ގައުމިއްޔަތަކީ ތަރައްގީގެ މަސައްކަތް ނުހިނގާތީ އެ ވާހަކަ 'އޮއްބާލަން' މި ސަރުކާރުން އަޑުގަދަކޮށް ދައްކާ ވާހަކައެއް - ތޯރިގު
ގައުމިއްޔަތު ދިރުވާ ބޭފުޅުންގެ ވިސްނުން ހުރީ އެ ބޭފުޅުން ސްކޫލެއްގެ އެސްމްބްލީގައި ވާހަކަ ދައްކާލުން އެއީ ބޮޑު ޕްރޮޖެކްޓެއްގެ ގޮތުގައި
ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު
ގައުމިއްޔަތަކީ ތަރައްގީގެ މަސައްކަތް ނުހިނގާތީ އެ ވާހަކަ 'އޮއްބާލަން' މި ސަރުކާރުން އަޑުގަދަކޮށް ދައްކާ ވާހަކައެއް ކަމަށް ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު ވިދާވެއްޖެއެވެ.
ހަވަރުބެރު ޕެނަލް ޑިސްކަޝަންގައި ވާހަކަ ދައްކަވަމުން ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު ވިދާޅުވީ ގައުމިއްޔަތު އިޔާދަކުރުމަކީ ވަރަށް ބޮޑު މަޝްރޫއެއްގެ ގޮތުގައި އަޑުއިވެމުންދާ ކަމަށެވެ. މިހާތަނަށް މިކަން ކުރަން ކުރެވުނު މަސައްކަތަކީ ކޮބައިތޯ ސުވާލު އުފައްދަވާ ތޯރިގު ވިދާޅުވީ ގައުމިއްޔަތު ދިރުވާ އާލާކުރުމަކީ މުހިންމުކަމެއް ނަމަވެސް، މާއްދީ ތަރިކައެއް ނެތި ހަގީގި ގައުމިއްޔަތެއް ނުދިރުވޭނެ ކަމަށެވެ.
ތޯރިގު ވިދާޅުވީ ގައުމިއްޔަތުގެ އެންމެ މުހިންމު ބަޔަކީ މާއްދީ ތަރިކަ ކަމަށާއި، ދެން އަންނާނި މައުނަވީ ތަރިކަ ކަމަށެވެ. ނަމަވެސް މި ސަރުކާރުން މި ދާއިރާއިން ކުރި އެއްވެސް މަސައްކަތެއް ނުފެންނަ ކަމަށާއި، އެކަމާއި ގުޅުންހުރި އެއްވެސް ޕްރޮޖެކްޓެއްވެސް ނުފެންނަ ކަމަށެވެ.
ތޯރިގު ވިދާޅުވީ ގައުމިއްޔަތު ދިރުވާ އާލާކުރުމުގެ މަސައްކަތަކީ މިއަދު ކުރާ ކަމެއް ނޫން ކަމަށާއި، އެކަންކަމަކީ ޒަމާނުއްސުރެ ކުރަމުން އަންނަ މަސައްކަތެއް ކަމަށެވެ. ސްކޫލްތެރޭގައި ވެސް އެކަންކަން ކުރަމުން އަންނަ ކަމަށާއި، ގައުމިއްޔަތަށް ދަރިވަރުން އަހުލުވެރިކުރުމަކީ ވެސް ކުރަމުން އަންނަ ކަންކަން ކަމަށެވެ.
ތޯރިގު ވިދާޅުވީ ގައުމިއްޔަތުގެ ވާހަކަ ގަދައަށް ދައްކަން ފަށަނީ ރާއްޖޭގެ ތަރައްގީއަށް ކުރަމުން އައި ކަންކަން ކުރިއަށް ނުދިއުމުން ކަމަށެވެ. ނަމަވެސް ހަގީގަތަކީ ރާއްޖޭގެ ތަރައްގީއަށް ފެށި މަސައްކަތް ނުހިނގާ ކަމަށާއި، އެކަންކަން އޮއްބާލަން ވެސް ދައްކާ ވާހަކައެއްގެ ގޮތުގައި ގައުމިއްޔަތު ދިރުވާ އާލާކުރާ ވާހަކަ ސަރުކާރުން ދައްކާ ކަމަށެވެ.
