް ކަމަށެވެ. ފުރަތަމަ ކަމަކީ އިންޑިއާ ސިފައިން ރާއްޖޭގައި ތިބިކަމަށް ބުނެ އިސްތިގުލާލާއި މިނިވަންކަން އެމްޑީޕީން ދޫކޮށްލާފައިވާ ކަމަށް ދެއްކުން ކަމަށެވެ. އަދި ދެވަނަ ކަމަކީ އެމްޑީޕީގެ ސަރުކާރުގެ ކާމިޔާބުފެ ފަހަތުގައި އޮތް އިންޑިއާއާއި އޮތް ގުޅުން ދަައްކައިގެން އިންޑިއާ އައުޓްކެމްޕޭނެއް ހިންގުން ކަމަށެވެ.
ފައްޔާޒު ވިދާޅުވީ އައްޑޫގައި 2000 ސިފައިން ތިބިކަމަށް މިހާރު އޮތް ސަރުކާރުން ވާހަކަ ދެއްކި ކަމަށާއި، ނަމަވެސް މިހާތަނަށް ވެސް އައްޑޫއިން އެ ސިފައިންނެއް ނުފެނުނު ކަމަށެވެ. ޔޫޓީއެފްގައި ސިފައިން ތިބިކަމަށާއި، ހަނިމާދޫގައި ސިފައިން ތިބިކަމަށް ބުނެ ބޮޑު ޑްރާމާއެއް ކުޅުނު ކަމަށެވެ. ފައްޔާޒް ވިދާޅުވީ ހައިޑްރޯގްރަފީގެ ކަންކަމުގައި އިންޑިއާއަށް ދޫކޮށްލައިގެން އުޅުނުކަމަށް ބުނި ކަމަށާއި، މި ކަންކަން ހާމަކުރައްވާނެކަމަށް ރައީސް ޑރ. މުހައްމަދު މުއިއްޒު ވިދާޅުވި ކަމަށެވެ.
އަދި މި ކަންކަމަކީ ގައުމީ ސަލާމަތަށް ހުރި ނުރައްކަލެއް ކަމަށްވިޔަސް ހުރިހާކަމެއްވެސް ހާމަކުރައްވާނެކަމަށް ވިދާޅުވެ ވެރިކަމަށް ވަޑައިގެން މިހާތަނަށް އެއިން އެއްވެސް އެއްޗެއް ހާމައެއް ނުކުރެއްވޭ ކަމަށެވެ. އަދި އެމްޑީޕީ ސަރުކާރުން ޖެހިލުމެއް ނެތި ހާމަކުރަމުން އައި ހުރިހާކަމެއް ހާމަކުރުން މި ސަރުކާރުން ހުއްޓާލާފައިވާ ކަމަށާއި، އެންމެ ކުޑަމިނުން ސިޔާސީ މުވައްޒަފުންގެ އަދަދުވެސް މި ސަރުކާރަށް ހާމަނުކުރެވުނު ކަމަށެވެ.
ފައްޔާޒް ވިދާޅުވީ މި ސަރުކާރުގެ ސިޔާސީ މުވައްޒަފުންގެ އަދަދަކީ 2300 ކަށެވެ.
ފައްޔާޒު ވިދާޅުވީ އިންޑިއާއަށް ވަޑައިގެން އެމްޑީޕީގެ ސަރުކާރުން އެއިރު ހޯދު 400 މިލިއަން ޑޮލަރުގެ ކަރަންސީ ސްވޮޕް އެގްރީމެންޓް އަލުން ކުރައްވާފައިވާ ކަމަށެވެ. ހައިޑްރޯގްރަފީ އެގްރީމެންޓުގެ ކަންތަކުގައި އެއްބާރުލުން ދެއްވާނެ ވާހަކައާއި، ފަށާފައި ހުރި ހައުސިންގ މަޝްރޫއުތަކާއި ހަވާލުވި ކަމަށާއި، ހަނިމާދޫ ރަންވޭ ނިންމާ އެއާއި ހަވާލުވި ކަމަށާއި، އިތުރުކަމެއް ނުވާ ކަމަށެވެ.
ފައްޔާޒު ވިދާޅުވީ ރައީސް މުއިއްޒުއަކީ އެއްވެސް އޮއްޓަރެއް ހުރި ބޭފުޅެއް ނޫން ކަމަށެވެ.
ފައްޔާޒު ވިދާޅުވީ ކަންކަން ކުރުމުގައި ވިސްނުންތެރިކަމާއި، ބައިނަލްއަގުވާމީ ގުޅުންތައް މެނޭޖްކުރަންޖެހޭ ކަމަށެވެ. ނަމަވެސް އިންޑިއާއެކީ ޖެހިގަނެ ބައިނަލްއަގުވާމީ ދުނިޔެއިން ރާއްޖެ އެކަހެރިވި ކަމަށެވެ. ސަބަބަކީ މި ސަރުކާރުން ޖިއޯ ޕޮލިޓިކްސް ނޭނގުން ކަމަށާއި، މިފަދަ އެތައްކަމެއްގެ ތެރެއިން ގެއްލުން ލިބުނީ ދިވެހި ރާއްޖެއަށާއި، ދިވެހިންނަށް ކަމަށެވެ.
